Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. V.
1 Goth aboute the weies of Jerusalem,
and looketh, and beholdeth, and secheth
in his stretes, whether &yogh;ee fynde a man
doende dom, and sechende feith; and
merciful Y shal be to hem.
2 That if also,
The Lord lyueth, thei `shul sey, and
that falsly thei shuln swern.
3 Lord, thin
e&yogh;en biholden feith; thou hast smyte them,
and thei soreweden not; thou to-treede
them, and thei forsoken to taken discipline;
thei inwardli hardeden ther faces
vp on the ston, and wolden not be turned
a&yogh;een.
4 I forsothe seid, Par auenture pore
men thei ben, and foolis, vnknowende the
weie of the Lord, the dom of ther God.
5 I shal go therfor to the cheef men, and
speke to them; thei forsothe knewen the
weie of the Lord, and the dom of ther
God. And lo! more these togidere al to-breeken
the &yogh;oc, and brosten out the
bondis.
6 Therfore hath smyte them a
leoun of the wode; a wlf at euen wastede
them, a parde wakende vp on the
cites of them. Eche that shal gon out
of them, shal be take; for multeplied ben
the lawe brekyngus of them, coumfortid
ben the turnyngus awei of them.
7 Vp
on what thing to thee plesid shal Y
moun be? Thi sonus forsoken me, and
swern in tho thingus that ben not godis.
I fulfilde them, and thei diden fornycacioun,
and in the hous of the strumpet
thei diden leccherie.
8 Horses loueres in to
wymmen, and courseres thei ben mad;
eche to the wif of his ne&yogh;hebore ney&yogh;ede.
9 Whether vp on these thingus Y shal not
visite, seith the Lord, and in such a folc
of kinde shal not be vengid my soule?
10 Ste&yogh;eth vp his wallis, and scatereth; ful
wasting forsothe wileth not do. Doth
awei his forthgetingus, for thei ben not
the Lordis.
11 Thur&yogh; lawe breking forsothe
`tresspasede a&yogh;en me the hous of Irael
-- --
and the hous of Juda, seith the Lord;
thei denyeden `the Lord,
12 and seiden, It
is not he, nether shal come vp on vs
euel; swerd and hunger wee shul not see.
13 The profetus speeken in to the wind, and
answere was not in them; these thingus
therfore out come shul to them.
14 These
thingus seith the Lord God of ostis, For
&yogh;ee speeken this wrd, lo! Y &yogh;yue my
wrdus in thi mouth in to fyr, and this
puple in to trees, and it shal deuoure
them.
15 Lo! Y shal bringe to vp on &yogh;ou
a folc of kinde fro aferr, of the hous of
Irael, seith the Lord; a stalwrthe folc
of kinde, an old folc of kinde, a folc of
kinde, whos tunge thou shalt vnknowe,
ne vnderstonde what it speke.
16 His
arewe cas as a sepulcre opene; alle stronge
men.
17 And it shal ete thi cornes, and
thi bred deuoure, thi sonus and thi do&yogh;tris;
it shal ete thi floc, and thi droues, and
shal eten thi vyne, and thi fige tree; and
to-brose thi strengthid cites, in whiche
thou hast trost, with swerd.
18 Nerthelatere
in tho da&yogh;es, seith the Lord, Y shal
not make &yogh;ou in to ful ending.
19 That if
&yogh;ee shul seye, Whi to vs dide the Lord
oure God alle these thingus? thou shalt
sei to them, As &yogh;ee han forsake mee, and
seruede to an alien god in &yogh;our lond, so
&yogh;ee shul serue to alien goddis in the lond
not &yogh;oure.
20 Telleth this to the hous of
Jacob, and herd maketh in Juda, seiende,
Here, thou fool puple, that hast not herte;
21
that hauende e&yogh;en, &yogh;ee seen not, and eres,
and heren not.
22 Me therfor &yogh;ee shul not
drede, seith the Lord, and fro my face
not sorewen? Which `Y putte grauel
terme to the se, euere durende heste,
that it shal not passe; and thei shul be
to-moued, and thei shul not moun; and
to-swelle shul his flodis, and shul not
passen it.
23 To this puple forsothe is mad
an herte mystrowende and oute sharpende;
thei wente bacward, and &yogh;iden
-- --
awei,
24 and seiden not in ther herte, Drede
wee the Lord oure God, that &yogh;yueth to
vs tymeli rein, and late comende in his
cesoun, plentenesse of &yogh;eres rip comende
to vs.
25 Oure wickenesses boweden doun
these thingus, and oure synnes defendeden
good fro vs.
26 For ther ben founden
in my puple vnpitous men, waitende as
fouleres, grenes puttende, and feet gynnes,
to ben ca&yogh;t men.
27 As a pit falle ful
of briddes, so the hous of hem ful of
treccherie. Therfore thei ben magnefied,
and richid inwardli,
28 grecid, and fattid,
and thei passeden biside my wrdus alther
werst; the cause of the widewe thei demeden
not, the cause of the faderles child
ri&yogh;t reuleden not, and the dom of pore
men demeden not.
29 Whether vp on these
thingus I shal not visiten, seith the Lord,
or `vp on such maner folc shal not be
vengid my soule?
30 Stoneyng and merueiles
ben mad in the erthe;
31 profetis
profecieden lesing, and prestus flappeden
for io&yogh;e with ther hondus, and my puple
louede suche thingus. What thanne shal
ben don in his laste?
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|