Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXIV.
1 And the word of the Lord is maad to
me, in the nynthe &yogh;eer, and in the tenthe
moneth, the tenthe day of the moneth,
seiynge,
2 Sone of man, wrijt thou to thee
the name of this dai, in whom the kyng
of Babiloyne is confermyd a&yogh;ens Jerusalem
to day.
3 And thou shalt seye bi
prouerbe a parable to the hous, terrer to
wraththe, and thou shalt speke to hem,
Thes thingis seith the Lord, Put thou a
brasen pot, sotheli put thou, and send in
to it water; tak to a beest moost fat.
4 Put
togidre the gobetis of it in to it, eche
good part, and the thi&yogh;, and the shuldre,
chosyn and ful of boonus.
5 And mak to
gidre heepis of boonus vndir it; and the
sethinge of it buylide vp, and the boonus
ben ful sothen in the mydil therof.
6 Therfor
thes thingis seith the Lord God, Woo
to the citee of blodis, to the pot whos
rust is in it, and the rust therof wente
not out of it; caste it out bi partis, and
bi his partis; soort, or lot, felle not vpon
it.
7 Forsothe the blood therof is in the
mydil therof; he shedde it out vpon the
moost cleer stoon, he shedde it not out
vpon erthe, that it may be keuered with
dust,
8 that Y shulde lede in aboue myn indignacioun,
and in veniaunce be vengid;
Y &yogh;aue the blood therof vpon the moost
cleer stoon, lest it were keuered.
9 Therfor
thes thingis seith the Lord God, Woo
to the citee of bloodis, of whom I shal
make greet hepe of stickis in fier;
10 gadir
the boonus, whom Y shal brenne with
fier; fleshis shulen be waastid, and al
-- --
the making togidre shal be sothen, and
boonus shulen faile.
11 And put thou it
void vpon coolis, that it wexe hoot, and
the brasse therof melte, and the foulynge
therof be wellid to gidre in the mydil
therof, and the rust of it be waastid.
12 With myche traueile it is maad in sweet,
and the myche rust of it wente not out
therof, nether bi fier.
13 Thin vnclennes
cursid; for I wolde clense thee, and
thou art not clensid fro thi filthis; but
nether thou shal be clensid eer, til Y shal
make myn indignacioun for to reste in
thee.
14 I the Lord spak; it shal come,
and Y shal doo, Y shal not passe, nether
spare, nether Y shal be plesid; after thi
weies and after thi fyndyngis to Y demede
thee, seith the Lord.
15 And the word
of the Lord is maad to me,
16 seiynge, Sone
of man, loo! Y take fro thee the desyrable
thing of thin eyen in plage, or wounde,
and thou shalt not mourne, nether weepe,
nether thi teeris shulen flowe.
17 Thou
stillynge sorewe inward, thou shalt not
make mournynge of deede men; be thi
coroun about boundyn to thee, and thi
shoon shulen be in thi feet, nether with
clooth thou shalt veile, or hijde, mouthis,
nether thou shalt ete meet of mournynge
men.
18 Therfor Y spak to the puple
in the mornynge, and my wijf is deed in
the euenynge; and I dide, as he comaundide
to me.
19 And the puple seide to me,
Whi shewist thou not to vs what thes
thingis bitokenen, that thou dost?
20 And
Y seide to hem, The word of the Lord
is maad to me,
21 seiynge, Spek thou to the
hows of Israel, Thes thingis seith the
Lord God, Loo! Y shal defoule my seyntuarie,
the pryde of &yogh;our empyre, and
desyrable thing of &yogh;our eyen, and vpon
which &yogh;our soule dredith; and &yogh;our sonys
and &yogh;our dou&yogh;ters, whom &yogh;e laften, shulen
falle in swerd.
22 And &yogh;e shulen doo, as Y
dide; &yogh;e shulen not hide mouthis with
clooth, and &yogh;e shulen not ete metis of
-- --
men mournynge.
23 &YOGH;e shulen haue corouns
in &yogh;our heedis, and shoon in feet; &yogh;e shulen
not weile, ne wepe, but faile for leenes
in &yogh;our wickidnessis; and eche man shal
sorewe to his brother.
24 And Ezechiel
shal be to &yogh;ou in to a wonder bitoknynge
thing to come; after alle thingis that he
dide, &yogh;e shulen doo; whanne this thing
shal come, &yogh;e shulen wite, for Y the Lord
God.
25 And thou, sone of man, loo! in the
dai in which Y shal take fro hem the
strength of hem, and ioye of dignytee,
and desyre of her eyen, vpon which the
soulis of hem resten, the sones and the
dou&yogh;tris of hem;
26 in that dai whanne a
man fleynge shal come to thee, that he
telle to thee;
27 sotheli in that dai thi mouth
shal be openyd with hym that fleeth;
and thou shalt speke, and thou shalt not
be stille more; and thou shalt be to hem
in to a wonder, and &yogh;e shulen wite, for I
the Lord.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
