Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IX.
1 To Moyses forsothe seyde the Lord,
Goo yn to Pharao, and spek to hym,
Thes thingis seith the Lord God of Ebrews,
Leeue my puple, that it sacrifie to
me;
2 that it &yogh;it thow forsakist, and holdist
hem,
3 loo! myn hoond shal be vpon thi
feeldis, vpon horsis, and assis, and chamels,
and oxen, and sheip, a ful greuows
pestilence;
4 and the Lord shal do a meruelows
thing bitwix possessiouns of Yrael
and the possessions of Egipcyens, that
no thing algatis perishe of thes thingis
that pertenen to the sones of Yrael.
5 And
the Lord ordeynede a tyme, seiynge, To
morwe the Lord shal do this word in
the loond.
6 The Lord dide thanne this
word the tother day, and alle the beestis
of Egipciens dyeden; of the beestis forsothe
of the children of Yrael no thing
algat perishide.
7 And Pharao sent to
looke, ne eny thing was deed of thes
thingis that Yrael hadde; and the herte
of Pharao was inwardly agreued, and he
lafte not the puple.
8 And the Lord seyde
to Moyses and Aaron, Tak &yogh;e hoondes ful
of asken fro the chymney, and Moyses
sprenge it into heuene before Pharao;
9 and be there powdre vpon al the loond
of Egipte; and there shulen ben in men
and yn beestis biles, and bleynes swellynge,
in al the loond of Egipte.
10 And
thei token asken of the chymney, and
they stoden before Pharao; and Moyses
sprengide it into heuene; and there ben
maad woundes of the swellynge bleynes
in men, and in beestis;
11 ne the clepers of
deuels my&yogh;ten stoonde before Moyses, for
-- --
the woundis that weren in hem, and in
al the loond of Egipte.
12 And the Lord
hardid the herte of Pharao, and he herde
not hem, as the Lord spak to Moyses.
13 And the Lord seide to Moyses, Eerli
aryse, and stoond before Pharao, and
thow shalt sey to hym, Thes thingis seith
the Lord God of Ebrews, Lat my puple,
that he sacrifie to me;
14 for in this while
Y shal sende alle my veniaunces vpon thin
herte, and vpon thi seruauntis, and vpon
thi puple, that thou knowe, that there is
noon like me in al the loond.
15 Now forsothe
I shal stretche out the hoond, and
Y shal smyit thee and thi puple with
pestilence, and thou shalt perisshe fro the
erthe;
16 therfor forsothe Y haue sett thee,
that Y shewe my strengthe in thee, and
my name be toold in eche loond.
17 &YOGH;it
thow holdist my puple, and wole not leeue
it?
18 Loo! Y shal reyne to morwe this same
our ful myche hawle, what maner was
not in Egipte, fro the day that it was
sett, vnto the tyme that is now.
19 Seend
thanne now ri&yogh;t, and gedere togidere thi
beestis, and al that thou hast in the
feelde; men forsothe, and beestis, and
alle that shulen be foundun withouten,
and not gedered togidere fro watres, and
the hawle fal vpon hem, thei shulen die.
20 He that dradde the word of the Lord, of
the seruauntis of Pharao, made his seruauntis
and beestis flee togidere into
howsis;
21 he forsothe that rou&yogh;te not the
word of the Lord, left his seruauntis and
beestis in the feeldis.
22 And the Lord seide
to Moyses, Strecche out thin hoond into
heuene, that there be maad hawle in al
the loond of Egipte, vpon men, and vpon
beestis, and vpon al erbe of the feelde
in the loond of Egipte.
23 And Moyses
strau&yogh;te the &yogh;erde into heuene; and the
Lord &yogh;af thundres, and hawle, and dyuersly
rennynge leytis vpon the erthe;
and the Lord reynede hawle vpon the
-- --
loond of Egipte;
24 and hawle, and fier
mengid togidere weren brou&yogh;t; and it
was of so greet mychelnes, how greet bifore
neuer apeeride in al the loond of
Egipte, sith that folk was maad.
25 And
the hawle smoot in al the loond of Egipte
alle that weren in feeldes, fro man vnto
beest; and al erbe of the feelde smoote
the hawle, and eche tree of the cuntree it
breke togidere;
26 oonly in the loond of
Gessen, where weren the children of Yrael,
the hawle fel not.
27 And Pharao
sente, and clepide Moyses and Aaron,
seiynge to hem, Y haue synned also now;
the Lord is ri&yogh;twiys, Y and my puple
wickid;
28 preye &yogh;e the Lord, that the thundres
of God and the hawle leeuen of, and
Y shal leten &yogh;ow, and &yogh;e shulen dwelle
here no more.
29 Moyses seith, Whanne
Y shal goon out fro the citee, Y shal
strecche out my hoond to the Lord, and
the thundres shulen ceesse, and hawle
shal not be, that thow knowe, for of the
Lord is the erthe;
30 forsothe Y knowe, that
thow and thi seruauntis dreden not &yogh;it
the Lord God.
31 The flax thanne and barlich
was hurt, for that that the barlich
was grene, and the flax now buriownde
coddes;
32 whete forsothe and corn weren
not hurt, for thei weren of late growyng.
33 And Moyses goon out fro Pharao, and
out of the citee, strau&yogh;te the hondes to the
Lord, and thundres and hawle ceesiden,
and no more droppide the reyn vpon the
loond.
34 Pharao forsothe seynge that the
reyne hadde ceesid, and hawle, and thundres,
encreesid the synne;
35 and the herte
of hym and of hys seruauntis is engredgid,
and his herte was ful myche
hardid; and he lafte not the sones of
Yrael, as the Lord comaundide by the
hoond of Moyses.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
