Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXXVIII.
1 Answerende forsothe the Lord to Job
fro the whirlewind seide,
2 Who is this,
wrappende in sentencis with woordis vnwise?
3 Gird as a man thi leendis; I shal
aske thee, and thou answere to me.
4 Wher
were thou, whan I sette the foundemens
of the erthe? sheu to me, if thou
hast vnderstonding.
5 Who putte the mesuris
of it, if thou hast knowen? or who
stra&yogh;te vp on it a line?
6 Vp on what the
feet of it ben sad? who dide doun the
corner ston of it,
7 whan me shulden preise
-- --
togidere the morutid sterris, and alle the
sones of God shulden io&yogh;en?
8 Who closede
the se with doris, whan it brac out as
goende forth of the wombe?
9 Whan I
shuld setten the cloude his clothing, and
with dercnesse it, as with clothis of vnspekende
childhed, I wrappide aboute.
10 I enuyrounde it with my termes, and
sette the heenglis, and doris;
11 and seide,
Vnto hider thou shalt come, and no ferthere
gon; and heer thou shalt breke togidere
thi swellende flodis.
12 Whether aftir
thi rising thou comaundedist to the morutid,
and hast shewid to the dai spring his
place?
13 Whethir thou hast holde smytende
togidere the vtmostis of the erthe,
and hast smyten out the vnpitous men
of it?
14 The litle marke shal be restorid
as cley, and shal stonde as clothing.
15 His
li&yogh;t shal be take awei fro the vnpitous,
and the he&yogh;e arm shal be broke togidere.
16 Whether thou wentist in the depthe of the
se, and in the laste thingus of the derke
depthe of the se thou hast ful go?
17 Whether
to thee ben opened the &yogh;atis of deth,
and the derke doris thou hast seen?
18 Whether thou hast beholde the breede of
the erthe? Sheu to me, if thou hast
knowen alle thingis,
19 in what weie li&yogh;t
dwellith, and of dercnessis what is the
place;
20 that thou lede eche man to hys
termes, and vnderstonde the sties of his
hous.
21 Thou wistist thanne, that thou
were to be born, and the noumbre of thi
da&yogh;es thou haddest knowe?
22 Whether
wentist thou in to the tresoris of snow&yogh;,
or the tresoris of hail thou hast beholde?
23 that I haue maad redi in to the time of
the enemy, in to the dai of fi&yogh;t, and of
bataile.
24 Bi what weie is sprengd li&yogh;t,
deuyded is hete vp on erthe?
25 Who &yogh;af
to the most hidous weder cours, and weie
of the sounende thunder?
26 That it shulde
-- --
reyne vp on erthe withoute man, in
desert wher noon of dedly men dwelleth?
27 That he shulde fulfille the space withoute
wei and desolat, and bringe forth
grene erbis?
28 Who is the fader of reyn,
or who gat dropis of deu?
29 Fro whos
wombe wente out iys, and frost fro heuene
who gat?
30 In the licnesse of a ston watris
ben hardid, and the vtmost of the se
is streyned togidere.
31 Whether thou art
strong to ioyne the shynende seue sterres,
or thou shalt moun scatere the cumpas of
the north sterre?
32 Whether thou bringist
forth the dai sterre in his time, and the
euetid sterre vp on the sones of the erthe
thou makist to rise?
33 Whether thou hast
knowe the ordre of heuene, and shalt
putte his resoun in the erthe?
34 Whether
thou shalt rere thi vois in to a lytil
cloude, and the bure of watris shal couere
thee?
35 Whether thou shalt sende leitis,
and thei shul go, and turnende a&yogh;een
thei shul sey to thee, Wee be nee&yogh;h?
36 Who putte in the entrailis of a man wisdam,
and who &yogh;af to the cok vnderstonding?
37 Who shal tellen out the resoun of
heuenus, and the singing of heuene who
shal make to slepe?
38 Whanne was pouder
held in the erthe, and clottis weren
clunge togidere?
39 Whether thou shalt
take the prei of the leounesse, and the
soule of hir whelpis thou shalt fulfille,
whan thei lyn in dichis,
40 and in dennus
thei aspien?
41 Who maketh redi to the
crowe his mete, whan his briddis crie to
God, hider and thider waggende, forthi
that thei han no metis?
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|