Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVII.
1 And the word of the Lord is maad to
me,
2 seyynge, Sone of man, put forth a
derk ensaumple, or hard questioun, and
telle a parable to the hous of Israel;
and thou shalt seye,
3 Thes thingis seith
the Lord God. A greet egle of grete
weengis, with long ledynge of membris,
ful of fetheris and dyuersite, cam to the
Liban, and took the merou&yogh; of cedre.
4 He drow&yogh; of the hei&yogh;nes of his bouwis,
or braunches, and bare it ouer `in to the
loond of Canaan; in the citee of marchauntis
he puttide it.
5 And he took of
the seed of the erthe, and puttide it in
the erthe for seed, that he shulde make
sad the root vpon manye watris; in the
ouermest paart he puttide it.
6 And
whanne it had buriounede, it wexede in
to a brodder viyn &yogh;erd, in lowe stature,
the braunches `of it beholdinge to it,
and the rootis therof weren vndir it;
therfor it is maad in to a viyn&yogh;erd, and
made fruyte in to siouns, and sente out
braunchis.
7 And another greet egle is
maad, with greet weengis, and manye
fethers; and loo! this viyn&yogh;erd as sendynge
his rootis to it, stretchide out his
-- --
siouns to it, that it moystide it of the
litil placis of his buriounynge.
8 That in
good erthe vpon many waters is plauntid,
that it make bouwis, and bere fruyte,
that it be in to a greet viyn&yogh;erd.
9 Sey
thou, Thes thingis seith the Lord God,
Therfor whether it shal haue prosperite?
Whether he shal not drawe vp the rote
of it, and shal distruye the fruytis of it?
And he shal drye alle the syouns of his
buriounynge, and it shal wexe drye; and
not in a greet arme, nether in myche
puple, that he shulde drawe it vp bi the
roote.
10 Loo! it is plauntid; therfor whether
it shal haue prosperite? Whether
whanne a brennynge wynde shal touche
it, it shal not be dried, and it shal dwyne
awey in the placis of his buriounynge?
11 And the word of the Lord is maad to
me,
12 seiynge, Sey thou to the hows terrynge
to wraththe, Witen &yogh;e not what
thes thingis bitoknen? Sei thou, Loo! the
kyng of Babiloyne cometh in to Jerusalem;
and he shal take the kyng and his
princes, and he shal lede hem to hym
self in to Babiloyne.
13 And he shal take
of the seed of the rewme, and he shal
smyte a boond of pees with it, and of it
he shal resseyue an ooth; but and he shal
take a wei the stronge men of the loond,
that the rewme be lowe,
14 and be not
reisid vp, but kepe the couenaunt of hym,
and kepe it, or saue.
15 Whiche goynge
a wey fro hym, sente messageris to Egipt,
that he shulde &yogh;yue to hym horsis and
myche puple. Whether he shal haue
prosperite, or shal gete helth, which
dide thes thingis? and he that vndoth a
couenaunt, whether he shal askape?
16 Y
lyue, seith the Lord God, for in the
place of the kyng that made hym kyng,
whos ooth he made voyd, and brak the
couenaunt that he hadde with hym, in
the mydil of Babiloyne he shal die.
17 And
not in greet oost, nether in myche puple
-- --
Pharao shal make batayle a&yogh;ens hym, in
castynge of an heep of erthe, and in
bildynge of paalis, that he slee many
soulis.
18 Forsothe he dispiside the ooth,
that he shulde breke the boond of pees,
and loo! he &yogh;af his hoond; and whanne
he hath do alle thes thingis, he shal not
skape.
19 Therfor thes thingis seith the
Lord God, I lyue, for I shal putte in to
his heed the ooth that he dispiside, and
the boond of pees that he brak.
20 And
I shal holde forth vpon hym my nette,
`and he shal be cacchid in my nette, and
Y shal lede hym in to Babiloyne; and Y
shal deme hym in the trespassynge, in
which he dispiside me.
21 And alle the
fleers of hym with al his company shulen
falle togidre in swerd, forsothe the residues
shulen be scatered in to eche wynd;
and &yogh;e shulen wite, for I the Lord haue
spoken.
22 Thes thingis seith the Lord
God, And Y shal take of the merew&yogh; of
the hee&yogh; cedre, and I shal putte of the
cop of his braunchis; the tendre I shal
distreyne, and Y shal plaunte vpon an
hei&yogh; hil, and fer aperynge.
23 And in the
hei&yogh; hil of Israel Y shal plaunte it; and
it shal brest vp in to buriownynge, and
shal make fruyte, and shal be in to a
greet cedre, and alle briddis shulen dwelle
vndir it; al volatile shal make nestis
vndir the shadewe of his bouwis.
24 And
alle the trees of the cuntre shulen wite,
for Y the Lord haue mekid the hei&yogh; tree,
and reyside the meke tree, and Y driede
the grene tree, and Y made the drye tree
for to florisshe; Y the Lord spak, and
Y dide.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
