Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XV.
1 Thanne scribis and Pharisees `camen
ni&yogh; to hym fro Jerusalem,
2 seyinge, Whi
thi disciplis ouerpassen, `or breken, the
tradiciouns, `or statutis, of elder men? for
thei washen nat hondis, whenne thei eten
breed.
3 Sothely he answerynge seith to
hem, And `whi and &yogh;e breken the maundement
of God for &yogh;oure tradicioun? For
whi God seide,
4 Honoure thi fadir and
thi modir, and he that cursith fadir or
modir, dye he by deth.
5 But &yogh;e seyn, Who
euere `shal saye to fadir or modir, What
euere &yogh;ifte is of me, it shal profite to thee;
6 and he hath not worshipid his fadir or
modir; and &yogh;e han made the maundement
of God voide, `or idyl, for &yogh;oure
tradicioun.
7 Ipocritis, Ysay, the prophete,
propheciede wel of &yogh;ou,
8 seyinge, This
peple honoureth me with lippis, forsothe
her herte is fer fro me;
9 trewly thei worshipen
me with outen cause, techynge the
doctrines and maundements of men.
10 And
the cumpanyes `of peple clepid `to gidre
to hym, he seide to hem, Heere &yogh;e, and
vnderstonde.
11 Nat that thing that entrith
in to the mouth, defoulith a man; but
that thing that cummeth forth fro the
-- --
mouth, defoulith a man.
12 Thanne his
disciplis `cummynge ni&yogh; seiden to hym,
Wost thou, that, this word herd, Pharisees
ben sclaundrid?
13 And he answerynge
seith, Euery plantynge, the whiche my
fadir of heuen hath nat plantid, shal be
drawen vp by the roote.
14 Suffre &yogh;e hem;
thei ben blynde, `and lederis of blynde
men. Sothely &yogh;if a blynd man &yogh;eue ledynge
to a blynd man, bothe fallen doun in
to the diche.
15 Forsothe Petre answerynge
saide to hym, Expoun to vs this parable.
16 And he seide, &YOGH;it and &yogh;e ben without vnderstondyng?
17 Wher &yogh;e vnderstonde nat,
that al thing that entrith in to the mouth,
goth in to the wombe, and is sent out in
to the goyng awey?
18 But tho thingis that
cummen forth fro the mouth, gon out of
the herte, and tho thingus defoulen a man.
19 For of the herte `gon out yuel thou&yogh;tis,
mansleayngis, auoutries, fornicaciouns,
theftis, `fals witnessis, blasfemyes.
20 These
thingis it ben that defoulen a man; sothely
for to ete with hondis vnwashen, defouleth
not a man.
21 And Jhesus gon out fro
thennys, wente into parties of Tyre and
Sidon.
22 And loo! a womman of Canane
gon out of the costis, cryede, seyinge to
hym, Lord, the son of Dauid, haue mercye
on me; my dou&yogh;ter is yuel traueilid of a
deuyl.
23 The whiche answerid nat to hir
o word. And his disciplis `cummynge
to preyeden hym, seyinge, Leeue thou
hire, for she crieth after vs.
24 Forsothe he
answerynge seith, I am nat sent, no but
to the sheep of the hous of Yrael that
perishiden.
25 Bot she came, and wirshipide
hym, seyinge, Lord, help me.
26 The whiche
answerynge seith, It is nat good for to
take the breed of sonys, and sende to
-- --
houndis.
27 And she seide, &YOGH;he, Lord; forwhi
and the litel whelpis eten of the
crummys, that fallen doun fro the bord of
her lordis.
28 Thanne Jhesus answeringe
seith to hir, O! thou womman, thi feith
is grete; be it don to thee, as thou wolt.
And hir dou&yogh;ter was heelid fro that hour.
29 And whenne Jhesus hadde passide thennes,
he came bisidis the see of Galilee. And he
steiynge in to an hyl, sat there.
30 And
many cumpanyes `camen ni&yogh; to hym, hauynge
with hem doumbe men and crokid,
feble and blynde, and many othir; and
castiden hem doun at his feet. And he
helide hem,
31 so that the cumpanyes wondriden,
seeynge doumbe men spekynge,
and crokid goynge, blynd men seeynge;
and thei magnyfieden God of Yrael.
32 Sothely
Jhesus, his disciplis gedered to gider,
seide, I haue rewthe of the cumpany `of
peple, for now `the thridde day thei
dwellen still with me, and thei han not
thing whiche thei shulen ete; and Y `wole
nat leeue hem fastynge, lest thei failen in
the weye.
33 And the disciplis seyen to hym,
Therfore wherof so many loouys to vs in
desert, that we fulfille so grete a cumpanye
`of peple?
34 And Jhesus seith to
hem, Hou many loouys han &yogh;ee? And thei
seiden, Seuene, and a few smalle fishis.
35 And he comaundide to the cumpany, that
thei shulde sitt to the mete vpon the
erthe.
36 And he takynge seuen looues, and
fishis, and doynge thonkyngis, brak, and
&yogh;aue to his disciplis; and disciplis &yogh;auen
to the peple.
37 And alle eten, and weren
fulfillid, and thei token that that was
ouer of relyues, seuene lepis fulle.
38 Forsothe
thei that eten weren foure thousand
of men, with outen litil children and
-- --
wemmen.
39 And, the cumpanye `of peple
laft, he styede vp in to a boot, and cam
into the coostis of Magedan.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
