Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVI.
1 And Pharisees and Saduceis temptynge
him `camen ni&yogh; to hym, and preiden hym
for to shewe to hem a tokene fro heuene.
2 And he answerynge seith to hem, The
eeuenynge maad, &yogh;e seien, It shal be
cleer, for the heuene is `lijk to reed;
3 and
`the morwe, To day tempest, for heuen
shyneth `heuy, or sorwful.
4 Therfore &yogh;e
`han knowe to deme wisely the face of
heuen, but &yogh;e mowen not wite the tokenys
of tymes. The yuel generacioun and avowtrer
sekith a tokne; and a tokene shal nat
be &yogh;ouen to it, no but the tokne of Jonas,
the prophete. And, hem forsaken, he
wente awey.
5 And whenne his disciplis
camen ouer the see, thei for&yogh;aten for to
take loouys.
6 The whiche seide to hem,
Beholde &yogh;e, and beth war of the sourdow&yogh;
of Pharisees and Saducees.
7 And thei
thou&yogh;ten amonge hem, seiynge, For we
han nat taken loouys.
8 Forsothe Jhesus
witynge seide to hem, What thenken &yogh;e
amonge &yogh;ou of litil feith, for &yogh;e han nat
loouys?
9 &YOGH;it &yogh;e vndirstonden nat, nether
han mynde of fyue loouys in to fyue thousand
of men, and hou many cofyns &yogh;e
token?
10 trewly nether of seuen loouys in
to four thousand of men, and hou many
lepis &yogh;ee token?
11 Whi vndirstonden &yogh;e
nat, for I seide nat to &yogh;ou of breed, Be
&yogh;e war of sourdow&yogh; of Pharisees and of
Saducees?
12 Thanne thei vnderstoden, that
he seide nat to be war of sourdow&yogh; of
loouys, bote of the techynge of Pharisees
and Saducees.
13 Sothely Jhesus came in to
the parties `of Cesarie of Philip, and
-- --
axide his disciplis, seyinge, Whom seyn
men to ben mannes sone?
14 And thei seiden,
Summe Joon Baptist; other forsothe Hely;
`but other Jeremye, or oon of the
prophetis.
15 Jhesus seith to hem, Sothely
whom seien &yogh;e me to be?
16 Symon Petre
answerynge seide, Thou art Crist, the sone
of `God lyuynge.
17 Forsothe Jhesus answerynge
seide to hym, Blessid art thou,
Symon Bariona, that is, the sone of culuer;
for flesh and blood shewide nat to
thee, but my fadir that is in heuenes.
18 And Y seye to thee, for thou art Petre,
and vpon this stoon I shal bilde my
churche, and the &yogh;atis of helle shulen nat
han mi&yogh;t, `or strengthe, a&yogh;eins it.
19 And
to thee I shal &yogh;eue the keies of the kyngdam
of heuenes; and what euer thou shalt
bynde vpon erthe, shal be bounden and
in heuenes; and what euer thou shalt
vnbynde vpon erthe, shal be vnbounden
and in heuenes.
20 Thanne he comaundide
to his disciplis, that thei shulden seie to
no man, that he was Crist.
21 Fro that
tyme Jhesus bygan for to shewe to his
disciplis, that it byhouith hym to go to
Jerusalem, and suffre many thingus of the
eldris, and scribis, and princis of prestis;
and be sleyn, and the thridde day ryse
vp a&yogh;ein.
22 And Petre, takynge hym to,
began for to blame hym, seyinge, Fer be
it fro thee, Lord; this thing shal not be
to thee.
23 The whiche, turnyd, seide to
Petre, Sathanas, go after me; thou art
sclaundre to me; for thou `sauerist nat, or
vndirstondist nat, tho thingis that ben of
God, but tho thingis that ben of men.
24 Thanne Jhesus seide to his disciplis, &YOGH;if
eny man wole cume after me, denye he
hym self, and take his crosse, and sue me;
-- --
for he that wole make `his soule saaf,
25
`that is, his lyf, shal lese it; forsothe he
that shal lese his soule, `that is, his lyf,
for me, shal fynde it.
26 Sothely what profitith
it to a man, `&yogh;if he wynne al the
world, trewly he suffre peyrynge of his
soule? or what chaungynge shal a man
&yogh;eue for his soule?
27 For mannes sone `is
to come in glorie of his fadir, with his
angelis, and thanne he shal &yogh;elde to euery
man aftir his workis.
28 Treuly I seie to
&yogh;ou, `there ben summe of men stondynge
heer, `the whiche shul nat taaste deth,
til thei seen mannys sone cummynge in
his kyngdom.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
