Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXXIX.
1 Forsothe thou, sone of man, prophecie
a&yogh;eins Gog; and thou shalt saye, These
thingus saith the Lord God, Loo! I vpon
thee, Gog, prince of the hed of Mosoch
and Tubal.
2 And I shal leede thee aboute,
and I shal disceyue thee, and make thee
for to stey vp of sydis of the north, and
I shal bryng thee on the hillis of Yrael.
3 And I shal smyte thi bouwe in thi left
half, and I shal cast doun thin arowis of
thi ri&yogh;t hond.
4 Vpon the mounteyns of
Yrael thou shalt falle, thou, and alle thi
cumpanyes, and peplis that ben with
thee; to wylde beestis, briddis and eche
volatile, and beestis of erthe I &yogh;aue thee
for to be deuoured.
5 Vpon the face of
feeld thou shalt falle; for I the Lord spac,
saith the Lord God.
6 And I shal sende
out fijr in to Magog, and in hem that
dwellen in ijlis tristily; and thei shuln
wite, for I the Lord God of Yrael.
7 And
-- --
I shal make myn holy name knowen in
the mydil of my peple of Yrael, and I
shal na more defoule myn holy name; and
folkis shuln wite, for I the Lord, holy
God of Yrael.
8 Loo! it cummeth, and it
is maad, saith the Lord God. This is the
day of whiche I spac.
9 And dwellers of
the cytees of Yrael shuln go out, and
kyndlen and brenne to gydre armeris,
sheeld and shaft, bowe and arowis, and
stafs of hond, and dartis; and thei shuln
priuely brenne hem by fijr seuen &yogh;eeris.
10 And thei shuln not bere trees of cuntrees,
nether thei shuln priuely brenne of wijld
wodis, for thei shuln priuely brenne armers
in fijr; and thei shuln robbe hem, to
whom prayes weren, and thei shuln rauyshe
her waasters, or distruyers, saith
the Lord God.
11 And it shal be in that
dya, Y shal &yogh;eue Gog a place named, sepulcre
in Yrael, the valey of way goers
to the eest of the se, that makith men
passynge for to be agast; and ther thei
shuln byryen Gog, and al the multitude
of hym, and it shal be clepid the valey
of the multitude of Gog.
12 And the hous
of Yrael shuln birye hem, that thei clense
the erthe seuen monethis.
13 Forsothe al
the peple of erthe shal byrien hem,
and it shal be to hem a named day, in
whom Y am glorified, saith the Lord God.
14 And thei shuln ordeyne bysili men seekynge,
or compasynge, the erthe, the
whiche shuln birien and a&yogh;ein seeke hem
that dwelten vpon the face of erthe, that
thei clense it. Forsothe after seuen monethis
thei shuln bygynne for to seeke,
and shuln cumpas walkynge the lond;
15
and when thei shuln see a boon of man,
thei shuln sette a title, or signe, bisidis
it, til that byriers byrye it in the valey
of multitude of Gog.
16 Forsothe name of
the citee Amona; and thei shuln clense
the lond.
17 Forsothe thou, sone of man,
these thingis saith the Lord God, Saye
thou to eche bryd, and to alle foulis, and
-- --
to alle beestis of the feeld, Cum &yogh;e to
gydre, and haste &yogh;ee, renne to gydre on
eche sijde to my slayn sacrifice, whiche
I offre to &yogh;ou, a greet slayn sacrifice vpon
the hillis of Yrael, that &yogh;ee ete fleshis,
and drynke blood.
18 &YOGH;e shuln ete the
fleshis of strong men, and &yogh;e shuln drynke
the blood of princis of erthe, of wethers,
of lambren, and of kiddis, and of
boolis, and of thingus fed for to be fatt,
and of alle fatt thingus.
19 And &yogh;e shuln
ete the fatnesse in to fulfillynge, and shuln
drynke blood in to drunkennesse, of the
slayn sacrifice whiche I shal offre to &yogh;ou.
20 And &yogh;e shuln be fulfillid vpon my bord,
of hors, and of strong horsman, or kny&yogh;t,
and of alle men of batail, saith the Lord
God.
21 And I shal putte my glorie in
folkis, and alle folkis shuln see my dome,
that I dide, and myn hond, that I haue
putte on hem.
22 And the hous of Yrael
shuln wite, for I the Lord God of hem,
fro that day and afterward, or fro
thennus forth.
23 And heithen men shuln
wite, for the hous of Yrael is taken in
his wickidnesse, for that that thei leften
me; and Y hidde my face fro hem, and
bytoke hem in to hondis of enmys, and
alle fellen in swerd.
24 After the vnclennesse
of hem and greet trespas Y dide
to hem, and I hidde my face fro hem.
25 Therfore these thingis saith the Lord
God, Now I shal leede a&yogh;ein the caitifte
of Jacob, and I shal haue mercy on al
the hous of Yrael; and I shal take to
loue for myn holy name.
26 And thei shuln
bere her confusioun, and eche trespassynge
whiche thei trespassiden in me,
whan thei dwelliden in her lond tristili,
dredynge no man;
27 and I shal leede a&yogh;ein
hem of peplis, and shal gadre hem fro
londis of her enmyes, and shal be halewid
in hem, in the ee&yogh;en of ful manye
folkis.
28 And thei shuln wite, for I the
Lord God of hem, for that that I translatide
hem into naciouns, and haue
-- --
gadrede hem vpon her lond, and I haue
not forsaken, or left, eny man of hem
there.
29 And I shal namore hide my face
fro hem, for that I shedde out my spirit
vpon eche hous of Yrael, saith the Lord
God.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
