Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. III.
1 Also wymmen be thei suget to her
hosebondis; that if ony man note bileue not
to the word, bi the conuersacioun of
wymmen thei be wonnun with out word.
2 And biholde &yogh;e in drede &yogh;oure hooli conuersacioun.
3 Of whiche `ther be not with
outforth curious ournyng of heer, ether
doyng aboute of gold, ethir ournyng of
clothing;
4 but thilke that is the hid man
of herte, in vncorrupcioun, and of mylde
spirit, which is riche in the si&yogh;t of God.
5 For so sumtyme hooli wymmen hopinge
in God ourneden hem silf, and weren
suget to her owne hosebondis.
6 As Sara
obeied to Abraham, and clepide hym
lord; of whom &yogh;e ben dou&yogh;tris wel
doynge, and not dredynge ony perturbacioun.
7 Also men dwelle togidre,
and bi kunnyng &yogh;yue &yogh;e onoure to the
wommanus freeltee, as to the more feble,
and as to euen eiris of grace and of lijf,
that &yogh;oure preieris be not lettid.
8 And in
feith alle of oon wille in preier be &yogh;e eche
suffringe with othere, loueris of britherhod,
merciful, mylde, meke;
9 not &yogh;eldinge
yuel for yuel, nether cursing for cursing,
but a&yogh;enward blessinge; for in this thing
&yogh;e ben clepid, that &yogh;e welde blessinge bi
eritage.
10 For he that wole loue lijf, and
se goode daies, constreyne his tunge from
-- --
yuel, and hise lippis, that thei speke not
gile.
11 And bowe he from yuel, and do
good; seke he pees, and perfitli sue it.
12 For the i&yogh;en of the Lord ben on iust men,
and hise eris on the preieris of hem; but
the cheer note of the Lord is on men that
don yuels.
13 And who is it that schal
anoye &yogh;ou, if &yogh;e ben sueris and louyeris
of goodnesse?
14 But also if &yogh;e suffren ony
thing for ri&yogh;twisnesse, &yogh;e ben blessid;
but drede &yogh;e not the drede of hem, that
&yogh;e be not disturblid.
15 But halewe &yogh;e
the Lord Crist in &yogh;oure hertis, and euermore
be &yogh;e redi to satisfaccioun to ech
man axynge &yogh;ou resoun of that feith and
hope that is in &yogh;ou,
16 but with myldenesse
and drede, hauynge good conscience; that
in that thing that thei bacbiten of &yogh;ou,
thei ben confoundid, whiche chalengen
falsly &yogh;oure good conuersacioun in Crist.
17 For it is betere that &yogh;e do wel, and suffre,
if the wille of God wole, than doynge
yuele.
18 For also Crist onys diede for
oure synnes, he iust for vniust, that he
schulde offre to God vs, maad deed in
fleisch, but maad quik in spirit.
19 For
which thing he cam in spirit, and also
to hem that weren closid togidre in prisoun
prechide;
20 whiche weren sum tyme
vnbileueful, whanne thei abididen the
pacience of God in the daies of Noe,
whanne the schip was maad, in which a
few, that is to seie, ei&yogh;te soulis weren
maad saaf bi water.
21 And so baptym of
lijk forme note makith vs saaf; not the puttyng
-- --
awei of the filthis of fleisch, but the
axyng of a good conscience in God, bi
the a&yogh;enrysyng of oure Lord Jhesu Crist,
that is in the ri&yogh;t half of God,
22 and swolewith
deth, that we schulden be made
eiris of euerlastinge lijf. He &yogh;ede in to
heuene, and aungelis, and powers, and
vertues, ben maad sugetis to hym.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
