Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. X.
1 The whiche thingis, whanne hadde herd
Adonysedech, kyng of Jerusalem, that is,
that Josue hadde taak Hay, and hadde
vndurturned it; forsothe as he dide to
Jericho and to the kyng of it, so he dide
to Hay and to the kyng of it; and that
Gabonytis weren ouerflowen to Irael,
and weren bounden in pees with hem,
2 he
dradde greetly; forsothe a greet cite was
Gabaon, and oon of the kyngis citees,
and more than the burgh toun Hay, and
alle the fi&yogh;ters of it moost stronge.
3 Thanne sente Adonysedech, kyng of Jerusalem,
to Ocham, kyng of Ebron, and
to Pharam, kyng of Herymoth, and to
Japhye, kyng of Lachis, and to Addabir,
king of Eglon,
4 seiynge, Stye &yogh;e vp to me,
and bryngeth help, and out fi&yogh;te we Gabaon,
for he is ouerflowen to Josue, and
to the sones of Yrael.
5 Thanne thei gedrid
styeden vp, fyue kyngys of Amorreis,
kyng of Jerusalem, kyng of Ebron, kyng
of Herymoth, kyng of Lachis, kyng of
Eglon, togidre with her hoostis; and
thei settiden tentis about Gabaon a&yogh;enfi&yogh;tynge
it.
6 Forsothe the dwellers of the
citee of Gabaon bisegid, senten to Josue,
that thanne dwellide in tentis at Galgalam,
and seide to hym, Ne with drawe
thou thin hoond fro the help of thi seruauntis;
sty vp anoon, and delyuer vs,
and bryng help; forsothe there ben comen
to gidre a&yogh;ens vs alle the kyngis of Ammorreis,
that dwellen in mounteyns.
7 And
Josue stiede vp fro Galgalis, and al the
oost of fi&yogh;ters with hym, moost stronge
men.
8 And the Lord seide to Josue,
Drede thow not hem, forsothe into thin
hoondis Y haue taken hem; noon of hem
to thee shal mowe a&yogh;enstoond.
9 And so
-- --
Josue felle on hem feerlich, al ny&yogh;t stiynge
vp fro Galgalis;
10 and the Lord distourbide
hem fro the face of Yrael, and defowlide
bi a greet veniaunce in Gabaon;
and pursuede hem bi weye of the stiynge
vp of Betheron, and smoot vnto Azecha
and Maceda.
11 And whanne thei flowen
the sones of Yrael, and weren in the goynge
doun of Bethoron, God sente vpon
hem greet stonus fro heuene, vnto Azecha;
and ben deed manye mo with stoonus of
hawl, than whom with swerd had smytun
the sones of Yrael.
12 Thanne Josue spak
to the Lord, in the day that he took
Ammorre in the si&yogh;t of the sones of
Yrael; and seide before hem, Sunne, a&yogh;ens
Gabaon be thow not meued, and mone,
a&yogh;ens the valey of Haylon.
13 And the
sunne and the mone stoden, to the tyme
that the folk vengide hem self of her enemyes.
Is not this wryten in the book of
ri&yogh;twise men? And so stood the sunne in
the mydil of heuene, and hyede not to
goo doun the space of o day;
14 there was
not before ne afterward so loong a day;
obeishynge the Lord to the voyce of man,
and fi&yogh;tynge for Yrael.
15 And Josue turnede
a&yogh;en, with al Yrael, into the tentis of
Galgala.
16 Forsothe fyue kyngis flowen,
and hidden hem in the spelunk of the
citee of Maceda.
17 And it is told to Josue,
that there weren foundun fyue kyngis
lurkinge in the spelunk of the cite of
Maceda.
18 The which comaundide to felawis,
and seith, Ouerturne &yogh;e greet
stoonus at the mouth of the spelonk, and
putte &yogh;e redi men, that kepen hem closid;
&yogh;e forsothe wole &yogh;e not stoond,
19 but pursue
&yogh;e enemyes, and al the eendis of hem
fleynge sleeth; ne lette &yogh;e hem goon into
the socours of &yogh;oure citees, `the whiche
the Lord &yogh;oure God hath taak into &yogh;oure
-- --
hoondis.
20 Slayn thanne the aduersaries
with a greet veniaunce, and vnto the
deeth almest consumpt, thilk that fro
Irael my&yogh;ten flee, wenten into the
strengthid citees.
21 And al the oost
turnede a&yogh;en to Josue, in Maceda, where
thanne weren the tentis, thei hoole and
in hoole noumbre; and no man a&yogh;ens the
sones of Yrael was hardy to grucche.
22 And Josue comaundyde, seiynge, Opyn
the mouth of the spelonk, and bryngith
to me fyue kyngis that in it lorken.
23 And the seruauntis diden, as to hem was
comaundid; and thei brou&yogh;ten to hym
fyue kyngis fro the spelonk; the kyng of
Jerusalem, the kyng of Ebron, the kyng
of Hermoth, the kyng of Lachis, the kyng
of Eglon.
24 And whanne thei weren brou&yogh;t
out to hym, he clepide alle the men of
Yrael, and seith to the pryncis of the
oost, that with hym weren, Goth, and
puttith &yogh;oure feet vpon the neckis of thes
kyngis. The which whanne thei hadden
goon, and troden the neckis of hem suget
with the feet,
25 eft he seith to hem, Wole
&yogh;e not drede, ne be &yogh;e afeerd, take &yogh;e
coumfort, and be &yogh;e stronge; forsothe so
the Lord shal doo to alle &yogh;oure enemyes,
a&yogh;ens whom &yogh;e shulen fi&yogh;t.
26 And Josue
smoot, and slew&yogh; hem, and hongide vpon
fyue stokkis; and thei weren hongid vnto
the euen.
27 And whanne the sunne cam
down, he comaundide to felows, that thei
doon hem doun fro the gibetis; the whiche
doon doun, thei threwen hem into the
spelonk, in the which thei lorkiden; and
thei puttiden vpon the mouth of it greet
stoonus, that abiden stil to the tyme
that is nowe.
28 Forsothe the same day
Josue took Maceda, and smoot in mouth
of swerd; and the kyng of it, and alle
-- --
his dwellers he slew&yogh;; and he lefte not in
it, nameli, litil relikis; and he dide to the
king of Maceda as he dide to the kyng
of Jericho.
29 He wente with al Yrael fro
Maceda into Lebna, and he fau&yogh;t a&yogh;ens
it,
30 the which the Lord took, with his
kyng, in the hoond of Irael; and thei
smyten the cite in the mouth of swerd,
and alle the dwellers of it, and thei leften
not in it eny relikis; and thei diden to
the kyng of Lebna as thei diden to the
kyng of Jericho.
31 Fro Lebna he passide
into Lachis, with al Yrael; and the oost
disposid bi enuyroun, a&yogh;enfau&yogh;t it.
32 And
the Lord took Lachis in the hoond of the
sones of Yrael; and he took it that other
day, and smoot in mouth of swerd, and
eche lijf that was in it, as he dide to
Lebna.
33 That tyme stiede vp Yram, the
kyng of Gazer, for to helpe Lachis;
whom Josue smoot with al his puple vnto
the deth.
34 And wente fro Lachis vnto Eglon,
and enuyrounde,
35 and out fau&yogh;t it the
same day; and smoot in mouth of swerd
alle the lyues that weren in it, after alle
thingis that he dide to Lachis.
36 Forsothe
he stiede with al Yrael fro Eglon vnto
Ebron, and fau&yogh;t a&yogh;ens it,
37 and took, and
smoot in mouth of swerd; the kyng forsothe
of it, and alle the burgh touns of
that regioun, and alle the lyues that
dwelliden in it; he lafte not in it eny
relikis; as he dide to Eglon so he dide
to Ebron, al thingis that in it he foond
wastynge with swerd.
38 Thens turned a&yogh;en
into Dabyr,
39 he took it, and waastid; the
kyng forsothe of it, and alle the bur&yogh;
towns bi enuyroun he smoot in mouth
of swerd; he lafte not in it eny relikis;
as he dide to Ebron, and Lebna, and to
the kyngis of hem, so he dide to Dabir
and to the kyng of it.
40 And so Josue
-- --
smoot al the mounteyn loond, and south,
and feeldi, and Assedoch with his kyngis;
and he lafte not in it eny relikys, but
alle that my&yogh;ten breeth he slow&yogh;, as the
Lord God of Yrael comaundide to hym;
fro Cades Barne vnto Gazam,
41 and al the
loond of Josson vnto Gabaon,
42 alle the
kyngis and regiouns of hem, with o feersnes
he took, and wastide; forsothe the
Lord God of Israel fau&yogh;t for him.
43 And
he turnede a&yogh;en with al Yrael to the place
of the tentis in Galgala.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
