CAP. XX.
1 Forsothe in the oon of the saboth,
that is, of the woke, Mary Mawdeleyn
`cam erly, whanne `derknessis weren &yogh;it,
`at the graue. And she sy&yogh; the stoon turned
a&yogh;en fro the graue.
2 Therfore she ran,
and cam to Symount Petre, and to anothir
disciple, whom Jhesu louyde, and seith to
-- --
hem, Thei han take the Lord fro the
graue, and we witen not, where thei han
put him.
3 Therfore Petre wente out, and
thilke othere disciple, and thei camen
to the graue.
4 Forsoth thei tweyne runnen
to gidere, and thilke other disciple
ran bifore sunner than Petre, and cam
first to the graue.
5 And whanne he hadde
ynbowyd him, he sy&yogh; the scheetis putt, nethelees
he entride not.
6 Therfore Symount
Petre cam suynge hym, and he entride
in to the graue, and he sy&yogh; the scheetis
putt,
7 and the sudarie that was on his
heed, not putt with the scheetis, but by
it silf wlappid in to o place.
8 Therfore
thanne and thilke disciple that cam first
to the graue, entride, and sy&yogh;, and bileuede.
9 Forsothe thei wisten not the scripture,
for it bihofte him for to ryse a&yogh;en fro
deede men.
10 Therfore the disciplis wenten
eft to hem selue.
11 Forsoth Marie stood
at the graue withoute forth wepynge.
Therfore while she wepte, sche bowide
hir, and biheld forth in to the graue.
12 And
she sy&yogh; twey angelis sittynge in whyt,
oon at the heed and oon at the feet, wher
the body of Jhesu was putt.
13 Thei seyn
to hir, Womman, what wepist thou? She
seid to hem, For thei han takun a wey my
lord, and I woot not, where thei han putt
him.
14 Whanne she hadde seid thes thingis,
she was turnyd a bak, and sy&yogh; Jhesu
stondinge, and wiste not for it was Jhesu.
15 Jhesu seith to hir, Womman, what wepist
thou? whom sekist thou? She gessinge
for he was a gardener, seith to him, Sire,
if thou hast takun him vp, seye to me,
where thou hast put him, and I schal
take him a wey.
16 Jhesu seith to hir,
Marie. She conuertid seith to him, Rabbony,
that is seid, maistir.
17 Jhesu seith
to hir, Nyle thou touche me, for I haue
not &yogh;it sty&yogh;ed to my fadir; forsothe go to
-- --
my britheren, and seye to hem, I stye
to my fadir and &yogh;oure fadir, to my God
and &yogh;oure God.
18 Mary Mawdeleyn cam,
tellinge to disciplis, For I sy&yogh; the Lord,
and thes thingis he seide to me.
19 Therfore
whanne euentid was in that day, oon
of the sabotis, and the &yogh;atis weren schitt,
where disciplis weren gederid, for the
drede of Jewis, Jhesu cam, and stood in
the myddel of hem, and seide to hem,
Pees to &yogh;ou.
20 And whanne he hadde seid
this thing, he schewide to hem hondis
and the syde; therfore the disciplis ioyeden,
the Lord seyn.
21 Therfore he seith
to hem eft, Pees to &yogh;ou; as the fadir
sente me, and I sende &yogh;ou.
22 Whanne he
hadde seid thes thingis, he blew ynne,
and seide, Take &yogh;e the Hooly Gost;
23 whos
synnes &yogh;e schulen for&yogh;yue, thei ben for&yogh;ouun;
and whos synnes &yogh;e `schulen withholde,
thei ben withholdun.
24 Forsothe
Thomas, oon of the twelue, that is seid
Didymus, was not with hem, whanne Jhesu
cam.
25 Therfore othere disciplis seiden,
We han seyn the Lord. Forsothe he
seide to hem, No but I schal se in his
hondis the ficching of naylis, and schal
sende my fyngris in to places of naylis,
and `I schal sende myn honde in to his
syde, I schal not bileue.
26 And aftir ei&yogh;te
dayes eft his disciplis weren with ynne,
and Thomas with hem. Jhesu cam, the
&yogh;atis schitt, and stood in the myddel, and
seide, Pees to &yogh;ou.
27 Aftirward he seith to
Thomas, Bryng yn hidur thi fyngur, and
se myn hondis, and bryng to thin hond,
and send in to my syde, and nyle thou
be vnbileueful, but feithful.
28 Thomas answeride,
and seide to him, My Lord and
my God.
29 Jhesu seith to him, Thomas,
-- --
for thou hast seyn me, thou bileuedist;
blessid ben thei, that sy&yogh;en not, and han
bileuyd.
30 Forsothe and `Jhesus dide manye
othere signes in the sy&yogh;t of his disciplis,
whiche ben not writun in this book.
31 Forsothe thes ben writun, that &yogh;e bileue,
for Jhesu is Crist, the sone of God, and
that &yogh;e bileuynge haue lyf in his name.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
