Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIX.
1 Thes ben the wordis of the couenaunt
of pees, that the Lord hath comaundid
to Moyses, that he should smyte with
the sones of Yrael in the loond of Moab,
biside that boond of pees, that with hem
he couenauntide in Oreb.
2 And Moyses
-- --
clepide al Yrael, and seide to hem, &YOGH;e
han seen alle thingis that the Lord hath
doo before &yogh;ow in the loond of Egipt,
to Pharao, and alle the seruauntis of
hym,
3 and to al the loond of hym; greet
temptaciouns, that thin eyen seen, thilk
sygnes, and greet wondres.
4 And the
Lord &yogh;af not to &yogh;ow an vndurstondynge
herte, and seynge eyen, and eeris that
mi&yogh;ten here, vnto the day that is nowe.
5 He ladde &yogh;ow fourti &yogh;eer bi deseert;
&yogh;oure clothes ben not apeyred, ne the
shoon of &yogh;oure feet for eeld ben not
wastid;
6 breed &yogh;e eeten not, wyn and
sidre &yogh;e dronken not, that &yogh;e shulden
knowe for he is the Lord &yogh;oure God.
7 And &yogh;e ben comen to this place; and
Seon, the kyng of Esebon, went out, and
Og, the kyng of Basan, a&yogh;en comynge to
&yogh;ow to fi&yogh;t.
8 And we smyten hem, and
token the loond of hem, and &yogh;auen to be
weeld to Ruben, and Gad, and to the
half lynage of Manasse.
9 Keep &yogh;e therfor
the wordis of this couenaunt, and fulfil
hem, that &yogh;e vndurstonden alle thingis
that &yogh;e shulden doo.
10 &YOGH;e stonden to day
alle before the Lord &yogh;oure God, &yogh;oure
princes, and lynagis, and the more thur&yogh;
birth, and doctours, al the puple of Irael,
free children,
11 &yogh;our wyues, and comlyngis
that with thee dwellen in tentes, out taak
the hewers of trees, and hem that beren
watris;
12 that thow passe in the couenaunt
of the Lord thi God, and in the ooth that
the Lord thi God smytith with thee,
13 that
he arere thee to hym into a puple, and
he be the Lord thi God, as he hath
spokun to thee, and as he hath sworn to
thi fadres Abraham, Ysaac, and Jacob.
14 Ne to &yogh;ow alone I this couenaunt smyte,
and thes oothes conferme,
15 but to alle present
-- --
and absent.
16 Forsothe &yogh;e han knowe
what maner wise we dwelten in the loond
of Egipt, and what maner wise we passiden
bi the myddil of naciouns; the whiche
passynge,
17 &yogh;e seen abomynaciouns, and
filthis, that is, mawmettis of hem, tree
and stoon, siluer and gold, that thei
heryeden.
18 Lest perauenture there be among
&yogh;ow man or womman, meyne or
lynage, whos herte is turned awey to
day fro the Lord &yogh;oure God, that he goo,
and serue to goddis of other gentils; and
be among &yogh;ow a rote burionynge gal and
bitternes;
19 and whanne he hadde herd
the wordis of this ooth, he blesse to hym
in his herte, seiynge, Pees shal be to me,
and Y shal go in the shrewidnes of myn
herte; and a dronken take the thristi,
and the Lord for&yogh;yue not to hym,
20 but
thanne moost the woodnes of hym shal
wax feers, and gelows a&yogh;ens that man,
and sitten vpon hym alle the cursid
thingis that ben wryten in this volym;
and he doo awey the name of hym vnder
heuene,
21 and waast hym into the lost
fro alle lynagis of Yrael, after the malisouns
that in the book of this lawe and
couenaunt ben conteyned.
22 And the generacioun
folowynge shal seye, and the
sones that shulen be born therafter, and
pilgrymys, and fro aferre comen, seynge
the veniauncis of that loond, and the infirmytees,
with the whiche the Lord
tourmentid it,
23 with brimstoon, and brennynge
with heet of the sunne, so that
forthermore it be not sowed, ne eny
thing green burioun, into ensaumple of
the vndurturnynge of Sodom and Gomor,
Adame and Soboym, the whiche
the Lord vndurturned in wreth, and
in his woodnes.
24 And al folk shulen
seye, Whi thus the Lord hath doon to
this loond? What is this greet wrath
with outen mesure of his woodnes?
25 and
thei shulen answere, For thei han forsake
-- --
the couenaunt of the Lord, that he
couenauntide with the faders of hem,
whanne he lad hem out of the loond of
Egipt,
26 and serueden to alien goddis, and
honoureden hem whom thei knewen not,
and to whom thei weren not taken to;
27 therfor wraththed the woodnes of the
Lord a&yogh;ens this loond, that he brou&yogh;t in
vpon it alle the cursid thingis that in
this volym ben wryten;
28 and he keste
hem out fro his loond in wraththe, in
woodnes, and in moost indignacyoun; and
he keste aferre in to an alyen loond, as to
day is preued.
29 Hid thingis of the Lord
oure God ben, that ben open to vs, and
to oure sones vnto with outen ende, that
we doon alle thingis of this lawe.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
