Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. IV.
1 If thou shalt turne a&yogh;een, Irael, seith
the Lord, to me be conuertid; if thou
shalt take awei thin hurtende thingus
fro my face, thou shalt not be to-stirid.
2 And thou shalt swern, The Lord lyueth,
in treuthe and in dom and in ri&yogh;twisnes;
and blissen shul hym folc of kinde, and
hym preisen.
3 These thingus forsothe
seith the Lord to the man of Juda and
to the dwellere of Jerusalem, Newith to
&yogh;ou a newe tilid lond, and wileth not
sowen vp on thornes.
4 Beth circumcidid
to the Lord, and doth awei the vtmost
&yogh;erde felles of &yogh;oure hertes, &yogh;ee men of
Juda, and dwelleris of Jerusalem; lest
parauenture go out as fyr myn indignacioun,
and be tend vp, and ther be not
that quenche, for the malice of &yogh;oure
tho&yogh;tus.
5 Telleth out in Juda, and in
Jerusalem maketh herd; speketh, and
syngeth with a trumpe in the lond; crieth
strongli, and seith, Beth gedered, and
go wee in the strengthid cites.
6 Rereth
a tocne in Sion, beth coumfortid, and
wileth not stonde; for euel I bringe to
fro the north, and a gret to-treding.
-- --
7 Ste&yogh;ede vp a leoun fro his couche, the
reuere of Jentilis hymself shal reren.
He wente out fro his place, that he pute
thi lond `in to wildernesse; thi citees
shul be wastid, abidende stille withoute
dwellere.
8 Vp on this gird &yogh;ou aboute
with heires; weileth, and &yogh;ellith, for
turned awei is not the wrathe of the
wodnesse of the Lord fro &yogh;ou.
9 And it
shal be, in that dai, seith the Lord, pershen
shal the herte of the king, and the
herte of princes; and become stoneid shul
the prestis, and profetes in mynde shul
be disturbid.
10 And I seide, Allas! allas!
allas! Lord God; thanne whether hast
thou not bigilid this puple and Jerusalem,
seiende, Pes shal be to &yogh;ou, and lo!
ful comen is swerd vn to the soule?
11 In
that tyme shal be seid to this puple and
to Jerusalem, Brennende wynde in the
weies that ben in desert, weies of the
do&yogh;ter of my puple, not to wynewen, and
to purgen.
12 A spirit ful of these shal
come to me; and now Y, but I shal speke
my domes with them.
13 Lo! as a cloude
he shal ste&yogh;en vp, and as tempest his
chares; swiftere than eglis his hors; wo
to vs, for wastid wee ben.
14 Wash fro
malice thin herte, thou Jerusalem, that
thou be mad saaf. Hou longe shuln
abyde in thee no&yogh;ous tho&yogh;tes?
15 The vois
forsothe of the tellende fro Dan, and of
the knowen makende the mawmet fro
the hil of Effraym.
16 Stereth, &yogh;ee Jentiles;
lo! herd it is in Jerusalem keperes to
come fro a ferr lond, and to &yogh;yue vp on
the cites of Juda ther vois.
17 As keperes
of feeldis thei ben mad vpon it in cumpas;
for me to wrathe it terrede, seith
the Lord.
18 Thi weies and thi tho&yogh;tus
diden to thee these thingus; this thi malice
for bitter, for it touchede thin herte.
19 My wombe I ake, my wombe I ake; the
wittus of myn herte ben disturbid in me.
I shal not be stille, for the vois of the
-- --
trumpe herde my soule, cry of the bataile.
20 To-treding vp on to-treding is clepid, and
wastid is al erthe; feerli ben wastid my
tabernacles, sodeynly my skynnes.
21 Hou
longe shal I seen a man fleende, heren
shal Y the vois of the trumpe?
22 For my
fool puple me kne&yogh; not; vnwise sonus
thei ben, and couwardus; wise thei ben
that thei do eueles, wel forsothe do thei
kunne not.
23 I beheeld the erthe, and lo!
voide it was, and of no&yogh;t; and heuenus,
and ther was not li&yogh;t in them.
24 I sa&yogh;
mounteynes, and lo! thei weren moued,
and alle hillis ben disturbid.
25 Y beheeld,
and ther was not a man, and eche foul
of heuene wente awey.
26 I beheeld, and
lo! Carmel desert, and alle hys cites ben
destro&yogh;ed fro the face of the Lord, and
fro the face of the wrathe of his wodnes.
27 These thingus forsothe seith the Lord,
Desert shal ben eche lond, but nerthelatere
ful ending Y shal not do.
28 Weile
shal erthe, and sorewen shul heuenus fro
aboue, for thi that Y spac; I tho&yogh;te, and
it otho&yogh;te not me, ne Y turned awei fro
it.
29 Fro the vois of the horse man, and of
the sendende an arwe flei&yogh; al the cyte;
thei wenten in hard thingus, and ste&yogh;eden
vp on roches; alle the chef cites ben forsaken,
and dwellith not in them a man.
30 Thou forsothe wastid, what shalt thou
do? Whan thou shalt clothe thee with
rede silc, whan thou shalt be enourned
with the goldene broche, and schal
peynte thin e&yogh;en with strumpetes oynement,
in veyn thou `shalt ben araied;
dispiside thee han thi loueres, thi lif thei
shul sechen.
31 A vois forsothe as of the
trauailende with child I herde, anguysshes
as of the child berere; vois of
the do&yogh;ter of Syon among men diende,
and strecchende out ther hondus; Wo to
me, for failide my lif for the slayne.
-- --
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|