1   And the word of the Lord is maad to me, 2   seyynge, Sone of man, two wymmen weren dou&yogh;tris of o modir, 3   and thei diden

fornycacioun in Egipt, in her &yogh;ongth thei diden fornycacioun; there the breestis, or tetis, of hem ben vndirled, and the tetis of her puberte, that is, tyme of mariage, ben broken. 4   Forsothe the names of hem, Oolla the more, and Ooliba the lesse sister of hir. And Y hadde hem, and thei baren child, sones and dou&yogh;tris; sotheli the names of hem, Samarie Oolla, and Jerusalem Ooliba. 5   Therfor Oolla dide fornycacioun vpon me, and wexe woode in to her loueres, in to Assiriens nei&yogh;ynge, 6   clothid with iacynct, princis, and magistratis, &yogh;onge men of coueiting, alle kny&yogh;tis, or rydynge men, stiers vp of horsis. 7   And she &yogh;af her fornycaciouns vpon hem, the chosyn sonys of alle Assiriens, alle and in alle in to whom she wexe woode, in the vnclennes of hem she is defoulid. 8   More ouere and she lefte not hir fornycaciouns, whiche she hadde in Egipt; for whi and thei slepten with hir in the &yogh;ongth of hir, and thei togidre braken the brestis of hir puberte, and shedden out her fornycacioun vpon hir. 9   Therfor Y bitook hir in to the hoondis of hir louers, in to the hoondis of the sonys of Assur, vpon whos letchery she was woode. 10   Thei vnhilliden the yuel fame of hir; thei token the sonys and dou&yogh;tris of hir, and slewen hir in swerd; and thei ben maad famous, or sclaundrid, wymmen, and thei diden domys in to hir. 11   Which thing whanne hir sistir Ooliba hadde seen, she wexe woode in lecherie more than she, and she &yogh;af vnchastili, or with outen shame, hir fornycacioun, ouer the fornycacioun of hir sister, 12   to the sonys of Assiriens, to duykys and magistratis comynge to hir, clothide with dyuerse clooth, to kny&yogh;tis that weren born in horsis, and &yogh;onge men in noble fourme, or shappli, to alle men. 13   And Y saw&yogh; that o weye of bothe was defoulid, 14   and she encreside hir fornycaciouns. And whanne she see&yogh; men peyntid in a wal,

the ymagis of Caldeis expressid, or opnyd, 15   in colours, and gird the reyns with kny&yogh;tis girdlis, and cappis died, or steyned, in the heedis of hem, the fourmes of alle duykis, liknes of the sones of Babiloyne, and of the loond of Caldeis, in whiche thei ben born; 16   and she wexe woode a&yogh;ens hem in coueitise of hir ei&yogh;en, and sente messageris to hem in to Caldee. 17   And whanne sonys of Babiloyne cam to hir, to the couche of hir tetis, thei defouleden hir in her lecheries of defoulynge of maydynhod; and she is defoulid of hem, and the soule of hir is fulfillid of hem. 18   And she made nakid hir fornycaciouns, and discouerede hir euyl fame; and my soule wente a wey fro hir, as my soule hadde gon a wey fro hir sister. 19   Forsothe she multipliede hir fornycaciouns, bithenkynge the dais of hir &yogh;ongth, in whiche she dide fornycacioun in the loond of Egipt. 20   And she wexe woode bi letcherie vpon the liggynge bi of hem, whos flesshis ben as the flesshis of assis, and as fluxis, or rennyngis, of horsis the fluxis of hem. 21   And thou hast visitide the grete trespassis of thi &yogh;ongth, for thi brestis ben vndirled in Egipt, and the teetis of thi pubertee ben togidre brokyn. 22   Therfor, thou Ooliba, thes thingis seith the Lord God, Loo! Y shal reyse alle thi loueris a&yogh;ens thee, of whiche thi soule is fulfild, and Y shal gadre hem a&yogh;ens thee in cumpas; 23   the sonys of Babiloyne, and alle the noble Caldeis, and tyrauntis, and princis, alle the sonys of Assyriens, and &yogh;onge men in noble fourme, duykis, and magistratis, alle princis of princis, and the named stiers of horsis. 24   And thei shulen come vpon thee, maad redy with chaare and wheel, the multitude of puplis shulen be armed a&yogh;ens thee on eche syde with hauberioun, and sheeld, and helme; and I shal &yogh;yue before hem doom, and thei shulen deme thee in her domys. 25   And Y

shal putte myn enuye, or wraththe, in thee, which thei haunten with thee in woodnes; thei shulen kitte of thi noose and thin eeris, and whiche thingis shulen dwelle, thei shulen kytte of with swerd; thei shulen take thi sonys and thi dou&yogh;tris, and thi last shal be deuoured in fier. 26   And thei shulen vnclothe thee thi clothis, and shulen take a wei the vessels of thi glorie. 27   And Y shal make thi grete trespassis for to reste of thee, and thi fornycacioun of the loond of Egipt; nether thou shalt reyse thin eyen to hem, and thou shalt no more haue mynde of Egipt. 28   For thes thingis seith the Lord God, Loo! Y shal bitake thee in to the hoondis of hem whom thou hatidist, in to the hoondis of whyche thi soule is fulfillid. 29   And thei shulen doo with thee in haate, and thei shulen take alle thi traueilis, and shulen leeue thee nakid, and ful of euyl fame; and the euyl fame of thi fornycaciouns, shal be shewid. Thi greet 30   trespas and thi fornycaciouns han don thes thingis to thee; for thou didist fornycacioun after heithen men, amonge whom thou art defoulid in ydolis of hem. 31   Thou wandridist in the weye of thi sistir, and Y shal &yogh;yue the cuppe of hir in thin hoond. 32   Thes thingis seith the Lord God, Thou shalt drynke the cuppe of thi sister, deep and brood; and thou shalt be in to scornynge, and vndirmowynge, whiche thou art moost able to take. 33   Thou shalt be fulfillid with drunkenes and sorewe, the cuppe of mournynge and heuynes, the cuppe of thi sister Samarie. 34   And thou shalt drynke it, and drynke of vn to the drestis, and thou shalt deuoure the relyues of it, and thou shalt to-teere thi breestis, for I spak, seith the Lord God. 35   Therfor thes thingis seith the Lord God, For thou hast for&yogh;ete me, and caste me fer after thi bak, and thou beere thi grete trespassis and thi fornycaciouns. 36   And the Lord seith to me, seiynge, Sone

of man, whether thou demyst Ooliba and Oolla, and shewist to hem the grete trespassis of hem? 37   For thei han don auowtrie, and blood in the hoondis of hem, and thei diden fornycacioun with her ydolis; more ouere thei offren to hem her sonys for to be deuourid, whiche thei gendriden to me. 38   But and this thing thei diden to me, thei defouleden my seyntuaries in that dai, and thei prophaneden, or maden vnhooli, my sabotis. 39   And whanne thei offreden her sonys to her ydolis, and entriden my seyntuarie in that day, for to defoule it, and also thei diden thes thingis in the mydil of myn hous. 40   Thei senten to men comynge fro fer, to whom thei senten messageris. And so loo! thei camen, to whom thou washidist thee, and al about anoyntidist thin eyen with oynement of wymmen, and art ourned with wommans a tyre. 41   Thou hast setyn in a bed moost fayr, and a bord is ourned before thee; thou puttidist my tymyame, or encense, and myn oynement vpon it. 42   And a voys of multitude ioiynge without forth was in it; and in the men that weren led to of the multitude of men, and camen fro deseert, puttiden rengis in the hoondis of hem, and faire corownys in the heedis of hem. 43   And Y seide to hir, that is defoulid in auowtries, Now also this shal doo fornycacioun in hir fornycacioun. 44   And thei wenten to hir as to a womman hoore, so thei entriden to Oolla and to Ooliba, cursid wymmen. 45   Therfor thes men ben iust, thes shulen deme hem in doom of auowtres, and in dome of sheding out blood; for thei ben auowtreris, and blood in the hoondis of hem, and with her ydolis thei doon fornycacioun. 46   Forsothe the Lord God seith thes thingis, &YOGH;it brynge the multitudis, and bitak hem in to noys and raueyn; 47   and be thei stonyd with stoonys of puplis, and be thei doluen with swerdis of hem. Thei shulen sle the sones and

dou&yogh;tris of hem, and thei shulen brenne with fier the housis of hem. 48   And Y shal doo awei greet trespas fro erthe; and alle wymmen shulen lerne, lest thei doon after the greet trespas of hem. 49   And thei shulen &yogh;yue &yogh;our greet trespas vpon &yogh;ou; and &yogh;e shulen bere the synnys of &yogh;our idolis, and &yogh;e shulen wite, for I the Lord God.

Previous section

Next section