Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. V.
1 Now thou, dou&yogh;ter of the theef, shalt
be distruyed; thei puttiden on vs byseegyng,
in a &yogh;erd thei shuln smyte the cheeke
of the iuge of Yrael.
2 And thou, Bethlem
Effrata, art litil in the thousandis of
Juda; of thee shal gon out to me, whiche
is lordshiper in Yrael; and the goyng out
of hym fro the bygynnyng of dais of
euerlastyngnesse.
3 For this thing God
shal &yogh;eue hem vn to tyme in whiche the
traueilynge of chijld shal bere chijld, and
the relikis of his bretheren shuln be conuertid
to the sonys of Yrael.
4 And he
shal stonde, and shal feede in strengthe
of the Lord, in the hei&yogh;t of the name of
the Lord his God; and thei shuln be conuertid,
for now he shal be magnyfied vn
to the termes of al erthe.
5 And this shal
be pees, whanne Assirius shal cum in to
oure lond, and whanne he shal trede in
oure housis; and we shuln reyse on hym
seuen sheperdis, and ei&yogh;t primatis, or
first men in dignyte.
6 And thei shuln
feede the lond of Assur in swerd, and
-- --
the lond of Nembroth in speris of hym;
and he shal delyuere vs fro Assur,
whanne he shal cum in to oure lond,
and whanne he shal treede in oure
coostis.
7 And relikis of Jacob shuln be
in the mydil of many peplis, as dewe of
the Lord, and as droppyngis on erbe,
whiche abydith not man, and shal not
abyde the sonys of men.
8 And relikis of
Jacob shuln be in heithen men, in the
mydil of many peplis, as a lyoun in
bestis of woddis, and as whelpe of lyoun
rorynge in flockis of smale beestis;
whiche whan shal passe, and defoule,
and take, ther is not that shal delyuere.
9 Thin hond shal be reysid on thin enmyes,
and alle thin enmyes shuln perishe.
10 And it shal be, in that day, saith the
Lord, Y shal take awey thin horsis of
the mydil of thee, and Y shal distruye
thi foure horsid cartis.
11 And Y shal leese
the citees of thi lond, and Y shal distruye
alle thi strengthis; and Y shal do awey
the yuel deedis of thin hond, and dyuynaciouns,
or tellyngus by deuels craft,
shuln not be in thee.
12 And Y shal make
for to perishe thi sculptilis, or grauen
ymagis, and Y shal breke to gydre of
the mydil of thee thin ymagis, and thou
shalt namore wirshipe the werkis of thin
hondis.
13 And Y shal drawe out thi mawmet
wodis, and shal breke to gydre thi
citees.
14 And Y shal make in woodnesse
and in indignacioun veniaunce in alle
folkis, whiche herden not.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
