Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XIV.
1 In that tyme Eroude `tetrarcha, that
is, prince of the fourthe part, herde the
fame of Jhesu;
2 and seide to his children,
This is Jon Baptist, he hath risen fro
dead, and therfore vertues worchen in
hym.
3 Forsothe Eroude helde Joon, and
bounde hym, and putte him in to prisoun
for Erodias, the wif of his brother.
4 For
Joon saide to hym, It is nat leful to thee
for to haue hir.
5 And he willynge to
-- --
slea hym, drede the peple; for thei hadden
hym as a prophete.
6 Forsothe in the day of
Eroudis birthe, the dou&yogh;ter of Erodias
leepte in the mydil, and pleside to
Eroude.
7 Wherfore with an ooth he byhi&yogh;te
for to &yogh;eue to hir, what euer thinge
she hadde axid of hym.
8 And she bifore
monestid, `or warnyd, of hir modir, seith,
&YOGH;eue thou to me hidir the hed of Joon
Baptist in a dische.
9 And the kyng was sorowful,
but for the ooth, and for hem that
seeten to gidre at the mete, he comaundide
to be &yogh;ouen.
10 And he sente, and bihedide
Joon in the prisoun.
11 And his heed is
brou&yogh;t to in a dische, and it is &yogh;ouen to
the whenche, and she bare it to hir modir.
12 And his disciplis `cummynge to token his
body, and biryeden it; and thei cummynge
tolden to Jhesu.
13 The whiche
thing when Jhesus hadde herd, he went
fro thennus `in to a boot, in to desert
place besidis. And whenne the cumpanyes
`of peple hadden herd, thei folowiden
hym and on the feet fro citees.
14 And
Jhesus, goynge out, saw a greet multitude
`of peple, and hadde rewthe of hem, and
heelide the sike men of hem.
15 Sothely
the euenynge maad, his disciplis `camen
ni&yogh; to him, seiynge, The place is desert,
and the hour hath now passid; leeue thou
the cumpanyes `of peple, that thei, goynge
in to castels, bigge meetis to hem.
16 Forsothe
Jhesus seide to hem, Thei han nat
neede to go; &yogh;eue &yogh;e to hem for to ete.
17 Thei answeriden, We han nat here, no
but fiue looues and two fishis.
18 The
whiche seith to hem, Brynge &yogh;ee hem
hidir to me.
19 And when he hadde comaundid
the cumpanye for to sitte to
-- --
mete on hay, fyue looues and two fishis
taken, he byholdynge in to heuen, blesside,
and brak, and &yogh;aue to his disciplis;
sothely the disciplis &yogh;auen to the cumpanyes.
20 And alle eeten, and weren fulfillid.
And thei token the relifis of broken
gobetis, twelue cofyns ful.
21 Forsothe the
noumbre of men etynge was fyue thousand
of men, out taken wemmen and litel
children.
22 And anon Jhesus compellide,
`or comaundide, the disciplis for to `go
vp in to a boot, and go bifore hym ouer
the see, til that he lefte the cumpanyes.
23 And the cumpanyes left, he stei&yogh;ide vp
in to an hill aloone for to preye. Sothely
the euenyng maad, he was there aloone.
24 Sothely the boot in the mydil see was
throwen with wawis, forsothe the wynd
was contrarie.
25 But in the fourthe wakyng
of the ni&yogh;t, he came to hem walkynge
aboue the see.
26 And thei, seeynge hym
walkynge aboue the see, weren distourblid,
seyinge, For it is a fantum; and for
drede thei cryeden.
27 And anoon Jhesus
spac to hem, sayinge, Haue &yogh;e trust, I
am; nyl &yogh;e dreede.
28 Sothely Petre answerynge
seide, Lord, &yogh;if thou art, comaunde
me to cume to thee vpon the
watris.
29 And he seith, Cume thou. And
Petre goynge doun fro the bote, walkide
on the wateris for to cume to Jhesu.
30 Trewly he, seeynge a strong wynde, `was
aferde; and whan he bygan for to be
drenchid, he cryede, seyinge, Lord, make
me saaf.
31 And anoon Jhesus, holdynge
forth the hond, cau&yogh;te hym, and seith to
hym, Thou of litil feith, whi hast thou
doutid?
32 And whenne he hadde stied vp
in to the boot, the wynde cesside.
33 Sothely
thei, that weren in the boot, camen, and
-- --
worshipiden hym, seyinge, Veryly, thou art
Goddis sone.
34 And whenne he had passide
ouer the see, thei camen in to the lond
of Genesar.
35 And whenne men of that
place hadden knowen hym, thei senten
into al that cuntree; and thei offriden to
hym al hauynge yuel.
36 And thei preyiden
hym, that thei shulden touche ether the
hem of `the clothing `of hym; and who
euer touchiden ben maad saaf.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
