1   Forsothe in oon of the woke ful erly thei camen to the graue, bryngynge swete spicis, whiche thei hadden maad redy. 2   And thei founden the stoone turned a wey fro the graue. 3   And thei gon yn, founden not the body of Jhesu. 4   And it was don, while thei weren astoneyed in thou&yogh;t of this thing, loo! twey men stooden bisydis hem in `cloth schynynge. 5   Sothli whenne thei dredden, and bowiden her semelant in to erthe, thei seiden to hem, What seke &yogh;e the lyuynge with deede men? 6   He is not here, but he hath rise. Haue &yogh;e mynde, how he spak to &yogh;ou, whanne `&yogh;it he was in Galilee, 7   seyinge,

For it bihoueth mannis sone be bitakun in to hondis of synful men, and to be crucified, and the thridde day to ryse a&yogh;en. 8   And thei bithou&yogh;ten on his wordis. 9   And thei gon a&yogh;en fro the graue, telden alle thes thingis to the enleuene, and to alle othere. 10   Forsothe `Mary Mawdeleyn was, and Joone, and Marye of James, and othere wymmen that weren with hem, that seiden thes thingis to apostlis. 11   And thes wordis weren seyn bifore hem as madnesse, `ether errour, and thei bileueden not to hem. 12   Forsothe Petre rysinge, ran to the graue; and he bowynge doun, sy&yogh; the lynnen clothis put aloone. And he wente, wondrynge with him silf `this thing that was don. 13   And lo! tweyne of hem wenten in that day to a castel, that was fro Jerusalem in space of sixty furlongis, by name Emaws. 14   And thei spaken to gidere of alle thes thingis that hadden falle. 15   And it was don, while thei talkiden, and sou&yogh;ten with hem silf, and Jhesu him silf nei&yogh;ynge, wente with hem. 16   Sothli her y&yogh;en weren holdun, lest thei knewen him. 17   And he seide to hem, Whiche ben thes wordis, that &yogh;e speken to gidere goynge, and &yogh;e ben sorwful? 18   And oon answeringe, to whom the name was Cleofas, seide `to him, Thou aloone ert a pilgrym of Jerusalem, and hast thou not knowe, what thingis ben don in it in thes dayes? 19   To which he seide, Whiche? And thei seyden to him, Of Jhesu of Nazareth, that was a man prophete, my&yogh;ti in work and word bifore God and al the peple; 20   and hou the hi&yogh;este prestis and oure princes bitoken him in to dampnacioun of deeth, and crucifieden

him. 21   Forsoth we hopiden, for he `schulde a&yogh;en bye Israel. And now `in alle thingis the thridde day is to day, that thes thingis ben don. 22   But and sum wymmen of oure maden vs a ferd, whiche bifore the li&yogh;t weren at the graue; 23   and his bodi not foundun, thei camen, seyinge, `that thei sy&yogh;en a si&yogh;t of aungels, whiche seyn, `that he lyueth. 24   And sum men of oure wenten to the graue, and thei founden so as the wymmen seiden, but thei founden not him. 25   And he seyde to hem, A! foolis, and slowe of herte for to bileue in alle thingis whiche the prophetis han spoke. 26   Where it bihofte not Crist to suffre `thes thingis, and so for to entre in to his glorie? 27   And he bigynnynge at Moyses and alle prophetis, expownede to hem in alle scripturis, whiche weren of him. 28   And thei camen ny&yogh; to the castel, whidur thei wenten. And he made cuntenaunce him to go ferthere. 29   And thei constreyneden him, seyinge, Dwel with vs, for it drawith to ny&yogh;t, and the day is now bowid doun. And he entride with hem. 30   And it was don, while he restide with hem, he took bred, and blesside, and brac, and dresside to hem. 31   And the y&yogh;en of hem weren opened, and thei knewen him; and he vanyschide fro her y&yogh;en. 32   And thei seiden to gidere, Wher oure herte was not brennynge in vs, while he spac in the weye, and openyde `scripturis to vs? 33   And thei risinge in the same our, wenten a&yogh;en in to Jerusalem, and thei founden enleue gederid to gidere, and hem that

weren with hem, 34   seyinge, For the Lord roos verily, and aperide to Symount. 35   And thei telden what thingis weren don in the weye, and hou thei knewen him in brekynge of breed. 36   Forsothe while thei spaken thes thingis, Jhesus stood in the myddel of hem, and seide to hem, Pees to &yogh;ou; I am, nyle &yogh;e drede. 37   Sothli thei troublid and agast, gessiden hem to se a spirit. 38   And he seide to hem, What ben &yogh;e troublid, and thou&yogh;tis sty&yogh;en vp in to &yogh;oure hertis? 39   Se &yogh;e myn hondis and my feet, for I my silf am. Feele &yogh;e, and se &yogh;e; for a spirit hath not fleisch, and boonys, as &yogh;e seen me for to haue. 40   And whanne he hadde seyd this thing, he schewide hondis and feet `to hem. 41   Forsoth &yogh;it hem not bileuynge, and wondringe for ioye, he seyde, Han &yogh;e ony thing here that schal be etun? 42   And thei offriden to him a part of a fysch roostid, and a coomb of hony. 43   And whanne he hadde etun bifore hem, he takynge the relyfs, &yogh;af to hem. 44   And he seyde to hem, Thes ben the wordis whiche I spak to &yogh;ou, whanne I was &yogh;it with &yogh;ou; for it is nede that alle thingis `be fillid, whiche ben writun in the lawe of Moyses, and in prophetis, and in salmes, of me. 45   Thanne he openyd witt to hem, that thei schulde vndirstonde scripturis. 46   And he seyde to hem, For thus it is writun, and thus it bihofte Crist to suffre, and to ryse a&yogh;en fro deed men in the thridde day; 47   and penaunce and remyssioun of synnes to be prechid in his name to alle folkis, men bigynnynge at Jerusalem. 48   Forsothe &yogh;e ben witnessis of thes thingis. 49   And I sende the biheeste of my fadir in to &yogh;ou; sothli sitte &yogh;e in the citee, til that &yogh;e be clothid with vertu fro an hi&yogh;. 50   Forsoth he ledde

hem forth in to Bethanye, and, his hondis reysid, he blesside hem. 51   And it was don, while he blesside hem, he departide fro hem, and was borun in to heuene. 52   And thei worshippinge wente a&yogh;en in to Jerusalem with greet ioye; 53   and weren euere in the temple, heryinge and blessinge God. Here endith the gospel of Luk, and bigynneth the prolog of John.

Previous section