Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIII.
1 And al the multitude `risinge of hem,
ledden him to Pilat.
2 Forsoth thei bigunnen
to accuse him, seyinge, We han
founden this man turnynge vpsodoun
oure folk, and forbedinge tributis to be
&yogh;ouun to Cesar, and seyinge him silf to
be Crist king.
3 Forsothe Pilat axide him,
seyinge, Ert thou kyng of Jewis? And
he answeringe seide, Thou seist.
4 Forsothe
Pilat seide to the princes of prestis,
and to the cumpanyes of peple, I fynde
no thing of cause in this man.
5 And thei
woxen strengere, seyinge, He moueth `to
gidere the peple, techinge thorw al Judee,
bigynnynge fro Galilee til hidur.
6 Pilat
-- --
forsoth heeringe Galilee axide, if he were
a man of Galilee.
7 And as he knew that
he was of the power of Eroude, he
sente him a&yogh;en to Eroude; which and
he was at Jerusalem `in tho dayes.
8 Forsothe,
him seyn, Eroude ioyede ful myche;
for he was coueitinge of moche tyme to
se him, for he herde many thingis of
hym, and hopide to se sum myracle to
be don of him.
9 Sothli he axide him in
manye wordis; and he no thing answeride
to him.
10 Forsothe the princes of prestis
and the scrybis stooden, stedfastli accusinge
him.
11 Sothli Eroude with his oost
`dispiside him, and scornyde him clothid
with a whit cloth, and sente a&yogh;en to
Pilate.
12 And Eroude and Pilate weren
maad frendis in thilke day; forwhi `biforeto
thei weren enemyes to gidere.
13 Sothli the princes of prestis and the
magestratis of the peple clepid to gidere,
Pilat seide to hem,
14 &YOGH;e han offrid to me
this man, as turnynge awey the peple,
and lo! I axynge byfore &yogh;ou fynde no
cause in this man of thes thingis, in
whiche &yogh;e accusen him;
15 but nethir
Eroude, for I `a&yogh;ein sente `&yogh;ou to him,
and lo! no thing worthi of deeth is don
to him.
16 Therfore I schal delyuere him
amended.
17 Forsothe he hadde nede to
deliuere to hem oon by the feeste day.
18 Sothli al the cumpanye criede, seiynge,
Do him a wey, and deliuere `Barabas to
vs;
19 which was sent in to prison for sum
dissencioun maad in the citee, and for
mansleyng.
20 Forsoth eft Pilat spak to
-- --
hem, willinge to delyuere Jhesu.
21 And
thei vndircryeden, seyinge, Crucifie, crucifie
him.
22 Sothli the thridde tyme he
seide to hem, Sothli what of yuel hath
he don? I fynde no cause of deeth in
him; therfore I schal chastise hym, and
`I schal delyuere.
23 And thei contynueden
axinge with greete voices, that he schulde
be crucified; and the voyces of hem
woxen stronge.
24 And Pilat demyde her
axinge to be don.
25 Sothli he deliuerede
to hem him, that for mansleynge and
dissencioun was sent in to prisoun, whom
thei axiden; sothli he bitook Jhesu to
her wille.
26 And whanne thei ledden him,
thei took sum man, Symount of Sirenen,
comynge fro the toun, and thei puttiden
to him a cross to bere aftir Jhesu.
27 Sothli ther suede him moche cumpanye
of peple, and of wymmen that weileden,
and bymoornyden him.
28 Sothli Jhesu
turnyd to hem seide, Dou&yogh;tris of Jerusalem,
nyle &yogh;e wepe on me, but wepe &yogh;e
on &yogh;ou silf, and on &yogh;oure sones.
29 For lo!
dayes schulen come, in whiche it schal be
seid, Blessid be bareyn wymmen, and
wombis that han not gendrid, and the
teetis whiche han not &yogh;ouun souke.
30 Thanne thei schulen bigynne to seye to
monteyns, Falle &yogh;e doun on vs, and to
litle hillis, Hile &yogh;e vs.
31 For if thei don
`thes thingis in a grene tree, what schal
be don in a drye?
32 Sothli and othere
tweye wickide men weren led with him,
that thei schulde be slayn.
33 And aftir
that thei camen in to a place, which is
clepid of Caluarie, there thei crucifieden
him, and the theues, oon on the ri&yogh;thalf,
and `the tother on the left half.
34 Forsothe
Jhesu seide, Fadir, for&yogh;yue to hem, for
-- --
thei witen not what thei don. Forsothe
thei departinge his clothis, senten lottis.
35 And the peple stood abydinge; and the
princes scornyden him with hem, seyinge,
Othere men he made saf; make he
him silf saf, if `he is Crist, the chosun
of God.
36 Forsoth and kny&yogh;tis nei&yogh;ynge
scornyden him, and offriden vynegre to
him,
37 seyinge, If thou ert kyng of Jewis,
make thee saf.
38 Sothli and the `wrytinge
aboue was writun on him with `lettris
of Greek, of Latyn, and of Ebrew, This
is the kyng of Jewis.
39 Forsoth oon of
tho theues that hangiden, blasphemyde
him, seyinge, If thou ert Crist, make thi
silf saf and vs.
40 Sothli `the tothir answeringe,
blamyde him, seyinge, Nethir
thou dredist God, `that thou art in the
same dampnacioun?
41 And treuly we
iustly, for we han receyued worthi
thingis to dedis; sothli this `hath don
no yuel.
42 And he seide to Jhesu, Lord,
haue mynde on me, whanne thou `schalt
come in to thi kingdom.
43 And Jhesu
seyde to him, Treuli I seie to thee, this
day thou schalt be with me in paradys.
44 Sothly it was almost the sixte our, and
derknessis weren maad in al erthe til
to the nynthe our.
45 And the sunne was
maad derk, and the veyl of the temple
was kitt the myddel.
46 And Jhesu cryinge
with greet voys, seide, Fadir, in to
thi hondis I bitake my spirit. And he
seyinge thes thingis, sente out the spirit,
`ether diede.
47 Forsothe centurio seynge
the thing that was don, glorifiede God,
seyinge, Verily this man was iust.
48 And
al the cumpany of hem that weren there
-- --
to gidere at this spectacle, and sy&yogh;en tho
thingis that weren don, smytinge her
brestis turneden a&yogh;eyn.
49 Forsoth al his
knowen stooden a fer, and wymmen that
sueden him fro Galilee, seynge thes thingis.
50 And lo! a man, Joseph bi name, that was
a decurioun, ether hauynge ten vndir him,
a good man and iust, of Aramathie, `a
citee of Judee,
51 he consentide not to the
counceil and dedis of hem; which and
he abood the kingdom of God.
52 He cam
ny&yogh; to Pilat, and axide the body of Jhesu,
53 and wlappide it don doun in a lynnen
cloth, and puttide him in a graue hewun,
in which not &yogh;it ony man was put.
54 And
the day was `the makinge redy of pask,
and the saboth bygan to schyne.
55 Sothli
the wymmen suynge, that camen with
him fro Galilee, sy&yogh;en the graue, and hou
his body was put.
56 And thei turnynge
a&yogh;en, maden redy swete spices, and oynementis;
and sothli in the saboth thei restiden,
vp the comaundement.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
