Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
PSALM CIV.
Alleluia, Alleluia.
1 noteKnoulecheth to the Lord, and inwardly
clepeth his name; telleth out among Jentilis
his werkis.
2 Singeth to hym, and
doth salm to hym, and tellith alle his
merueilis;
3 be &yogh;ee preisid in his holi
name. Glade the herte of &yogh;ou sechende
the Lord;
4 secheth the Lord, and beth
confermed; secheth his face euermor.
5 Haueth mynde of his merueilis, that he
dide; his wonders, and the domes of his
mouth.
6 The sed of Abraham, his seruaunt;
the sonus of Jacob, his chosen.
7 He the Lord oure God; in al erthe his
domes.
8 Myndeful he was in to the
world of his testament; of the woord that
he sente in to a thousend ieneraciouns.
9 The whiche he disposide to Abraham;
and of his oth to Isaac.
10 And he sette it
to Jacob in to an heste; and to Irael in
to euere lastende testament.
11 Seiende, To
thee I shal &yogh;eue the lond of Chanaan; the
litle corde of &yogh;oure eritage.
12 Whan thei
weren in short noumbre; most fewe and
tilieris of it.
13 And thei passiden thur&yogh;
fro folc in to folc; and fro reume in to
an other puple.
14 He lafte not a man to
no&yogh;e to them; and he chastiside for hem
kingis.
15 Wileth not touche my cristis;
and in my profetis wileth not ben waried.
16 And he clepide hungir vp on the erthe;
and alle fastnesse of bred he to-ponede.
17 He sente beforn hem a man; and into a
thral Joseph is sold.
18 Thei mekeden in
stockis his feet, iren passide thur&yogh; hys
lif;
19 to the time that his woord shulde
come. The speche of the Lord enflaumede
hym;
20 the king sente and loosede
hym, the prince of puplis and lafte hym.
21 He sette hym lord of his hous; and
prince of all his possessioun.
22 That he
-- --
shulde enforme his princis as hymself;
and his olde men prudence he shulde
teche.
23 And Irael entride in to Egipt;
and Jacob a tiliere was in the lond of
Cham.
24 And he encrecide his puple
hugely; and fastnede hym vpon his enemys.
25 He turned the herte of hem, that
thei hateden his puple; and treccherie
shulden do in to his seruauns.
26 He sente
Moises, his seruaunt; and Aron, hym
whom he ches.
27 And he putte in hem
the woordis of his tocnes; and of his
wonders in the lond of Cham.
28 He sente
dercnessis, and made derc; and vntymely
he fullfilde not his woordis.
29 And he
turnede the watris of hem in to blod;
and slo&yogh; the fisshis of hem.
30 And the
lond of hem &yogh;af froggis; in the preue
chaumbris of ther kingus.
31 He seide,
and ther cam an hound flee&yogh;e; and
gnattis in alle the coostis of hem.
32 And
he putte the reynes of hem hayl; fyr
brennende in the lond of hem.
33 And he
smot the vynes of hem, and the fige
placis of hem; and he to-broside the
wode of the coostis of hem.
34 He seide,
and ther cam a locust; and worte werm
of the whiche was no noumbre.
35 And it
eet al the hei in the lond of hem; and eet
al the frut of the lond of hem.
36 And he
smot alle the firste goten in the lond of
hem; the firste frutis of alle the trauaile
of hem.
37 And he bro&yogh;te hem out with
syluer and gold; and ther was not a syk
man in the linagis of hem.
38 Egipt
gladede in ther forth going; for ther
drede lai in vp on hem.
39 He stra&yogh;te out
a cloude, in to the proteccioun of hem;
and fyr, that he shulde li&yogh;te to hem by
the ny&yogh;t.
40 Thei askeden, and ther kam a
kurlu; and with the bred of heuene he
fulfilde hem.
41 He to-brac the ston, and
ther flowiden watris; ther wenten awei
flodis in the drie.
42 For myndeful he
was of his holi woord; that he hadde to
-- --
Abraham, his child.
43 And he bro&yogh;te out
his puple in ful out io&yogh;ing; and his
chosene in glading.
44 And he &yogh;af to them
the regiouns of Jentilis; and the traualis
of puplis thei weldeden.
45 That thei kepe
his iustifiyngus; and his lawe they a&yogh;een
seche.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
