Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XXVI.
1 Forsothe al the puple of Juda his sone,
Osie, of sexteen &yogh;eer, setten kyng for his
fadir Amazie.
2 He bild up Aylath, and
restored it to the lordschip of Juda, aftir
that the kyng slepte with his fadirs.
3 Of
sexteen &yogh;eer Osias was, whanne he hadde
begunne to regnen; and two and fyfty
&yogh;eer he regned in Jerusalem; name of his
modre, Yechelya, of Jerusalem.
4 And he
dide that was ri&yogh;t in the si&yogh;t of the Lord,
aftir alle thingus that Amazias, his fader,
hadde done.
5 And he sou&yogh;te the Lord in
the days of Zacharie, vndirstondinge and
seeing God; and whanne he schuld sechen
God, he louede hym in alle thingus.
6 Aftirward
he wente out, and fau&yogh;te a&yogh;einus
Philisteis, and he distruyede the wall of
Geth, and the wall of Jabnye, and the
wal of Azoty; and he bilde up bur&yogh;
towns in Azote of Phylisteym.
7 And the
Lord halpe hym a&yogh;eynus Philisteym, and
a&yogh;enus Arabas that dwelliden in Garbahal,
and a&yogh;enus Amonytis.
8 And Amonytis
spendiden the &yogh;iftis to Ozie, and his name
is puplischit vnto the entre of Egipt for
his oft victories.
9 And Ozias bilde up
toures in Jerusalem vpon the &yogh;ate of the
corner, and vpon the &yogh;ate of the valey,
and other in the same side of the wall;
and he fastnede hem.
10 And he bilde out
also toures in wildirnesse, and dalf out
many cysternes; forthi that he hadde
many beestis bothe in the wijlde feeldis
and in the wastite of desert. Also vynes
he hadde and wyne makers in hillis, and
-- --
in Carmele; forsothe he was a man &yogh;euen
to erth tyllyinge.
11 The hoost forsothe of
the fy&yogh;tynge men of hym, that wenten
forth to batayles, was vndir the hond of
Heiel, scribe, and Mazie, doctour, and vndir
the hond of Ananye that was of the
duykis of the kyng; and al the noumbre
of princis, by their meynees, of stronge
men two thousand and sexe hundrith.
13 And vndir hem al the hoost of thre hundrith
and seuen thousand and fyue hundrith,
that weren able to batail, and for
the king a&yogh;einus the enmyes fou&yogh;ten.
14 And
Ozias maad redy to hem, that is, to al
the hoost, tergetis, and speres, and helmes,
and hauberiouns, and bowes, and
slyngis to stones to ben throwen.
15 And
he maad in Jerusalem engynes of dyuerse
maner, the whiche he sette in
toures, and in the corners of wallis, that
thei schulden casten arewes and grete
stones; and his name is gon out aferre,
for thi that the Lord halpe hym, and
hadde strengthede hym.
16 Bot whanne he
was strengthed, his hert is arered in to
his deth; and he dispisede the Lord his
God; and gon in to the temple of the
Lord, he wolde brenne encense vpon the
autir of maad encense.
17 And anoon aftir
hym wente in Azarias, the preste, and
with hym prestis of the Lord, seuenty
men most worthi;
18 and thei withstoden
to the kyng, and seyden, Ozia, it is not
of thin office, that thou brenne encense to
the Lord, bot of the prestis of the Lord,
that is, of the sonus of Aaron, that ben
sacrid to syche a maner seruyse; go out
fro the seyntuarye, ne dispise thou; for
it schal not ben wijtyd to thee in to glorie
of the Lord God.
19 And Ozias is
wroth, and holdinge in the hond a censere,
that he brenne encense, he `thratt to
the prestis; and anoon ther is sprungen
-- --
a lepre in his forhede, before the prestis in
the hous of the Lord vpon the auter of maad
encense.
20 And whanne Azaria, the bischop,
hadde beholden hym, and alle the tother
prestis seen a lepre in his forhede, hastely
thei puttyn hym out; and he aferd hy&yogh;ede
to gon out; forthi that he hadde feelid
anoon the veniaunce of the Lord.
21 Thanne
Ozias was mesel vnto the day of his deth,
and dwellide in an hous seuered, ful of
lepre; for the whiche he was throwen out
fro the hous of the Lord. Bot Joathan,
his sone, gouernede the hous of the kyng,
and demede the puple of the lond.
22 The
remnaunt forsothe of the wordis of Ozie,
of the rather and of the last, wrote
Ysayas, the sone of Amos, prophete.
23 And Ozias slepte with his fadirs, and
thei biryeden hym not in the feeld of
kyngis sepulcres, forthi that he was leeprous;
and Joathan, his sone, regnede
for hym.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|