Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXVII.
1 Moyses forsothe hath comaundid, and
the eldren, to the puple of Yrael, seiynge,
Keep &yogh;e eche maundement that I
comaunde to &yogh;ow to day.
2 Whanne &yogh;e
han passid ouere Jordan, into the loond
that the Lord thi God shal &yogh;yue to thee,
thow shalt arere greet stonus, and with
plastre thow shalt dawbe hem,
3 that
thow mowe wryte in hem alle the wordis
of this lawe, Jordan ouergoon, that thow
goo into the lond that the Lord thi God
shal &yogh;yue to thee, the loond mylk and
hony flowynge, as he hath swore to thi
fadres.
4 Whanne thanne thow shalt ouerpas
Jordan, arere the stonus that Y to
day comaunde to thee, in the mownt of
Hebal; and thow shalt dawbe hem with
plastre.
5 And thow shalt bild there up
an auter to the Lord thi God, of stonus
whom yrun hath not towchid,
6 and of
stonus vnfourmed and vnpolishid; and
-- --
thow shalt offre vpon it brent sacrificis
to the Lord thi God;
7 and thow shalt offre
pesible oostis, and thow shalt eete there,
and `make metship before the Lord thi
God.
8 And thow shalt wryte vpon the
stonus alle the wordis of this lawe,
pleynly and cleerli.
9 And Moyses and
the preestis of Leuyte kynde seiden to al
Yrael, Tak hede, and here thow, Yrael;
to day thow art maad the puple of the
Lord thi God;
10 thow shalt here the voice
of hym, and do the heestis, and ry&yogh;twisnesses,
that I comaunde to thee.
11 And
Moyses comaundide to the puple in that
day,
12 seiynge, Thes shulen stoond to blesse
the Lord vpon the hil of Garysym, Jordan
put ouer; Symeon, Leuy, Judas, Ysachar,
Joseph, and Beniamyn.
13 `And forn
a&yogh;ens thes shulen stoond to curse in the
hil of Hebal, Ruben, Gad, and Aser, Zabulon,
Dan, and Neptalym.
14 And the Leuytes
shulen pronounce, and seye to alle
men of Irael,
15 with an hi&yogh;e voice, Cursid
be the man that makith grauen thing
and &yogh;otun, abomynacioun of the Lord, the
werk of the hoondis of crafti men, and
shal put it in hidils; and al the puple
shal answer, and seye, Amen!
16 Cursid
that honoureth not his fader and moder;
and al the puple shal seye, Amen!
17 Cursid that ouerberith the teermes of his
nei&yogh;bore; and al the puple shal seye,
Amen!
18 Cursid that makith to erre the
blynde in the weye; and al the puple
shal seye, Amen!
19 Cursid that peruertith
doom of comlynge, faderles child, and
widewe; and al the puple shal seye, Amen!
20 Cursid that slepith with the wijf
of his fader, and opneth the couerynge
of his bed; and al the puple shal seie,
Amen!
21 Cursid that slepith with eny
beest; and al the puple shal seye, Amen!
-- --
Cursid that slepith with his sister,
22 dou&yogh;ter
of his fader, or of his moder; and al
the puple shal seye, Amen!
23 Cursid that
slepith with his wyues moder; and al
the puple shal seie, Amen!
24 Cursid that
priuely smytith his nei&yogh;bour; and al the
puple shal seie, Amen!
25 Cursid that
slepith with the wijf of his nei&yogh;bour;
and al the puple shal seye, Amen!
26 Cursid
that takith &yogh;iftis, that he smyte the soule
of the innocent blood; and al the puple
shal seye, Amen!
27 Cursid that dwellith
not in the wordis of this lawe, ne hem in
deede fulfillith; and al the puple shal
seye, Amen!
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|