Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVIII.
1 And the word of the Lord is maad to
me,
2 seiynge, What is it, that amonge &yogh;ou
&yogh;e turnen a parable in to this prouerbe,
in the loond of Israel, seyynge, The fadris
eeten a soure grape, and the teeth
of sones wexen on egge?
3 Y lyue, seith
-- --
the Lord God, if this parable shal be
more to &yogh;ou in to a prouerbe in Israel.
4 Loo! alle soulis ben myne; as the soule
of the fadir, so and the soule of the
sone is myne. The soule that shal synne,
the ilk shal die.
5 And if a man shal be
iust, and shal doo doom and ri&yogh;twisnes,
he shal not ete in the hillis,
6 and shal not
reyse his eyen to the ydolis of the hows
of Israel; and he shal not defoule the wijf
of his nei&yogh;bour, and shal not go to a
menstruat womman, or in vnclene blood
flowing;
7 and he shal not make a man
sorewful, he shal &yogh;eelde the wed to the
dettour, and he shal rauysshe no thing
bi strength, he shal &yogh;yue his breed to the
hungrynge, and he shal hille the nakid
with clothing;
8 he shal not leene to
vsure, and shal not take more; he shal
turne awey his hoond fro wickidnes, and
he shal doo verre dom bitwix man and
man;
9 and shal walke in my comaundementis,
and shal kepe my domys, that
he doo treuth; he this is iust, in lijf he
shal lyue, seith the Lord God.
10 That if
he shal gendre a sone, theef, shedynge
out blood,
11 and shal doo oon of thes, and
sotheli not doynge alle thes, but etynge
in mounteyns, and defoulynge the wijf
of his nei&yogh;bour;
12 makynge the nedy and
pore sorewful, rauyshynge raueyns, not
&yogh;eeldynge wed, reisynge his eyen to
ydolis, doynge abomynacioun;
13 &yogh;yuynge
to vsure, and takynge more; whether he
shal lyue? he shal not lyue; whanne he
shal doo alle thes cursyd thingis, he shal
die bi deeth, the blood of hym shal be in
hym.
14 That if he shal gendre a sone,
whiche seynge alle thes synnes of his
fader, which he hath don, shal drede,
and not doo liche thing to hem;
15 shal not
eete in hillis, and shal not reyse his eyen
to the ydolis of the hows of Israel; and
shal not defoule the wijf of his nei&yogh;bour,
and shal not make a man sorewful,
16
shal not withholde a wed, and shal not
-- --
rauyshe raueyne, shal &yogh;yue his breed to
the hungrynge, and shal hille the nakid
with clothing;
17 shal turne awei his hoond
fro wroong of the pore man, shal not
take vsure and ouere-aboundance, and
shal doo my domys, shal walke in my
preceptis; this man shal not die in the
wickydnes of his fadir, but in lijf he shal
lyue.
18 The fadir of hym, for he dide fals
chalenge, and dide strengthe, or violence,
to his brother, and wrou&yogh;te yuel thing in
the mydil of his puple, loo! he is deed
in his wickidnes.
19 And &yogh;e seyn, Whi
berith not the sone the wickidnes of his
fader? That is for to wite, for the sone
wrou&yogh;te doom and ri&yogh;twisnes, he kepte
alle my preceptis, and dide hem, in lijf
he shal lyue, seith the Lord God.
20 The
soule that shal synne, the ilke shal die;
the sone shal not bere the wickidnes of
the fader, and the fadir shal not bere the
wickidnes of the sone; the ri&yogh;twisnes of
the iust man shal be vpon hym, and the
vnpitousnes of the vnpitous man shal be
vpon hym.
21 Forsothe if the vnpitous
man shal doo penaunce of alle his synnes
whiche he hath wrou&yogh;te, and shal kepe
alle myn heestis, and shal doo doom and
ri&yogh;twisnes, in lijf he shal lyue, and he
shal not die.
22 I shal not haue mynde of
alle the wyckidnessis whiche he wrou&yogh;te;
`in his ri&yogh;twisnesse whiche he wrou&yogh;t, he
shal lyue.
23 Whether the deeth of the
vnpitous man is of my wil, seith the
Lord God, and not that he be conuertid
fro his weies, and lyue?
24 Forsothe if a
iust man shal turne hym a wei fro his
ri&yogh;twisnes, and shal doo wickidnes, after
alle the abomynaciouns whiche the vnpytous
man is wont for to worche, whether
he shal lyue? Alle his ri&yogh;twisnessis
whiche he dide, shulen not be recordid;
in the trespassynge in which he trespasside,
and in the synne in which he
synnede, in hem he shal dye.
25 And &yogh;e
seiden, The weie of the Lord is not euen.
-- --
Therfor here &yogh;e, hous of Israel, whether
my weye is not euen, and not more &yogh;oure
weies ben shrewid?
26 Forsothe whanne a
iust man shal turne awei him fro his
ri&yogh;twisnes, and shal do wickidnes, he shal
die in hem, in the vnri&yogh;twisnes which
he wrou&yogh;t, he shal die.
27 And whanne the
vnpitous man shal turne hym awey fro
his vnpite which he wrou&yogh;te, and shal
doo doom and ri&yogh;twisnes, he shal quykne
his soule.
28 Forsothe biholdynge and turnynge
awei hym fro alle his wickidnessis
whiche he wrou&yogh;te, he shal lyue in lijf,
and shal not die.
29 And the sones of Israel
seyn, The weie of the Lord is not euen.
Whether my weies ben not euen, &yogh;e hous
of Israel, and not more &yogh;oure weies ben
shrewid?
30 Therfor I shal deme eche man
after his weies, &yogh;e hous of Israel, seith
the Lord God. Be &yogh;e conuertid, and doo
&yogh;e penaunce fro alle &yogh;our wyckidnessis,
and wickidnes shal not be to &yogh;ou in to
falling doun.
31 Caste &yogh;e awei fro &yogh;ou alle
&yogh;our trespassyngis, in whiche &yogh;e han trespasside,
and make &yogh;e to &yogh;ou a newe herte
and a newe spirite, and whi shulen &yogh;e
die, hous of Israel?
32 For I wole not the
deeth of the diynge, but that he be conuertid
and lyue, seith the Lord God;
turne &yogh;e a&yogh;en, and lyue.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
