Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XI.
1 The whiche thingis whanne herd Jabyn,
the kyng of Asor, he sente to Jodab,
kyng of Madiam, and to the kyng of Semeron,
and to the kyng of Acsaph,
2 and
to the kyngs of the north, that dwelten
in mounteyns, and in the pleyn a&yogh;ens the
south of Seneroth, and in the wijld feeldis,
and regiouns of Dor,
3 bisidis the see, and
to Chanane fro the eest and west, and
Ammorre, and Ethee, and Phereze, and
Jebuse in the mounteyns, and Euee, that
dwelt in the rotis of Hermon, in the
loond of Maspha.
4 And alle wenten out
with her companyes, ful myche puple, as
the grauel that is in the brenk of the
see, and hors, and chaaris, of multitude
with outen noumbre.
5 And alle thes
kyngis camen to gydre in oon at the
watris of Meron, for to fi&yogh;t a&yogh;ens Yrael.
6 And the Lord seide to Josue, Ne drede
thow hem, to morwe forsothe this same
our Y schal taak hem alle to be woundid
in the si&yogh;t of Yrael; the hors of hem thow
shalt kut of the synewis at the knees,
-- --
and the chaaris thow shalt brenne with
fier.
7 And Josue cam, and al his oost
with hym, a&yogh;ens hem, at the watris of
Meron sodeynlich, and felle vpon hem.
8 And the Lord took hem into the hoondis
of Yrael; the whiche smyten hem, and
pursuden vnto greet Sydon, and to watris
of Maserephoh, and to the feeld of
Masphe, that is at the est part of it. So
he smoot alle, that noon of hem relikis
he lefte;
9 and he dide as the Lord comaundide
to hym; the hors of hem he
kuttide the sinewis at the knee, and the
charys he brente.
10 And turned a&yogh;en anoon
he took Asor, and the kyng of it he
smoot with swerd; forsothe Asor bi oold
tyme among alle these rewmes heelde the
princehod.
11 And he smoot alle lyues that
there dwelten, he lefte not in it eny relikis,
but vnto the deeth alle thingis he
waastide; and that cytee he destruyede
with brennynge.
12 And alle the citees bi
enuyroun and the kyngis of hem he
took, and smoot, and dide awey, as
Moyses, the seruaunt of the Lord, comaundide
to hym,
13 with out the citees
that weren in the hillis, and in the hillokis
set; and the other Yrael brente vp;
oon onelich, the `moost strengthid, Azor,
flawme brente vp.
14 And al the praye of
thes citees, and beestis, the sones of Yrael
dyuydeden to hem self, alle the enemyes
slayn.
15 As the Lord comaundide to his
seruaunt Moyses, so Moyses comaundide
to Josue, and he alle thingis fulfillide;
and he passide not biside of alle the
maundementis, forsothe ne o word, that
the Lord comaundide to Moyses.
16 And
so Josue took al the mounteyn loond, and
the south loond, and Gosen, and the pleyn,
and the west coost, and the hil of Yrael,
and the wijld feeldis of it;
17 and a paart
-- --
of the hil that steieth vp to Seyr vnto
Baalgath, bi the pleyn of Libany vndur
the hil of Hermon; alle the kyngis of
hem he took, and smoot, and slew&yogh;.
18 Myche tyme fau&yogh;t Josue a&yogh;ens thes
kyngis; there was no cyte,
19 that took
hym not to the sones of Yrael, saue Euee
that dwellid in Gabaon; alle with fi&yogh;tynge
he took.
20 Forsothe the sentence of the
Lord it was, that the hertis of hem weren
ful hardid, and shulde fi&yogh;te a&yogh;ens Yrael,
and falle, and thei shulde not disserue
eny mercy, but shulden perisshe, as the
Lord hadde comaundid to Moyses.
21 In
that tyme Josue cam, and slew&yogh; Enachym,
fro the mownteyns of Ebron, and
Dabir, and Anab, and of al the hil of
Juda, and of Yrael, and the cytees of
hem he dide awey.
22 He lefte not eny of
the stok of Enachym in the loond of the
sones of Yrael, out taak the cytees of
Gaza, and Geth, and Azoto, in the whiche
aloon thei ben left.
23 Thanne Josue took
al the loond, as the Lord spak to Moyses,
and took it into possessioun to the sones
of Yrael, after paarties and her lynagis;
and the loond restyde fro bateil.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|