1   And the Lord spak to Moyses in the mownt of Synay, 2   seiynge, Spek to the sones of Yrael, and thow shalt seye to hem, Whanne &yogh;e weren in goon into the loond that I shal &yogh;yue to &yogh;ow, `halowe &yogh;e the holiday of the Lord; 3   six &yogh;eer thow shalt sowe thi feelde, and six &yogh;eer thou shalt kytte thi vyn, and geder the fruytis of it; 4   the seuenthe forsothe &yogh;eer of the loond shal be the saboth of the restynge of the Lord; feelde thow shalt not sowe, and vyn thow shalt not kitte, 5   thingis that the erthe frely bryngith forth thow shalt not reepe, and grapes of thi first fruytis and vyndage thou shalt not gedere; the &yogh;eer forsothe it is of the restynge of the loond; 6   but thei shulen be to

&yogh;ow into meet, to thee, and to thi seruauntis, to thin handmayde, and to thin hyryd man, and to the comlyng that pilgrimagith anentis thee; 7   to hous beestis and thi feelde beestes, alle thingis that growen shulen &yogh;yue meete. 8   And thow shalt noumbre to thee seuen wekes of &yogh;eerys, that is, seuen sithes seuen, the whiche togidere maken nyn and fourty &yogh;eer; 9   and thow shalt sowne with trompe the seuenthe moneth, the tenthe day of the moneth, in the tyme of doyng mercy, in al &yogh;oure loond. 10   And thow shalt halowe the fyftith &yogh;eer, and clepe it for&yogh;ifnesse to alle the dwellers of thi loond; he is forsothe the iubilee; a man shal turne a&yogh;en to his possessioun, and eche shal turne a&yogh;en to his before hadde meyne, 11   for the iubilee it is, and the fyftethe &yogh;eer. &YOGH;e shulen not sowe, ne reepe the free growynge thingis in the feelde, and the first fruytis of the vyndage &yogh;e shulen not gedere, for the halowynge of the iubile; 12    but anone offryd &yogh;e shulen eete; 13   the &yogh;eer of iubilee alle goo thei a&yogh;en to her possessiouns. 14   Whanne thow shalt selle eny thing to thi cyteseyn, other bigge of hym, ne peire thow thi brothir, but aftir the noumbre of the &yogh;eeris of iubilee thow shalt bigge of hym, 15   and after the noumbre of fruytis he shal selle to thee. 16   As myche as mo &yogh;eeris dwellen after the iubilee, so myche and the prijs shal creese, and as myche as lasse of tyme thow shalt nowmbre, so myche lasse and the biggynge shal coste; the tyme forsothe of fruytis he shal selle to thee. 17   Nyle &yogh;e wrongfully traueyl &yogh;oure men of o lynage, but echon drede his God; for Y the Lord &yogh;oure God. 18   Do &yogh;e myn heestis and domes, kepith and fulfille &yogh;e hem, that &yogh;e mowen dwelle in the loond with outen eny drede, 19   and the erthe brynge forth to &yogh;ow his fruytis, the whiche &yogh;e eten vnto fulfillynge,

dredynge the feersnes of no man. And if &yogh;e seyn, 20   what shulen we eete the seuenthe &yogh;eer, if we sowen not, ne gadren oure fruytis? 21   Y shal &yogh;yue my blessynge to &yogh;ou the sixte &yogh;eer, and it shal make the fruytis of three &yogh;eer; 22   and &yogh;e shulen sowe the ei&yogh;tthe &yogh;eer, and &yogh;e shulen eete oolde fruytes vnto the nynthe &yogh;eer; to the tyme that newe be growen &yogh;e shulen eete oolde. 23   The loond forsothe shal not be solde `in to with outen ende, for myn it is, and &yogh;e comlingis and myn erthe tyliers ben; 24   wherfor al the regioun of &yogh;oure possessioun vndur condicioun of a&yogh;enbiggyng shal be solde. 25   If thi brother maad pore, selle his litil possessioun, and he wole, the nygh kyn of hym may a&yogh;enbigge that that he solde; 26   if forsothe he haue noon nei&yogh;bore, and he mowe fynde the pryse to a&yogh;enbigge, 27   the fruytis shulen be countid fro that tyme that he solde, and that that is laft &yogh;eelde he to the bigger, and so he shal resseyue his possessyoun. 28   And if his hoond fynde not, that he &yogh;eelde the prijs, the bigger shal haue that he bou&yogh;te, vnto the iubilee &yogh;eer; in that forsothe &yogh;eer al biggyng shal turne a&yogh;en to the lord, and to the rather hauer. 29   Who sellith his hows, with ynne the walles of the cytee, he shal haue leue of biggynge a&yogh;en to the tyme that o &yogh;eer be fulfillid; 30   and if he bigge not a&yogh;en, and the cercle of the &yogh;eer were ouer caste, the bigger shal welde it, and his aftercomers into with outen ende, and it may not be bou&yogh;t a&yogh;en, also in the iubilee. 31   If forsothe in a town that hath no wallis were the hows, thur&yogh; ri&yogh;t of the feeldes it shal be sold; if forsothe it were not a&yogh;enbou&yogh;t in the iubilee, it shal turne a&yogh;en to his lord. 32   The hows of the Leuytes, that ben in the cytees, euermore mowen be a&yogh;enbou&yogh;t; if thei weren not a&yogh;enbou&yogh;t, 33   in the iubilee thei shulen turne a&yogh;en to the

lordes; for the houses of cytees of Leuytes ben for the possessiouns among the sones of Yrael; 34   the suburbes forsothe of hem thei shulen not selle, for euerlastynge possessioun it is. 35   If thi brother were maad pore, and feble in hoond, and thow resseyuest hym as a comlyng and a pilgrym, 36   and lyueth with thee, ne take thow of hym vsurys, ne more ouer than thow hast &yogh;ouun; dreed thi God, that thi brother mowe lyue anentis thee. 37   Thi money thow shalt not &yogh;yue to him to vsure, and of the fruytes ouer aboundaunce thou shal not axe; 38   Y the Lord &yogh;our God, that haue ladde &yogh;ou out of the lond of Egipte, that I &yogh;yue &yogh;ow the loond of Chanaan, and that Y were &yogh;oure God. 39   If thur&yogh; porenesse compellid, thi brother selle hym silf to thee, thow shalt not oppresse hym thur&yogh; thraldom of seruauntis, 40   but as an hiryd man and a dweller he shal be; vnto the iubilee &yogh;eer he shal worche anentis thee, 41   and aftirward he shal goo out with his free children, and turne a&yogh;en to the kyn, and to the possessioun of his fadres. 42   Forsothe thei ben my seruauntis, and Y haue ladde hem out of the loond of Egipte; thei shulen not be sold bi condiciouns of thralles; 43   ne ouer traueyle thou him bi thi power, but drede thow thi Lord. 44   Thral and `boond womman ben to &yogh;ow of the naciouns that ben in &yogh;oure enuyroun, 45   and of the comlynges that pilgrimagen anentis &yogh;ow, other that of hem weren bore in &yogh;oure loond; thes &yogh;e shulen haue seruauntis, 46   and thur&yogh; ri&yogh;t of erytage &yogh;e shulen ouerleeuen hem to the after comers, and &yogh;e shulen welde hem with outen ende; &yogh;oure forsothe britheren, the sones of Yrael, &yogh;e shulen not oppresse bi power. 47   If anentis &yogh;ow the hoond of the comlyng and of the pilgrym wax greet, and thi brother bicome pore, selle him silf to hym, or to

eny of the lynage of hym, 48   after the selling he may be a&yogh;enbou&yogh;t; who so wole of his britheren, bigge he hym; 49   and the fadres brother, and the fader brother sone, and the cosyn, and the alye. If forsothe and he mowe, a&yogh;enbie he hym silf, 50   noumbred oonli the &yogh;eeris fro the tyme of his sillynge vnto the iubilee &yogh;eer; and the money with the which he was soold, after the noumbre of &yogh;eeris, and thur&yogh; resoun of an hirid man rekened. 51   If there were many &yogh;eris that leeuen vnto the iubilee, and after that he shal &yogh;eelde the prijs; 52   if fewe, he shal leye resoun with hym after the noumbre of &yogh;eeres; 53   and he shal &yogh;eelde to the bigger that that is laft of the &yogh;eeris, in the whiche before he seruede, the medis with ynne rekenyd; he shal not traueil hym violentlich in thi si&yogh;t. 54   And if bi that he may not be a&yogh;eynbou&yogh;t, the iubilee &yogh;eer he shall goon out with his free children; 55   myn forsothe seruauntis ben the sones of Yrael, the whiche Y haue ladde out of the loond of Egipte; I the Lord &yogh;oure God.

Previous section

Next section