Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. VIII.
1 Forsothe the Lord seide to Moyses,
Goo into Pharao, and thow shalt sey to
hym, Thes thingis seith the Lord, Leeue
my puple, that he sacrifye to me;
2 ellis
forsothe if thow wolt not leeue hem, loo!
Y shal smyte alle thi coostis with frogges;
and the floode shal boyl up froggis,
3 that
shulen steyn vp, and goo in to thin hows,
and into thi bedchaumbre, and vpon thi
beddynge, and into the houses of thi seruantis,
and into thi puple, and into thi
ouenes, and in to the relyues of thi metis;
and to thee,
4 and to thi puple, and to alle
thi seruauntes shulen goon yn froggis.
5 And the Lord seide to Moyses, Sey to
Aaron, Strecche out thi hoond vpon
floodes, and vpon ryuers, and mershes;
and brynge out frogges vpon the loond
of Egipte.
6 And Aaron strau&yogh;te out the
hoond vpon the watris of Egipte; and
there steyden vp frogges, and couerden
the loond of Egipte.
7 And the clepers of
deuels diden by her enchauntyngis lijk
maner; and brou&yogh;ten out frogges vpon
the loond of Egipte.
8 Forsothe Pharao
clepide Moyses and Aaron, and seiden to
hem, Preye &yogh;e the Lord, that he do awey
frogges fro me, and fro my puple; and
Y shal lat the puple, that thei sacryfye to
the Lord.
9 And Moyses seide to Pharao,
Ordeyn me a tyme, whan Y shal preye
for thee, and for thi seruantis, and for
thi puple, that the frogges ben dreuen
a wey fro thee, and fro thin hows, and
-- --
fro thy seruauntis, and fro thi puple; and
oonly in the floode thei abiden.
10 The
which answerde, To morwe. And he,
After thi word, he seith, Y shal do, that
thow knowe, for there is not a Lord as
oure God;
11 and the frogges shulen goon
awey from thee, and from thin hows, and
fro thi children, and fro thi seruantis, and
fro thi puple; and oonli in the floode thei
shulen abijd.
12 And Moyses and Aaron
&yogh;eden out fro Pharao. And Moyses criede
to the Lord, for the biheeste of froggis,
that he couenauntide to Pharao.
13 And the
Lord dide after the word of Moyses; and
the frogges weren deed of the howsis,
and of the townes, and of the feeldes;
14 and thei gedered hem togidere into greet
heepes withouten noumbre, and the erthe
stonke.
15 Pharao forsothe seynge that there
was &yogh;eue rest, his herte engredgide, and
herde not hem, as the Lord comaundide.
16 And the Lord seide to Moyses, Spek to
Aaron, Strecche out thi &yogh;erde, and smyit
the powdre of the erthe, that there ben
stynggynge gnattes in al the loond of
Egipte.
17 And he dide so; and Aaron
strau&yogh;te out the hoond, holdynge the &yogh;erde,
and he smote the powdre of the erthe;
and there weren maad stynggynge gnattes
in men, and in beestis; al the powdre of
the erthe is turnyd into stynggynge
gnattes thur&yogh; out al the loond of Egipte.
18 And liyk manere diden the clepers of
deuels in her enchauntyngis, that thei
my&yogh;ten dryue out the stynggynge gnattes,
and thei my&yogh;ten not; and stynggynge
gnattes weren bothe in men and in beestis.
19 And the clepers of deuels seiden vnto
Pharao, The fyngur of God ys here. And
the herte of Pharao was greetli hardid,
and he herde hem not, as the Lord
hadde comaundide.
20 And the Lord seide
to Moyses, Aryse eerli, and stoond before
Pharao, forsothe he shal goon out to the
watris; and thow shalt sey to hym, Thes
-- --
thingis seith the Lord, Leeue my puple,
that thei sacrifye to me;
21 and if thow late
hem not, loo! Y shal seende into thee,
and into thi seruauntis, and into thi puple,
and into thin howses, al kynde of
fli&yogh;is; and the howsis of Egipte shulen
be fulfillyd with fli&yogh;is of dyuerse kynde,
and al the loond in which thei shulen ben.
22 And Y shal mak merveylows in that day
the loond of Gessen, in the which is my
puple, that there ben not there fli&yogh;is; and
wyte thow that Y am Lord in the
myddel of the erthe;
23 and Y shal sette
partynge bitwix my puple and thi puple;
to morwe shal be this tokne.
24 And so
dide the Lord. And there cam the moost
greuows fli&yogh;e in to the hows of Pharao,
and of his seruauntis, and into al the
loond of Egipte; and the loond was corrupte
of lyche maner fli&yogh;is.
25 And Pharao
clepide Moyses and Aaron, and seith
to hem, Gooth, and sacrifieth to the Lord
&yogh;oure God in this loond.
26 And Moyses
seith, It may not be doo so; the abhomynaciouns
forsothe of Egipciens shulen
we offre to oure Lord? that if we sleen
thes thingis that Egipciens heryen beforn
hem, they shulen felle us down with
stones.
27 We shulen goon the weye of three
dayes into wildernes, and we shulen sacryfie
to the Lord oure God, as he hath
comaundid vs.
28 And Pharao seid, Y shal
leeue &yogh;ow, that &yogh;e sacrifie to the Lord
&yogh;oure God in deserte; neuertheles go &yogh;e
a wey no ferthere; preieth for me.
29 And
Moyses seith, Y goon out fro thee shal
preye the Lord; and the fli&yogh;e shal goo
a wey fro Pharao, and fro his seruauntis,
and fro his puple to morwe; neuertheles
wole thou no more desceyue me, that
thow lat not the puple sacryfie to the
Lord.
30 And Moyses goon out fro Pharao
preiede the Lord,
31 that dide aftir his word,
-- --
and he tok awey fli&yogh;es fro Pharao, and
fro the seruauntis, and fro his puple;
there ouerlafte not oon forsothe.
32 And
the herte of Pharao was engredgid, so
that &yogh;it this while he wolde not leeue the
puple.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
