1   And the word of the Lord is maad to me, 2   seiynge, Sone of man, mak thou knowyn to Jerusalem her abomynaciouns; and thou shalt seie, 3   Thes thingis seith the Lord God. Jerusalem, thi roote and thi generacioun, of the loond of Chanaan; thi fader Amorrei, and thi moder Cethei. 4   And whanne thou art born, in the dai of

thi birth thi naule is not before kit, and in water thou art not wasshen in to helth, nether bi salt saltid, nether wlappid in clothis. 5   Myn eye sparide not vpon thee, that I shulde doo to thee oon of thes thingis, Y hauynge mercie of thee; but thou art cast forth vpon the face of erthe, in the castynge a wei of thi soule, in the dai in which thou art born. 6   Forsothe Y passinge bi thee, saw&yogh; thee for to be defoulid in thi blood; and I seide to thee, whanne thou were in thi blood, Lyue thou; sotheli Y seide to thee in thi blood, Lyue thou. 7   And I &yogh;aue thee multipliede as buriounynge, or seed, of the feeld, and thou art multiplied, and maad greet; and thou wentist in, and thou parfietli camest to wommanus aparaile; thi breestis, or teetis, waxeden greete, and thin heer buriounede; and thou was nakid, and ful of confusioun. 8   And I passide bi thee, and Y see&yogh; thee, and loo! thi tyme, `the tyme of louers; and Y stretchide forth my clothinge vpon thee, and Y hilide thi shame. And Y swore to thee, and Y entride in couenaunt with thee, seith the Lord God, and thou art maad boundyn to me. 9   And I wasshide thee in water, and Y clenside thi blood of thee, and anoyntide thee with oyle. 10   And I clothide thee with clothis of dyuerse colours, and shodde thee with iasynct; and I girde thee with bijs, or whijt silk; 11   and I clothide thee with sotil thingis, and Y ournede thee with ournementis. 12   And I &yogh;af ryngis in thin hoondis, and a bee about thi necke; and I &yogh;aue a reng vpon thi mouth, and ceerclis to thin eeris, and a coroun of fayrnes in thi heed. 13   And thou art ourned with gold and siluer, and thou art clothid with bijs and with clooth many foold steyned with rounde ymagis, and with manye colours. Thou hast etyn flour, and hony, and oyle, and myche thou art maad fayr; and thou profitidist in to a rewme, 14   and thi name is gon out in to hethen men for thi fairnes;

and thou wast perfit in my fairnes, which Y hadde putte vpon thee, seith the Lord. 15   And thou hauynge trust in thi fairnes, hast don fornycacioun in thi name; and thou hast putte thi fornycacioun to eche man passynge, that thou were maad his. 16   And thou takynge of my clothingis, madist to thee hei&yogh; thingis, on eche side sewide togidre; and thou hast don fornicacoun vpon hem, as it was not don bifore, nether is to beynge. 17   And thou tokist the vessels of thi fairnes, of my gold and of my siluer, whiche Y &yogh;aue to thee; and thou madist to thee ymagis of men, and didist fornycacioun in hem. 18   And thou tokist thi clothingis of manye colours, and thou was clothid in hem; and thou puttidist myn oyle and my tymyame, or encense, in the si&yogh;t of hem. 19   And my breed, which I &yogh;aue to thee, flour, and oyle, and honye, with whiche Y nurshide thee, thou puttidist in the si&yogh;te of hem, in to odour of swetnes; and it is don, seith the Lord God. 20   And thou tokist thi sones and dou&yogh;tris, whom thou gendredist to me, and offredist to hem, for to be deuourid. Whether thi fornycacioun is litil? 21   Thou offredist my sones, and &yogh;auest hem, togider halewynge to hem. 22   And after alle thin abomynaciouns and fornycaciouns, thou hast not mynde of the dais of thi &yogh;ongth, whanne thou was nakid, and ful of confusioun, thou was defoulid in thi blood. 23   And woo, woo bifelle to thee, after al thi malice, seith the Lord God. 24   And thou hast bildid to thee a bordel hous, and madist to thee hordom in alle stretis. 25   At eche heed of weie thou bildidist a tokne of thi hordom, and madist thi fayrnes abomynable; and departidist thi feet to eche man passynge, and multipliedist alle thi fornycaciouns. 26   And thou didist fornycacioun with sones of Egipt, thi nei&yogh;boris of grete flesshis, and multipliedist

thi fornycacioun, for to terre me to wraththe. 27   Loo! Y shal hoolde forth myn hoond vpon thee, and Y shal take a wey thi iustifiynge; and Y shal &yogh;yue thee in to the hoondis of the hatynge thee, of the dou&yogh;tris of Palestyn, that shamen in thi cursid weie. 28   And thou hast don fornycacioun in the sones of Assiriens, for that thou was not &yogh;it fulfillid; and after that thou didist fornycacioun, nether so thou art swagid. 29   And thou multipliedist thi fornycacioun in the loond of Canaan with Caldeis, and nether so thou art fulfillid. 30   In what thing shal Y clense thin herte, seith the Lord God, whanne thou dost alle thes werkis of a womman hoore, and bold to hordom? 31   For thou hast forgid thi bordel hous in the heed of eche weie, and thou madist thin hei&yogh;e thingis in eche strete; nether thou art maad as an hoore anoyed, or ful of werynes, 32   encresynge prijs, but as a womman auowtresse, the whiche ledith in aliens vpon hir husboond. 33   To alle hooris hijris ben &yogh;ouen, forsothe thou hast &yogh;ouun hijre, or mede, to alle thi loueris; and thou &yogh;auist to hem, that thei shulden entre to thee on eche side, for to doo fornycacioun with thee. 34   And it is don in thee a&yogh;en the custom of wymmen in thi fornycaciouns, and after thee shal not be fornycacioun; forsothe in that thing that thou &yogh;auest hijris, and resseyuedist not hijris, the contrarie is don in thee. 35   Therfor, thou hoore, here the word of the Lord. 36   Thes thingis seith the Lord God, For thi monee is shed out, and thin euyl fame is shewid in thi fornycaciouns vpon thi loueris and vpon thin idolis of thin abomynaciouns, in the blood of thi sones, whom thou hast &yogh;ouen to hem; loo! 37   Y shal gedre alle thi loueris, with whom thou art meynd, and alle men whom thou louedist, with alle men whom thou hatidist; and Y shal gadre hem vpon thee on eche side, and Y shal make nakid thin

yuel fame before hem, and alle shulen see thi filth. 38   And I shal deme thee with domes of auoutressis, and of shedynge blood; 39   and Y shal &yogh;yue thee in to blood of woodnesse, and enuye. And Y shal &yogh;eue thee in to the hoondis of hem, and thei shulen distruye thi bordel hous, and thei shulen distruye thin hoore hous; and thei shulen make thee nakid fro thi clothis, and shulen take a wei the vesselis of thi feirnes, and thei shulen forsake thee nakid, and ful of yuel fame. 40   And thei shulen lede to vpon thee a multitude, and thei shulen stoone thee with stoonus, and thei shulen slee thee with her swerdis. 41   And thei shulen togider brenne thin housis in fier, and thei shulen doo domys in thee, in the eyen of ful manye wymmen; and thou shalt faile, or ceese, for to do fornycacioun, and thou shalt namore &yogh;yue hijris. 42   And myn indignacioun shal reste in thee, and my loue shal be takyn awei fro thee; and I shal reste, nether Y shal be wrooth more, 43   for that that thou haddist not mynde of the dais of thi &yogh;ongth, and hast terrid me to wraththe in alle these thingis. Wherfor and Y haue &yogh;ouen thi weies in thin heed, seith the Lord God, and Y dide not after thi greet trespassis, in alle thin abomynaciouns. 44   Loo! eche man that seith euery where, or comounli, a prouerbe in thee, shal take it to, seiynge, As the modir, so and hir dou&yogh;ter. 45   Thou art the do&yogh;ter of thi modir, which castide a wei hir husboond and hir sones; and the sister of thi sistris, whiche castiden awey her husbondis and her sones. Thi modir Cethei, and thi fader Ammorrei; and thi more sister Samarie, 46   she and hir dou&yogh;tris, that dwellen at thi left side. Forsothe thi sister lasse than thou, that dwellith at thi ri&yogh;t half, Sodom and hir dou&yogh;tris. 47   But nether thou hast gon in the weies of hem, nether thou hast don after her grete trespassis; almest a litil

lesse gretter trespassis thou hast don than thei, in alle thi weies. 48   Y lyue, seith the Lord God, for Sodom, thi sister, dide not, she and hir dou&yogh;tris, as thou didist and thi dou&yogh;tris. 49   Loo! this was the wickidnes of Sodom, thi sister, prijde, and fulnes of breed, or glotonye, and aboundaunce, or plente, and idilnes of hir, and hir dou&yogh;tris; and thei dressiden not the hoond to the nedi and pore. 50   And thei ben lift an hei&yogh;, and diden other abomynaciouns before me; and Y dide hem a wei, as thou hast seen. 51   And Samarie synnede not the half of thi synnes, but thou hast ouercomen hem in grete trespassis, and hast iustified thi sistris in alle thin abomynaciouns, whiche thou wrou&yogh;tist. 52   Therfor and thou bere thi confusioun, which hast ouercomyn thi sistris with thi synnes, doynge more cursidli than thei; forsothe thei ben iustified of thee. Therfor and thou be confoundid, and ber thou thin yuel fame, the which hast iustifiede thi sistris. 53   And Y restorynge shal conuerte hem with the turnynge togidre of Sodom and hir dou&yogh;tris; and Y shal conuerte thi turnynge a&yogh;en in the mydil of hem, 54   that thou bere thin yuel fame, and be confoundid in alle thingis whiche thou didist, coumfortynge hem. 55   And thi sister Sodom and hir dou&yogh;tris shulen turne a&yogh;en to her oldenes; and Samarie and hir dou&yogh;tris shulen turne a&yogh;en to her oldenes; and thou and thi dou&yogh;tris turne a&yogh;en to &yogh;our oldenes. 56   Forsothe Sodom, thi sister, was not herde in thi mouth, 57   in the dai of thi pride, before that thi malice was shewid, as in this tyme, in to the shenship of dou&yogh;tris of Sirie, and of alle dou&yogh;ters of Palestyn in thi cumpas, that gon about thee bi enuyroun. 58   Thou hast born thi greet trespas, and thin yuel fame, seith the Lord God. 59   For thes thingis seith the Lord God, And I shal doo to thee as thou dispisedist the ooth, that thou madist the couenaunt voyd;

60   and Y shal haue mynde of my couenaunt with thee in the dais of thi &yogh;ongth, and I shal reise to thee couenaunt euerlastynge. And thou shalt haue mynde of thi weies, 61   and thou shalt be confoundid, whanne thou shalt resseyue thi sistris more than thou, with thi lesse; and Y shal &yogh;yue hem to thee in to dou&yogh;tris, and not of thi couenaunt. 62   And Y shal reise my couenaunt with thee, and thou shalt wite, for I the Lord, 63   that thou haue mynde, and be confoundid; and that it be namore to thee for to opyn the mouth, for thi confusioun, whanne Y shal be plesid to thee in alle thingis whiche thou hast don, seith the Lord God.

Previous section

Next section