Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXII.
1 And the word of the Lord is maad to
me,
2 seiynge, And thou, sone of man,
whether thou demest not the citee of
bloodis?
3 And thou shalt shewe to it alle
her abomynaciouns, and thou shalt seie,
Thes thingis seith the Lord God, The
citee shedynge out blood in the mydil of
it, that the tyme of it cumme; and which
made ydols a&yogh;ens it silf, that it were polutid,
or defoulid.
4 In thi blood that is
shed out of thee, thou trespassidist, and
in thin ydolis whiche thou madist thou
art defoulid; and thou madist thi daies
for to nei&yogh;, and leddist to the tyme of thi
&yogh;eeris. Therfor I &yogh;aue thee shenship to
heithen men, and scornynge to alle loondis
that ben besidis;
5 and thei that ben fer
fro thee shulen haue victorie of thee, thou
foule, noble, greet in perishing.
6 Loo!
the princes of Israel, eche in her arm,
weren in thee, for to shede out blood.
7 Thei punyshiden with wroongis the fadir
and moder in thee, thei falsly chalengiden
a cumlynge in the mydil of thee,
thei maden sorewful fadirles and moderles
and widewe anentis thee.
8 &YOGH;e han dispiside
my seyntuaries, and &yogh;e han defoulide
my sabotis.
9 Men bacbiters weren in thee,
for to shede out blood, and vpon mounteyns
thei eten in thee; thei wrou&yogh;ten
greet trespas in the mydil of thee.
10 Fadris
-- --
vnhilliden in thee more shameful
thingis, thei meekeden in thee the vnclennes
of the menstruate womman.
11 Eche
man wrou&yogh;te abomynacioun in to the
wijf of his nei&yogh;bour, and the husbondis
fader defoulide his sonys wijf; vnleuefuli
the brother oppresside `in thee his sistyr,
the dou&yogh;ter of his fader.
12 Thei token
&yogh;iftis, for to sheede out blood at thee; thou
tokist vsure and oueraboundaunce, and
gredili, or coueytously, thou falsly chalengidist
thi nei&yogh;bours, and hast for&yogh;ete
me, seith the Lord God.
13 Loo! I haue
smytin togider myn hondis vpon thin
aueryce, or gredynes, which thou didist,
and vpon the blood that is shed out in
the mydil of thee.
14 Whether thin herte
shal susteyne, or thin hoondis shulen
haue power in the dais whiche I shal
make to thee? Forsothe Y the Lord
spak, and Y shal doo.
15 And I shal scater
thee in to naciouns, and I shal wyndewe,
`or blowe, thee in to loondis; and I shal
make thi vnclennes to fayle fro thee,
16 and I shal weelde thee in the si&yogh;t of
heithen men; and thou shalt wyte, for I
the Lord.
17 And the word of the Lord is
maad to me,
18 seiynge, Sone of man, the
hous of Israel is turnyd in to drosse, or
syndre; alle thes bras, and tyn, and yren,
and leed, in the mydil of fourneys, ben
maad drosse of siluer.
19 Therfor thes
thingis seith the Lord God, For that
that &yogh;e alle ben turned in to drosse, therfor
loo! I shal gedre &yogh;ou in the mydil of
Jerusalem,
20 a gedrynge of siluer, and bras,
and yren, and tyn, and leed, in the mydil
of the fourneys; and I shal teende a fier
in it, to welle togidre; so Y shal gedre
&yogh;ou in my woodnes, and in my wraththe,
and I shal reste a&yogh;en. And I shal welle
&yogh;ou togidir,
21 and I shal gadre &yogh;ou, and
I shal kyndil &yogh;ou in fier of my woodnes,
and &yogh;e shulen be wellid togidre in the
mydil of it.
22 As siluer is wellid togidre
in mydil of the fourneis, so shulen &yogh;e be
-- --
in the mydil of it; and &yogh;e shulen wite, for
Y the Lord, whanne Y haue shedde out
myn indignacioun vpon &yogh;ou.
23 And the
word of the Lord is maad to me, seiynge,
Sone of man,
24 sey to it, Thou art the vnclene
loond, not reynyd togidir in the
dai of woodnes.
25 Coniurisoun of prophetis
in the mydil of it; as a lioun rorynge
and takynge pray, thei deuoureden
soule, or lijf, of the nedi man, and thei
token priys; thei multiplieden widewis
of it in the mydil of it.
26 The preestis of
it dispiseden my lawe, and defouleden
my seyntuaries; thei hadden no difference
bitwix hooli and vnhooli, thei vndirstoden
not bitwixe vnclene and clene thing; and
thei turneden awey her eyen fro my sabotis,
and Y was defoulid in the mydil
of hem.
27 The princis of it in the mydil
of it as wulues rauyshynge pray, for to
shede out blood, and for to lese soulis,
and gredili suynge wynnyngis.
28 Forsothe
the prophetis of it dawbiden hem with
outen temperure, seynge veyn thingis,
and dyuynynge lesynges to hem, seiynge,
Thes thingis seith the Lord God, whanne
the Lord spak not.
29 Puplis of the loond
falsli chalengiden fals chalenge, and violentli
rauysheden the nedi man, and tourmentiden
the pore man; and thei oppressiden
the cumlynge with fals chalenge,
with outen doom.
30 And Y sou&yogh;te `of
hem a man, that shulde bitwene putte
an hegge, and stonde sette euen a&yogh;ens
me fro the loond, leste Y shulde distruye
it, and Y foond not.
31 And Y shedde out
myn indignacioun vpon hem, and in the
fier of my wraththe Y waastide hem; Y
&yogh;eelde the weye of hem in to the heed of
hem, seith the Lord God.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
