1   In the fyue and twentithe &yogh;ere of oure transmygracioun, in the bygynnynge of the &yogh;eer, in the tenthe of the moneth, in the fourtenthe &yogh;eer aftir that the citee is smytyn, in the same day the hond of the Lord is maad on me, and ledde me thider in visiouns of God. 2   And he brou&yogh;t me in to the lond of Yrael, and he left me on a ful hee&yogh; hill, vpon whom was as a beeldyng of a citee goynge to the southe; and he ledde me yn thider. 3   And loo! a man, whos fourme was as the fourme of brasse, and a lytil lynnyn bond in his hond, and a &yogh;erd of mesure in his hond; forsothe he stood in the &yogh;ate. 4   And the same man spac to me, Sone of man, see with thin ee&yogh;en, and heere with thin eeris, and putte thin herte in to alle thingis, whiche I shal shewe to thee, for that it be shewid to thee, thou art brou&yogh;t to hither; telle thou alle thingus that thou seest to the hous of Yrael. 5   And loo! a wal with outforth, in cumpas of the hous in eche sijd, and in hond of the man a &yogh;erd of mesure of sixe cubitis and a palme; and he metid the breede of the beeldyng with oo &yogh;erd, and the hee&yogh;nesse with oo &yogh;erd. 6   And he came to the &yogh;ate that biheelde to the eest waye, and he stiede vp by the greese therof; and he metid the thrisfold of the &yogh;ate with oo &yogh;erd, that is for to saye, the breede of the thrisfold, with oo &yogh;erd in breede; 7   and the chaumbre with oo &yogh;erd in to long, and with oo &yogh;erd in to breede, and bitwix chaumbris fyue cubitis; 8   and the thresfold of the &yogh;ate bisydis the vestiarie,

or porche, of the &yogh;ate with ynforth, oo &yogh;erd. 9   And he metide the porche of the &yogh;ate of ei&yogh;t cubitus, and the frount therof in two cubitis; forsothe the vestiarie, or porche, of the &yogh;ate was with inneforth. 10   Forsothe chaumbris of the &yogh;ate to the est waye, three on this sijd, and three on that sijd; oo mesure of three, and oo mesure of the frountis of eche syde. 11   And he metid the breede of the thresfold of the &yogh;ate of ten cubitis, and the lengthe of the &yogh;ate of thrittene cubitis; 12   and the margyne, or vttemest part, bifore the chaumbris of oo cubit, and oo cubit the eende of eche sijde; sothely the chaumbres weren of sixe cubitis on this syde and on that syde. 13   And he metide the &yogh;ate fro the roof of the chaumbre til the roof therof, the breede of fyue and twenty cubitis, dore a&yogh;eins dore. 14   And he maad frountis bi sixti cubitis, and at a frount porche of the &yogh;ate on eche syde bi cumpas; 15   and bifore the face of the &yogh;ate that lastid til to the face of the porche of the ynner &yogh;ate, fifti cubitis; 16   and wyndowis ouerthwert, in chaumbris and in frountis of hem, that weren with ynne the &yogh;ate on eche syde by cumpas. Also forsothe and wyndowis weren in the porchis bi cumpas with ynne forth, and bifore the frountis peyntyng of palmes grauen. 17   And he ledde me out to the vtmer porche, `or large hous, and loo! tresories, and pament paued with stoon in the porche by enuyrounn; thritti tresories in the cumpas of pament; 18   and a pament in the frount of &yogh;atis, after the lengthe of the &yogh;atis was with ynneforth. 19   And he metide the breede fro face of the ynner &yogh;ate vnto the frount of the ynner porche with outeforth, an hundrid cubitis to the eest, and to the north. 20   And he metide the &yogh;ate that biheelde the waye of the north, of the vtmore porche, as wele in lengthe as in breede; 21   and three chaumbres therof, three on this syde, and three

on that syde, and the frount therof, and the porche therof, after the mesure of the first &yogh;ate; the lengthe therof of fyfty cubitis, and the breede of fyue and twenti cubitis. 22   Forsothe the wyndowis therof, and porche, and grauyngis, after the mesure of the &yogh;ate that byheelde to the eest; and of seuen grees was the styeing vp therof, and a porche bifore it. 23   And the &yogh;ate of the ynner porche a&yogh;einus the &yogh;ate of the north, and the eest &yogh;ate; and he metide fro &yogh;ate vnto &yogh;ate an hundrid cubitis. 24   And he ledde me out to the southe waye, and loo! a &yogh;ate that bihelde to the southe; and he metide the frount therof, and the porche therof, after the ouermore mesures; 25   and the wyndowis therof, and porchis in cumpas, as the tother wyndows; of fifti cubitis the lengthe, and the breede of fyue and twenti cubitis. 26   And in seuen greesis `men stieden therto, and a porche bifore the &yogh;atis therof; and grauen palmes weren, oon on this syde, and an other in the frount therof. 27   And the &yogh;ate of the ynner hous, in the south waye; and he metide fro &yogh;ate vnto &yogh;ate in the south waye, an hundrid cubitis. 28   And he ledde me yn, in to the ynnermer hous at the south &yogh;ate; and he metide the &yogh;ate after the ouermer mesuris; 29   the chaumbris therof, and frount therof, and porche therof, bi the same mesuris; and the wyndowis therof, and the porche therof in cumpas; fifti cubitis in lengthe, and of breed fyue and twenti cubitis; 30   and the porche by cumpas, the lengthe of fyue and twenti cubitis, and the breed of fyue cubitis. 31   And the porche therof to the vtmer hous, and palmes therof in the frount; and ei&yogh;te greces weren, bi whiche me steyede vp therby. 32   And he ledde me in to the ynnermer hous, by the eest waye; and he metide the &yogh;ate after the

ouermer mesuris; 33   the chaumbre therof, and frount therof, and porchis therof, as aboue; and wyndowis therof, and porchis therof in cumpas; the lengthe of fifty cubitis, and the breede of fyue and twenty cubitis; 34   and the porche therof, that is to saye, of the vtmer hous; and palmes graued in the frount therof, on this syde and on that syde; and in ei&yogh;te greese the stei&yogh;ing vp therof. 35   And he ledde me ynne, at the &yogh;ate that biheelde to the north, and matte after the ouermore mesuris; the chaumbris therof, 36   and frount therof, and the porche therof, and wyndowis therof bi cumpas; of lengthe of fifty cubitis, and the breed of fyue and twenti cubitis. 37   The porche therof biheelde to the vtmer hous; and grauyngs of palmys in frount therof on bothe sydis; and in ei&yogh;te greese the stei&yogh;ing vp therof. 38   And bi alle tresories a dore in frountis of the &yogh;atis; and there thei washiden brend sacrifice. 39   And in the porche of the &yogh;ate two bordis on this syde, and two bordis on that syde, that vpon hem ben offrid brend sacrifice, for synne of doyng and for trespas of leeuyng vndon. 40   And at the vtmer syde, that goth vp to the dore of the &yogh;ate that goth to the north, two bordis; and at the tother syde, bifore the porche of the &yogh;ate, two bordis. 41   Foure bordis on this syde, and four bordis on that syde; by the sydis of the &yogh;ate weren ei&yogh;te bordis, vpon whom men offriden. 42   Forsothe foure bordis to brend sacrifice beeldid of sqware stoons, in lengthe of oo cubit and an half, and in breede of oo cubite and an half, and in hei&yogh;the oo cubit; vpon whiche thei putten vessels, in whiche brend sacrifice is offrid, and slayn sacrifice. 43   And the lippis, or brynkis, of hem of oo palme, bowid a&yogh;ein with ynneforth bi cumpas; vpon the bordis forsothe offringis of fleshe. 44   And with oute the ynner &yogh;ate, treseries of

chaunters, in the ynner hous that was in the side of the &yogh;ate biholdynge to the north; and the face of them a&yogh;einus the southe waye; oon on the syde of the eest &yogh;ate, that biheelde to the waye of the north. 45   And he saide to me, This is the tresorie, that biholdith the south waye, of preestis that waken in kepingis of the temple. 46   Sothli the tresorie that biholdith to the waye of the north, schal ben of prestis that waken to the seruyse of the auter; thes ben the sones of Sadoch, that comen to of the sonys of Leuy to the Lord, that thei ministre to hym. 47   And he matte the hous, the lengthe of an hundrid cubitis, and the breede by an hundrid cubitis, by sqware, and the auter bifore the face of the temple. 48   And he ledde me yn, in to the porche of the temple; and he matte the porche by fyue cubitis on this syde, and fyue cubitis on that syde; and the breed of the &yogh;ate, of three cubitis on this syde, and three cubitis on that syde; 49   forsothe the lengthe of the porche of twenti cubitis, and the breed of elleuen cubitis, and bi ei&yogh;te greese me stieden therto; and pilers weren in the frountus, oon on this syde, and an other on that syde.

Previous section

Next section