Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXV.
1 And the word of the Lord is maad to
me,
2 seiynge, Sone of man, put thou thi
face a&yogh;ens the sonys of Amon, and thou
shalt prophecie of hem.
3 And thou shalt
seie to the sonys of Amon, Here &yogh;e the
word of the Lord God; thes thingis seith
the Lord God, For that that &yogh;e seiden,
Wew! wew! or scorn, or repref, vpon my
seyntuarie, for it is polutid, and vpon
the loond of Israel, for it is desolatid,
and vpon the hous of Juda, for it is led
in to caitifdoom; therfor loo!
4 Y shal
bitake thee to sones of the eeste in
to eritage, and thei shulen togidir sette
her fooldis in thee, and shulen putte her
tentis in thee; thei shulen ete thi fruytis,
and thei shulen drynke thi mylk.
5 And
I shal &yogh;yue Ramath in to dwellynge of
camelis, and the sonys of Amon in to
couche of beestis; and &yogh;e shulen wite, for
-- --
Y the Lord.
6 For thes thingis seith the
Lord God, For that that thou ioiedist
with hoond, and smytidist with foot,
and ioiedist of al thi wil vpon the loond
of Israel; therfor loo!
7 Y shal stretche
forth myn hoond vpon thee, and Y shal
bitake thee in to rauyshinge of heithen
men, and Y shal slee thee of puplis, and
Y shal leese fro loondis, and togidre defoule;
and &yogh;e shulen wite, for Y the Lord.
8 Thes thingis seith the Lord God, For
that that Moab and Seyr seyden, Loo!
as alle heithen men the hous of Juda;
therfor loo!
9 Y shal opyn the shulder of
Moab of cytees, sotheli of his cytees and
of his coostis, the noble of erthe, Bechiesmoth,
and Beelmoth,
10 and Cariathaym, to
the sones of the este, with the sones of
Amon. And Y shal &yogh;eue it in to eritage,
that the mynde of the sones of Amon be
namore in folkis,
11 and in Moab Y shal
make domes; and thei shulen wite, for I
the Lord.
12 Thes thingis seith the Lord
God, For that that Ydume dide veniaunce,
that she shulde venge hir of the
sones of Juda, and synnede trespasynge,
and axede veniaunce of hem;
13 therfor
thes thingys seith the Lord God, Y shal
stretche out myn hoond vpon Ydume,
and shal take a wey fro it man and beest,
and Y shal make it deseert fro the south;
and thei that ben in Dedan shulen falle
in swerd.
14 And Y shal &yogh;yue my veniaunce
vpon Ydume, bi the hoond of my
puple Israel; and thei shulen doo in
Edom after my wraththe, and my woodnes;
and thei shulen wite my veniaunce,
seith the Lord God.
15 Thes thingis seith
the Lord God, For that that Palestyns
diden veniaunce, and vengiden hem silf
with al inwit, sleynge and fulfillynge
oolde enemytees;
16 therfor thes thingis
seith the Lord, Loo! Y shal stretche out
myn hoond vpon Palestyns, and Y shal
slee the sleers, and Y shal lese the relyues
of the see cuntree;
17 and Y shal doo
in hem grete veniaunces, repreuynge in
-- --
woodnes; and thei shulen wite, for Y the
Lord, whanne Y shal &yogh;yue my veniaunce
vpon hem.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
