Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XLI.
1 And he ledde me yn, into the temple;
and he meet the frountis, sixe cubitis of
breede on this syde, and sixe cubitis of
breede on that syde, the breede of the
tabernacle.
2 And the breede of the &yogh;ate
was of ten cubitis; and the sydis of the
&yogh;ate, by fyue cubitis on this syde, and by
fyue cubitis on that syde; and he matte
the lengthe therof of fourty cubitis, and
the breede of twenti cubitis.
3 And he
gon yn with ynneforth, matte in frount
of the &yogh;ate two cubitis, and the &yogh;ate of
sixe cubitis, and the breede of the &yogh;ate
-- --
of seuen cubitis.
4 And he matte the
lengthe therof of twenti cubitis, and the
breede of twenti cubitis, byfore the face
of the temple. And he sayde to me, This
is the holy of halewis.
5 And he matte the
wall of the hous of sixe cubitis, and the
breede of the syde of foure cubitis, on
eche syde bi cumpas of the hous.
6 The
sydis forsothe, syde to syde, twyse three
and thritti; and thei weren shewynge,
`or aboue semynge, that entriden bi the
wall of the hous, in the sydis bi cumpas,
that thei shulden holde to gydre, and
not touche the wall of the temple.
7 And
the street was in to round, styinge vpward
bi the hee&yogh; toure, and in to soupyng
place of the temple it bare forth bi
cumpas; therfore the temple was brodder
in the ouermore thingus; and so fro
the lower parties me stied to the hee&yogh;er,
and the mydil.
8 And I see&yogh; in the hous
hee&yogh;nesse bi cumpas, the sydis foundid at
the mesure of a &yogh;erd in space of sixe cubitis;
9 and the breede by the wall of the
syde with outforth, of fyue cubitis; and
the ynner hous was in the sydis of the
hous.
10 And bytwix tresories the breede
of twentye cubitis in cumpas of the hous
on eche syde,
11 and the dore of the syde
to preyer; oo dore to the waye of the
north, and oo dore to the south waye;
and the breede of place to preyer, of fyue
cubitis in cumpas.
12 And the beeldyng that
was departid, and turnyd to the waye
biholdynge to the see, of the breede of
seuenty cubitis; forsothe the wall of
beeldyng of fyue cubitis of breed in cumpas,
and the lengthe therof of nyntye
cubitis.
13 And he matte the lengthe of
the hous, of an hundrid cubitis; and the
byldyng that was departid, and the wallis
therof, of lengthe of an hundrid cubitis.
14 Forsothe the breede byfore the face of
the hous, and of it that was departid
a&yogh;einus the eest, of an hundrid cubitis.
15 And he matte the lengthe of the beeldyng
-- --
a&yogh;einus the face therof, that was departid
at the bac; solers on eche syde of
an hundrid cubitis, and the temple with
ynforth,
16 and porchis of the hous, thresfoldis,
and wyndowis ouerthwert; solers
in cumpas by three parties, a&yogh;einus the
threshfold of eche, and di&yogh;te with tree by
cumpas in enuyroune; forsothe erthe til
to the wyndowis, and wyndowis closiden
the doris,
17 vnto the ynner hous, and with
out forth, by eche wall in cumpas, with
ynneforth and with outforth at mesure.
18 And cherubyns forged, and palmes, and
a palme bitwix cherub and cherub; and
cherub hadde two faces,
19 a face of man
bysijdis the palme of this syde, and a
face of lyoun bysydis a palme expressid
on the tother syde. By all the hous in
cumpas,
20 fro the erthe vnto the ouermer
part, cherubyns and palmes weren graued
in the wall of the temple.
21 The thresfold
foure cornerd; and the face of the byholdyng
of the sayntuarye a&yogh;enus the biholdyng
of the treenen auter;
22 the hei&yogh;t of it
of three cubitis, and the lengthe therof
two cubitis; and the corners therof, and
lengthe therof, and wallis therof, treenen.
And he spac to me, This is the bord byfore
the Lord.
23 And two doris weren in
the temple, and in the sayntuarie.
24 And
in the two doris on eche sijde weren two
smale doris, that weren folden in hem self
to gydre; forsothe two doris weren on
eche syde of the doris.
25 And grauen
weren in the ylk doris of the temple
cherubyns and grauyng of palmes, as and
in the wallis thei weren expressid. Wherfore
and gretter trees weren in the frount
of the porche with outforth,
26 on whiche
the ouerthwert wyndowis, and lickenesse
of palmes, on this syde and that syde; in
the litil shuldris of the porche, after the
sydis of the hous, and breede of wallis.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
