Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVI.
1 And thei &yogh;eden forth fro Helym, and
al the multitude of the sones of Yrael
-- --
cam into desert of Syn, that is bitwix
Helym and Synai, the fiftenthe day of
the secounde moneth after thei weren
goon out of the loond of Egipte.
2 And
alle the congregaciouns of the sones of
Yrael grucchiden a&yogh;ens Moyses, and a&yogh;ens
Aaron, in wildernes.
3 And the sones of
Yrael seiden to hem, Wolde God we hadden
be deed bi the hoond of the Lord in
the loond of Egipte, whanne we seeten
vpon the pottis of flesh, and eten breede
in fulnes; whi hast thow ladde vs into
this desert, that thow my&yogh;tist slee al this
multitude with hungur?
4 The Lord forsothe
seide to Moises, Y shal reyn to &yogh;ow
looues fro heuene; the puple goo out that
he gadere that sufficen bi eche dayes; that
Y tempte hym, whether he goo in my
lawe, or noon.
5 The sixte day forsothe
greithe thei that thei bryngen yn, and
dowble be there that thei weren wont to
gedere bi eche dayes.
6 And Moyses and
Aaron seiden to alle the sones of Yrael,
At euen &yogh;e shulen wyte that the Lord
hath lad &yogh;ow out of the loond of Egipte;
7 and the morwetide &yogh;e shulen se the glorye
of the Lord; I haue herd forsothe &yogh;oure
grucchyng a&yogh;ens the Lord; what forsoth
ben we, that &yogh;e grucchen a&yogh;ens vs?
8 And
Moyses seith, The Lord shal &yogh;yue to &yogh;ow
at euen flesh for to eete, and eerli looues
in fulnes, for thi that he hath herd &yogh;oure
grucchyng, the which &yogh;e han grucchid
a&yogh;ens hym; what forsothe ben we? ne
a&yogh;ens vs is &yogh;oure grucchyng but a&yogh;ens the
Lord.
9 And Moyses seide to Aaron, Sey
to al the congregacioun of the sones of
Yrael, Goo &yogh;e to before the Lord, forsothe
he hath herd &yogh;oure grucching.
10 And
whanne Aaron spak to al the companye
of the sones of Yrael, thei bihilden to
wildernas, and loo! the glorye of the
Lord aperyde in a clowde.
11 Forsothe the
Lord spak to Moyses,
12 seiynge, Y haue
herd the grucchyng of the sones of Yrael;
-- --
spek thow to hem, At euen &yogh;e shulen eete
flesh, and eerli &yogh;e shulen be fillid with
looues, and &yogh;e shulen wyte that Y am
the Lord &yogh;oure God.
13 Thanne it was doon
at euen, and steiynge vp a curlew couerde
the tentis, and eerly dew cam by the enuirown
of the tentis.
14 And whanne it
hadde couerde the vttermore parti of the
erthe, it aperid in wildernes lassid, and
as with a pestel pownyd, into the lyknes
of an hoore frost vpon the erthe.
15 The
which thing whanne the sones of Yrael
hadden seen, thei seiden togidere, Man
hu? that bitokneth, what is this? forsothe
thei knewen not what it was. To whom
Moyses seith, This is the breed that the
Lord hath &yogh;ouun to &yogh;ow for to eete.
16 This
is the word that the Lord comaundide,
Echon gedere of it how myche it sufficith
for to eete, the tenthe part of thre
busshels bi ech heedes, after the noumbre
of soules that dwellen in the tabernacle,
so &yogh;e shulen taak.
17 And so dyden the
sones of Yrael, and thei gadreden another
more, another lesse;
18 and thei mesurden
it at the mesure of gomor, that is,
of threttenthe pownde, with the tenthe
part of two pownde; ne he that gederede
more hadde more, ne he that gaderyde
lesse foond lesse, but eche after that that
he my&yogh;te eete gadreden.
19 And Moyses
seide to hem, No man leeue therof vnto
the morwen;
20 the whiche herden him not,
but sum therof lafte vnto the morwen,
and it biganne to boyle wormes, and
stonk; and Moyses was wrooth a&yogh;ens hem.
21 Forsothe eche gaderede the morwetide as
myche as my&yogh;te suffice to ete, and whanne
the sunne bigan to heet, it moltid.
22 The
sixte day forsothe thei gadreden dowble
metis, that is to seye, two gomors bi eche
-- --
man. And alle the princes of the multitude
camen,
23 and tolden to Moyses, the
which seith to hem, This is that the Lord
spak, The rest of the holy day is halwid
to the Lord, to morwe al that is to
worchynge dothe, and `that ben to seething
seetheth, and what euer shal be
relif, leith vp til to morwe.
24 And thei
diden so as Moyses hadde comaundide,
and it stonk not, ne worme was founde
there yn.
25 And Moyses seide, Etith that
to day, for it is the saboth of the Lord, yt
shal not be founde to day in the feelde;
six dayes gedere &yogh;e,
26 in the seuenthe day
forsothe is the saboth of the Lord, therfor
it shal not be foundun.
27 The seuenthe
day cam, and goon out of the puple that
thei my&yogh;ten gedere, thei fonden no&yogh;t.
28 And the Lord seide to Moyses, How long
wolen &yogh;e not kepe my maundementis, and
my lawe?
29 Seeth that the Lord shal &yogh;yue
to &yogh;ow a saboth, and therfore he shal
&yogh;yue to &yogh;ow the sixt day dowble meetis;
dwel euerechon anentis hym silf, no man
goo out of his place the seuenthe day.
30 And the puple halowide the seuenthe day.
31 And the hows of Yrael clepide the name
of it man, that was as the seed of coliaundre
white, and the taast of it as of
tryed floure with hony.
32 And Moyses
seyde, This is the word that the Lord
comaundide, Fulfil thow gomor of it, and
be it kept into generaciouns afterward to
comen, that thei knowen the breed with
the which Y norshide hem in wildernes,
whanne &yogh;e weren lad out of the loond of
Egipte.
33 And Moyses seide to Aaron, Tak
a vessel, and putte ther yn man, how
myche may take gomor, and ley vp before
the Lord, to kepe into &yogh;oure generaciouns,
as the Lord comaundide to Moyses;
34
and Aaron putte it in the tabernacle, to
be reserued.
35 And the sones of Yrael
-- --
eten man fourti wynter, to the tyme that
thei camen into a loond able to dwel yn;
with this meet thei weren norishid forto
thei towcheden to the coostys of the loond
of Chanaan.
36 Gomor forsothe is the tenthe
party of ephi, that is, a mesure of thre
busshels.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|