Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXVIII.
1 If forsothe thow herist the voyce of
the Lord thi God, that thow doo and
kepe alle the heestis of hym, that Y comaunde
to thee to day, the Lord thi God
shal make the hi&yogh;er than alle the folkis
of kynde, that dwellen in erthe.
2 And
there shulen come vpon thee alle thes
blissyngis, and shulen taak thee; if neuerthelater
the heestis of hym thow herist.
3 Blessid thow in the citee, and blessid in
the feeld;
4 blessid the fruyt of thi wombe,
and the fruyt of thin erthe, and the fruyt
of thi beestis, the flockis of thi droues,
and the fooldis of thi sheep;
5 blissid thi
beernes, and blessyd thi relikis;
6 blessid
thow shalt be ingoynge, and out goynge.
7 The Lord shal &yogh;yue thin enemyes, that
rysen a&yogh;ens thee, fallynge in thin si&yogh;t; bi
o weye thei shulen come a&yogh;ens thee, and
bi seuen thei shulen flee fro thi face.
8 The Lord shal seend out blessynge vpon
thi celers, and vpon alle the werkis of
thin hoondis; and he shal blesse to thee
in the loond that thow shalt taak.
9 The
-- --
Lord shal rere thee to hym into an hooli
puple, as he hath swore to thee, if thou
kepyst the heestis of the Lord thi God,
and gost in the weies of hym.
10 And alle
the puples of erthes shulen seey&yogh;en, that
the name of the Lord be inwardly clepid
vpon thee, and thei shulen drede thee.
11 To be plenteuous in alle goodis the Lord
shal make thee, in fruytis of thi wombe,
and fruyt of thi beestys, fruyt of thi
loond, that the Lord hath swore to thi
fadres, for to &yogh;yue to thee.
12 The Lord
shal opne his best tresour, heuene, that
he &yogh;yue reyn to thi loond in his tyme;
he shal blesse to alle the werkys of thin
hoondis; and thow shalt okyr to many
folkis, and thi self shal not borwe to
oker of eny man.
13 The Lord thi God shal
sett thee into heed, and not into tayl,
and thow shalt be euere more aboue, and
not vndur; if neuerthelater thow here
the maundementis of the Lord thi God,
that Y comaunde to thee to day, and
kepist,
14 and dost, and bowist not aside fro
hem, ne to the ri&yogh;t, ne to the left, ne hast
not folwid alien goddis, ne heried hem.
15 And if thou wolt not here the vois of
the Lord thi God, that thow keep and
doo alle the maundementis of hym, and
cerymoyns, that Y comaunde to thee to
day, shulen come vpon thee alle thes
malysouns, and holde thee.
16 Cursid thow
shalt be in citee, cursed in feeld;
17 cursid
thi bern, and cursid thi relikis;
18 cursid
the fruyt of thi wombe, and the fruyt of
thin erthe, the droues of thin oxen, and
the flockis of thi sheep.
19 Cursid thow
shalt be ingoynge, and cursid out goynge.
20 The Lord shal sende vpon thee hungre
inward, and hungre outward, and blamyng
into alle thi werkis that thow shalt
do, to the tyme that he trede thee doun,
-- --
and lese swiftly, for thi moost yuel fyndyngis,
in the whiche thow hast forsakun
me.
21 Joyn to thee the Lord pestilence,
to the tyme that he waast thee fro the
erthe, to the which thow shalt goon in
to be weeldyd.
22 Smyit thee the Lord
with nede, feuer, and coold, and brennynge,
and heet, and corrupt eyre, and
rust; and pursue he to the tyme that
thou peryshe.
23 Be heuene that is aboue
thee braasny; and the lond that thou
tredist yrony.
24 &YOGH;yue the Lord the wedre
of thin erthe powdre, and fro heuene
come down vpon thee askis, to the tyme
that thow be al to-powned.
25 Tak thee
the Lord fallynge down before thin enemyes;
bi o weye go thow out a&yogh;ens
hem, and bi seuen fle thow, and be thou
scatered thur&yogh; out alle the rewmes of the
erthe;
26 and be thi careyn into meete to
alle the foulis of heuene, and beestis of
the erthe, and be there noon that driue
aweye.
27 Smyit thee the Lord with the
byil of Egipt, and the paart of the bodi bi
the which toordis ben sheten out, with scab
forsothe and itchynge, so that thow may
not be helid.
28 Smyit thee the Lord with
madnes, and blyndnes, and with woodnes
of thou&yogh;t;
29 and thow shalt graasp
in mydday, as is woned a blynd man to
graasp in derknissis; and make he not
redi thi weyes; and alle tymes wrong
chalenge suffre thou, and be thow born
down with vyolence, ne haue thow that
delyuer thee.
30 A wijf tak thow, and another
man sleep with hyr; `an hows bild
thow, and dwel thow not in yt; plaunt
thow a vyn, and kut thow not the grapis
of it.
31 Thin ox be slayn before thee, and
eete thow not of it; thin asse be cau&yogh;t
-- --
in thi si&yogh;t, and be it not &yogh;oldun to thee;
thi sheep be thei &yogh;ouen to thin enemyes,
and be there noon that thee help.
32 Thi
sones and thi dou&yogh;tren be thei takun to
another puple, seynge thin eyen, and defaylynge
at the si&yogh;t of hem al day; and
be there not strength in thin hoond.
33 The
fruyt of thin erthe, and alle thi traueyls
eete the puple that thow knowist not;
and be thow euer more wronge chalengis
susteininge, and born doun alle days,
34 and stonyed at the drede of tho thingis
that thin eyen shulen seen.
35 Smyit thee
the Lord with the moost yuel biel in
knees, and in sparlyuers; and mow thow
not be helid fro the sool of the foot vnto
the nol.
36 And the Lord shal leede thee,
and thi kyng, whom thow hast ordeynd
`vpon thee, into a folk that knowist not,
thow, and thi fadris; and thow shalt
serue there to alien goddys, tree, and
stone.
37 And thow shalt be lost into proueerb,
and fable to alle puplis, to the
whiche the Lord shal inleede thee.
38 Myche
seed thow shalt throw `in to the loond,
and litil thou shalt gedre; for locustis
shulen deuowre alle thingis.
39 A vyn thow
shalt plaunt, and delue, and wyn thow
shalt not drynke, ne gedre of it eny
thing; for it shal be wastyd with wormes.
40 Olyues thow shalt haue in alle thi
teermes, and thow shalt not be anoynt
with oyle; for thei shulen falle awey, and
perishen.
41 Sones and dou&yogh;tres thow shalt
geete, and thow shalt not vse hem; for
thei shulen be lad into chaytifte.
42 Alle
thi trees and fruytis of thi loond rust
shal waast.
43 A comlynge, that dwellith
with thee in the loond, shal stey up vpon
thee, and shal be hi&yogh;er; forsothe thow
-- --
shalt goo doun, and be lower.
44 He shal
oker to thee, and thow shalt not oker
to hym; he shal be into heed, and thow
shalt be into tayl.
45 And there shulen
come vpon thee alle thes malisouns, and
pursuynge shulen holde thee, to the tyme
that thow dye; for thow hast not herd
the voyce of the Lord thi God, ne hast
kept the maundementis of hym, and cerymoyns,
that he hath comaundid to thee.
46 And there shulen be in thee sygnes, and
wondres, and in thi seed, vnto with outen
ende;
47 forthi that thow hast not serued
to the Lord thi God in ioy of herte and
gladnes, for plenteuowsnes of alle thingis.
48 Thou shalt serue to thin enemye, that
God shal send into thee, in hungre, and
threst, and nakidnes, and scaarsnes of alle
thingis; and he shal put on an yren &yogh;ok
vpon thi scol, to the tyme that he haue
al to-treede thee.
49 The Lord shal brynge
vpon thee a folk fro aferre, and fro the
vttermoost coostis of the erthe, into
liknes of a fleynge egle with feersnes,
whos tonge thow mayst not vnderstond;
moost gredi folk,
50 that shal not spaar to
the old, ne haue mercy of the litil child.
51 And he shal deuowr the fruyt of thi
beestis, and fruytis of thin erthe, to the
tyme that thow dye, and leeue he not to
thee corn, wyn, and oyle, droues of oxen,
and flockis of sheep, to the tyme that he
scatre thee,
52 and al to-treede thee in alle
thi citees; and thi fast wallis and hi&yogh;e
shulen be destruyed, in the whiche thow
haddist trust in al thi loond. Thow shalt
be ensegid, with ynne thi &yogh;atis in al thi
loond, that the Lord thi God shal &yogh;yue to
thee.
53 And thow shalt ete the fruyt of
thi woombe, and the flesh of thi sones,
and of thi dou&yogh;tren, that the Lord thi
-- --
God hath &yogh;eue to thee, in angwish and
wastete, with the which thin enemye
shal oppresse thee.
54 A man delicate of
lijf, and leccherous myche, shal enuye to
his brother, and to the wijf that sittith
in his bosum,
55 that he &yogh;yue not to hem of
the flesh of his sones, the whiche he shal
eete; forthi that no thing other he haue
in the segynge and scaarsenes, that thin
enemyes han wastid thee with ynne alle
thi &yogh;atis.
56 A tendre womman and a delicate,
`the which vpon the erthe my&yogh;te
not go, ne fitch the stap of the foot, for
softnes and moost tendrenes, shal enuye
to hir man that restith in the bosum of
hir, vpon the sone and dou&yogh;tres flesh,
and the filth of the lityl fellis,
57 that goon
out fro the myddil of the hippis of hyr,
and vpon the free children that ben born
in the same our. Thei shulen ete hem
priuely, for the scaarsnesse of alle thingis
in the seege and waastete, bi the which
thin enemy shal oppresse thee with ynne
thi &yogh;atis.
58 But if thow keep and doo alle
the wordis of this lawe, that ben wryten
in this volym, and drede the name of
him gloriows and feerful, that is the
Lord thi God,
59 the Lord shal encrees thi
veniaunces, and veniauncis of thi seed;
greet veniaunces and stedfast, infirmytees
moost yuel and euerelastynge.
60 And he
shal turn into thee alle the turmentyngis
of Egipt, that thow hast dredde, and thei
shulen cleue to thee.
61 Forthermore and
alle the langouris and veniauncis, `the
whiche ben not wryten in the volym of
this lawe, the Lord shal brynge vpon
thee, to the tyme that he haue al totrode
thee.
62 And &yogh;e shulen leeue fewe in
noumbre, that weren before as sterrys of
heuene for multitude; for thow herdist
-- --
not the voice of the Lord thi God.
63 And
as before thee the Lord gladdide vpon
&yogh;ow, wel doynge to &yogh;ow, and &yogh;ow multipliynge;
so he shal be glad, &yogh;ow scaterynge
and vndurturnynge, that &yogh;e ben doon
awey fro the loond, to the which thow
shalt go in to be weeldid.
64 The Lord
shal scater thee into alle puplis, fro the
hi&yogh;te of the erthe vnto the teermes of it;
and thou shalt serue there to alien goddis,
`the whiche thow knowist not, and thi
fadris, to trees and stonus.
65 In tho folkis
forsothe thow shalt not rest, ne shal be
rest to the stap of thi foot. Forsothe the
Lord shal &yogh;yue to thee there a dreedful
herte, and faylynge eyen, and a sowle
wastid with priue sorwe.
66 And thi lijf
shal be as hongynge before thee; thow
shalt drede ny&yogh;t and day, and thow shalt
not trowe to thi lijf.
67 Eerli thow shalt
seye, Who &yogh;yueth to me euen? and at
euen, Who &yogh;yueth to me eerlich? for the
drede of thin herte, bi the which thow
shalt be agast, and for tho thingis that
thow shalt se with thin eyen.
68 And the
Lord shal brynge thee a&yogh;en with multitude
of shippis into Egipt, bi the weye
of the which he seide to thee, that yt
thow shuldist se no more. There thow
shalt be sold to thin enemyes, into
thrallis and thrallessis; and there shal
not be that bigge.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
