Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VIII.
1 And the men of Effraym seiden to
hym, What is this thing, which thou
woldist do, that thou clepidist not vs,
whanne thou &yogh;edist to batel a&yogh;ens Madian?
And thei chidden strongli, and
almest diden violence.
2 To whiche he
answeride, `What sotheli siche thing my&yogh;te
Y do, what maner thing &yogh;e diden? Whethir
a reisyn of Effraym is not betere
than the vindagis of Abiezer?
3 And the
Lord bitook in to &yogh;oure hondis the princes
of Madian, Oreb and Zeb. What sich
thing my&yogh;te Y do, what maner thing &yogh;e
diden? And whanne he hadde spoke
this thing, the spirit of hem restide, bi
which thei bolneden a&yogh;ens hym.
4 And
whanne Gedeon hadde come to Jordan,
he passide it with thre hundrid men, that
weren with hym; and for weerynesse thei
my&yogh;ten not pursue hem that fledden.
5 And
-- --
he seide to the men of Socoth, Y biseche,
&yogh;yue &yogh;e looues to the puple, which is
with me; for thei failiden greetli, that we
moun pursue Zebee and Salmana, kyngis
of Madian.
6 The princes of Socoth answeriden
in scorne, In hap the pawmes of
the hondis of Zebee and of Salmana ben
in thin hond, and therfor thou axist, that
we &yogh;yue looues to thin oost.
7 To whiche
he seide, Therfor, whanne the Lord schal
bitake Zebee and Salmana in to myn
hondis, and whanne Y schal turne a&yogh;en
ouercomere in pees, Y schal to-reende &yogh;oure
fleischis with the thornes and breris of
deseert.
8 And he stiede fro thennus,
and cam in to Phanuel; and he spak lijk
thingis to men of that place, to whom also
thei answeriden, as the men of Socoth
hadden answerid.
9 And so he seide to
hem, Whanne Y schal turne a&yogh;en ouercomere
in pees, Y schal distrie this tour.
10 Forsothe Zebee and Salmana restiden
with al her oost; for fiftene thousynde
men leften of alle the cumpenyes of the
`puplis of the eest, whanne an hundrid
and twenti thousynde of `fi&yogh;teris and of
men drawynge out swerd weren slayn.
11 And Gedeon stiede bi the weye of hem
that dwelliden in tabernaclis at the eest
coost of Nobe and of Lethoa, and smoot
the `tentis of enemyes, that weren sikur,
and supposiden not ony thing of aduersite.
12 And Zebee and Salmana fledden, whiche
Gedeon pursuede and took, whanne al `the
oost of hem was disturblid.
13 And he
turnede a&yogh;en fro batel bifor the `risyng of
the sunne note,
14 and took a child of the men
of Socoth; and he axide hym the names
of the princes and eldere men of Socoth;
and he descryuede seuene and seuenti men
in noumbre.
15 And he cam to Socoth, and
seide to hem, Lo Zebee and Salmana! of
whiche &yogh;e vpbreideden me, and seiden, In
-- --
hap the hondis of Zebee and of Salmana
ben in thin hondis, and therfor thou axist,
that we &yogh;yue looues to men, that ben weeri
and failiden.
16 Therfor Gedeon took the
eldere men of the citee, and thornes and
breris of deseert, and he to-rente with
tho, and al to-brak the men of Socoth;
also he destriede the tour of Phanuel,
17
whanne the dwelleris of the citee weren
slayn.
18 And he seide to Zebee and Salmana,
What maner men weren thei, whiche
&yogh;e killiden in Thabor? Whiche answeriden,
Thei weren lijk thee, and oon of
hem was as the sone of a kyng.
19 To
whiche he seide, Thei weren my britheren,
the sones of my modir; the Lord
lyueth, if &yogh;e hadden saued hem, Y `nolde
sle &yogh;ou.
20 And he seide to Jepther, his
firste gendrid sone, Rise thou, and sle hem.
Which drow not swerd; for he dredde,
for he was &yogh;it a child.
21 And Zebee and
Salmana seiden, Ryse thou, and falle on
vs; for thou art bi the age and strengthe
of man. Gedeon roos, and killide Zebee
and Salmana, and took the ournementis,
and bellis, with whiche the neckis of
kyngis camels ben wont to be maad fair.
22 And alle the men of Israel seiden to Gedeon,
Be thou lord of vs, thou, and thi
sone, and the sone of thi sone; for thou
deliueridist vs fro the hond of Madian.
23 To whiche he seide, Y schal not be lord
of &yogh;ou, nethir my sone schal be lord on
&yogh;ou, but the Lord schal be lord.
24 And he
seide to hem, Y axe oon axyng of &yogh;ou,
&yogh;yue &yogh;e to me the eere ryngis of &yogh;oure
prey; for Ismaelitis weren wont to haue
goldun eere ryngis.
25 Whiche answeriden,
We schulen &yogh;yue moost gladli. And thei
spredden forth a mentil on the erthe,
and castiden forth therynne `eere ryngis
of the prey;
26 and the wei&yogh;te of `eere ryngis
axid was a thousynde and seuene hundrid
siclis of gold, with out ournementis
-- --
and brochis and cloth of purpur, whiche
the kyngis of Madian weren wont to vse,
and outakun goldun bies of camels.
27 And
Gedeon made therof ephot, that is, a
preestis cloth, `and propir cloth of the
hi&yogh;este preest, and he puttide it in his
citee Ephra; and al Israel diden fornycacioun,
`that is ydolatrye, ther ynne;
and it was maad to Gedeon and to al his
hows in to fallyng note.
28 Forsothe Madian
was maad low bifor the sones of Israel,
and thei my&yogh;ten no more reise nollis;
but the lond restide fourti &yogh;eer, in whiche
Gedeon was souereyn.
29 And so Jerobaal,
sone of Joas, &yogh;ede, and dwellide in his
hows;
30 and he hadde seuenti sones, that
&yogh;eden out of his thi&yogh;, for he hadde many
wyues.
31 Forsothe a concubyn, `that is,
secoundarie wijf, of hym, whom he
hadde in Sichem, gendride to hym a sone,
Abymelech bi name.
32 And Gedeon, sone
of Joas, diede in good elde, and was biried
in the sepulcre of Joas, his fadir, in Ephra,
of the meynee of Ezri.
33 Forsothe aftir
that Gedeon was deed, the sones of Israel
turneden awey `fro Goddis religioun, and
diden fornycacioun, `that is, idolatrie,
with Baalym; and thei smytiden boond
of pees with Baal, that he schulde be to
hem in to God,
34 nether thei hadden mynde
of her Lord God, that delyuerede hem
fro the hond of alle her enemyes `bi cumpas;
35 nether thei diden merci with the
hous of Gerobaal Gedeon, bi alle the
goodis whiche he `hadde do to Israel.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
