Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIV.
1 And the Lord spak to Moyses, seiynge,
Comaund to the sones of Yrael,
2 that thei
bryngen to thee oyle of olyues, moost
-- --
pure, and bry&yogh;t, to the lanternes to ben
3 tende contynueli with oute the veyle of
witnessynge, in the tabernacle of the
boond of pees; and Aaron shal sette hem
fro euen vnto morwen before the Lord,
thur&yogh; heriynge and ryte perpetuel in &yogh;oure
generaciouns;
4 vpon the moost clene candilstik
thei shulen be sett euermore in
the si&yogh;t of the Lord.
5 Thow shalt take
forsothe tried floure, and thow shalt baak
of it twelue looues, the whiche echon shal
haue two dymes,
6 of whom thou shalt sette
syx anentis other six, vpon the moost
clene bord before the Lord;
7 and thow
shalt putt on hem ensence moost bri&yogh;t,
that the breed be into mynde of the offrynge
of the Lord;
8 bi eche holi day thei
shulen be chaungid before the Lord, takne
of the sones of Yrael thur&yogh; euerlastynge
boond of pees;
9 and thei shulen be of Aaron
and his sones, that thei eten hem in
holy place, for holy of halowes it is, of
the sacrifices of the Lord, thur&yogh; perpetuel
ri&yogh;t.
10 Loo! forsothe a sone goon out of a
womman of Yrael, that beer of an Egipcyen
man, amonge the sones of Yrael,
hath streuen in tentis with a man of
Yrael,
11 and whanne he hadde blasfemyd
the name of the Lord, and hadde cursid
to hym, is brou&yogh;t forthe to Moyses; and
the moder of hym was clepid Salumyth,
the dou&yogh;ter of Dabry, of the lynage of
Dan;
12 and thei puttiden hym in to prisoun,
to the tyme that thei knewen what
the Lord comaundide.
13 The which spak
to Moyses,
14 seiynge, Leed thow out the
blasfeme out of the tentis, and putt alle
that herden her hoonden vpon his heed,
and al the puple stone hym.
15 And to the
sones of Yrael thou shalt speke, The man
that cursith to his God, shal bere his
synne,
16 and he that blasfemeth the name
of the Lord, thur&yogh; deth die he; al the
-- --
multitude of the puple with stonus shal
throwe hym down; whether he were cyteseyn
or pilgrym that blasfemeth the name
of the Lord, thur&yogh; deth dye he.
17 He that
smytith and sleeth a man, thur&yogh; deth die
he;
18 he that smyteth a beeste, &yogh;eeld he
another of the same kynde, that is, lijf
for lijf.
19 He that wrongfuli &yogh;yueth a
wemme to eny of his cyteseyns, as he
hath doon, so be it do to hym;
20 brusur for
brusur, eye for eye, tooth for tooth he
shal &yogh;eelde; what maner of wemme he
wrongfuli &yogh;yueth, sichon be he constreyned
to suffre.
21 He that smytith a beeste,
&yogh;eeld he another; he that smytith a man,
be he punyshid.
22 Euen doom be there
among &yogh;ow, whether pilgrime or cyteseyn
synne, for I am the Lord &yogh;oure God.
23 And Moyses spak to the sones of Yrael,
and thei brou&yogh;ten hym forthe that blasphemede
out of the tentis, and thei beren
hym down with stonus. And the sones
of Yrael diden, as the Lord comaundide
to Moyses.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
