Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IV.
1 `Therfore drede we, britheren, lest
perauenture the biheeste of entrynge into
`his reste left, `or forsakyn, `ony of vs
be gessid, `or demed, for `to be aweye.
2 Forsoth it is told to vs, as and to hem.
And the word herd profitide not to hem,
not meynt to feith of these thingis that
thei herden.
3 Forsoth we that han byleuyd
schulen entre into rest, as he seyde,
As I swoor in my wraththe, if thei schulen
entre into my reste. And sotheli the
werkis maad parfyt fro the ordynaunce
of the world,
4 forsothe he seide thus in
sum place of the seueneth day, And God
restide in the seueneth day from alle his
werkis.
5 And in this eftsoone, If thei
schulen entre into my reste.
6 Therfore
for it leeueth, `or is ouer, summen for
to entre into it, and thei to whiche
the firste it is told, entriden not for her
vnbileue.
7 Eftsoone he termyneth sum day,
`To day, seyinge in Dauith, aftir so
moche of tyme; as it is bifore seid, To day
if &yogh;e han herd his vois, nyle &yogh;e hardne
&yogh;oure hertis, `as in the ilke wraththing.
8 Forwhi if Jhesus hadde &yogh;ouyn reste to
hem, he schulde neuere speke of othere
aftir that day.
9 Therfore `saboth halowing
is left to the peple of God.
10 Forsoth
he that entride into his reste, and he
-- --
restide of his werkis, as and God of
hise.
11 Therfore haste we for to entre into
that reste, that no man falle into the
same ensaumple of vnbileue.
12 Forsoth the
word of God is quyk, and spedy in
worching, and more `able for to perse
than al tweyne eggid swerd, and entrynge,
`or strecchinge, `til to departyng
of soule, `or lyf, and spirit, and of
ioyntouris and merewis, and departer,
`or demer, of thou&yogh;tis and intenciouns of
hertis.
13 And no creature is invisyble in
the si&yogh;t of God. Forsothe alle thingis
ben nakid and opyn to his y&yogh;en, to whom
a word to vs.
14 Therfore we hauynge a
greet bischop, that perside heuenes, Jhesu,
the sone of God, holde the confessioun,
`or knowleching, of oure feith.
15 Forsoth
we han not a byschop, that may not suffre
to gidere, `or haue compassioun, to oure
infirmytees, but temptid by alle thingis
for lyknesse, withoute synne.
16 Therfore
go we with trist to the trone of his grace,
that we gete mercy, and fynde grace in
couenable help.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
