Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXVI.
1 Whanne thow comyst into the loond
that the Lord thi God is to &yogh;yue to thee
to be weeldid, and holdist it, and dwellist
in it,
2 thow shalt taak of alle thi fruytis
the cheef, and put in a leep; and thow
shalt goo to the place that the Lord thi
God hath chosun, that there be inwardly
clepid the name of hym.
3 And thow shalt
goon to the preest that were in tho
days, and seye to hym, I knowleche to
day before the Lord thi God, that Y am
comen into the loond, for the which he
hath swore to oure fadris, that he shulde
&yogh;yue it to vs.
4 And the preest takynge
the leep of thin hoond, shal put before
the auter of the Lord thi God.
5 And thow
shalt speke in the si&yogh;t of the Lord thi
God, Sirus pursuede my fader, that descendide
into Egipt, and there pilgrimagide
in moost fewe noumbre; and he
growide into a greet folk of kynde, and
strong, and of multitude with out ende.
6 And the Egipciens greuowsly traueilyden
vs, and pursueden, puttynge on moost
-- --
greuows birthens.
7 And we crieden to
the Lord God of oure faders, that hath
herde vs, and bihold oure mekenes, and
traueyl, and anguysses;
8 and he hath lad
vs out of Egipt in a my&yogh;ti hoond, and in
an arme strei&yogh;t out, in greet drede, in
toknes,
9 and wondres, and brou&yogh;te into
this place; and hath taak to vs the loond
mylk and hony flowynge.
10 And therfor
nowe Y offre to thee the cheef of the
fruytis of the erthe that the Lord hath
&yogh;eue to me. And thow shalt leeue hem
in the si&yogh;t of the Lord thi God. And the
Lord thi God honourd,
11 thow shalt eete
in alle goodis that the Lord thi God
hath &yogh;eue to thee and to thin hows,
thow, and Leuytis, and comlyng, that is
with thee.
12 Whanne thow hast fulfillid
the tithe of alle thi fruytis, the &yogh;eer of
tithis the thridde, thow shalt &yogh;eue to Leuyte,
and comlynge, and faderles child,
and widewe, that thei eten `with ynne
thi &yogh;atis, and ben fulfillid.
13 And thou
shalt speke in the si&yogh;t of the Lord thi
God, Y haue brou&yogh;t that is halowid fro
myn hows, and haue &yogh;yue it to Leuyte,
and comlynge, and faderles child, and
widewe, as thow hast comaundid to me;
I haue not passid biside thin heestis, ne
haue for&yogh;et thi maundement.
14 Y haue
not eete of hem in my sorwe, ne haue
seuerd hem in eche vnclennes, ne haue
spendid of hem eny thing in thing of
deed coors. Y haue obeishid to the voyce
of the Lord my God, and haue doo alle
thingis that thow hast comaundid to me.
15 Bihold fro thi sanctuary, fro the hi&yogh;e
dwellynge place of heuens, and blesse
thow to thi puple Yrael, and to the loond
that thow hast &yogh;yue to vs, as thow hast
swore to oure fadres, to the loond mylk and
-- --
hony flowynge.
16 To day the Lord thi
God hath comaundid to thee, that thow
doo thes maundementis and domys, that
thow kepe and fulfil of al thin hert, and
of al thi soule.
17 The Lord thow hast
chosun to day, that he be to thee God,
and thow goo in the weies of hym, and
keep his cerymoyns, and heestis, and
domys, and obeish to his maundement.
18 Loo! the Lord hath chosen thee to day,
that thow be to hym a special puple, as
he hath spoken to thee, and thow keep
alle the heestis of hym;
19 and he shal
maak thee hi&yogh;er than alle the folkis, that
he hath maad of nou&yogh;t, into preysynge,
and name, and his glorye; that thow be
an holy puple of the Lord thi God, as he
hath spokun.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|