Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XX.
1 And aftir the noise ceesside, Poul
clepide the disciplis, and monestide hem,
and seide fare wel; and he wente forth,
to go in to Macedonye.
2 And whanne he
hadde walkid bi tho coostis, and hadde
monestid hem bi many wordis, he cam
to Greece.
3 Where whanne he hadde be
thre monethis, the Jewis leiden aspies
for hym, that was to saile in to Sirie;
-- --
and he hadde counsel to turne a&yogh;en bi
Macedonye.
4 And Sosipater of Pirri
Boroense folowide hym; of Thessolonycenses,
Astirak, and Secoundus, and
Gayus Derbeus, and Tymothe; and Asians,
Titicus and Trofimus.
5 These for
thei wenten bifore, aboden vs at Troade.
6 For we schippiden aftir the daies of therf
looues fro Filippis, and cam to hem at
Troade in fyue daies, where we dwelten
seuene daies.
7 And in the first dai of the
woke, whanne we camen to breke breed,
Poul disputide with hem, and schulde
go forth in the morew;
8 and he drow
along the sermoun til in to mydny&yogh;t. And
many laumpes weren in the soler, where
we weren gaderyd togidir.
9 And a &yogh;ong
man, Euticus bi name, sat on the wyndowe,
whanne he was fallun in to an
heuy sleep, while Poul disputide long,
al slepynge he felle doun fro the thridde
stage; and he was takun vp, and was
brou&yogh;t deed.
10 To whom whanne Poul
cam doun, he lay on hym, and biclippide,
and seide, Nyle &yogh;e be troblid; for his
soule is in hym.
11 And he wente vp, and
brak breed, and eete, and spak ynow&yogh;
vnto the dai; and so he wente forth.
12 And thei brou&yogh;ten the childe alyue, and
thei weren coumfortid greetli.
13 And we
wenten vp in to a schip, and schippiden
in to Asson, to take Poul fro thennus;
for so he hadde disposid to make iourney
bi loond.
14 And whanne he foond vs in
Asson, we token hym, and camen to
Mitilene.
15 And fro thennus we schippiden
in the dai suynge, and we camen
a&yogh;ens Chyum, and another dai we hauenyden
at Samum, and in the dai suynge
we camen to Mylete.
16 And Poul purposide
to schip ouer to Efesi, lest ony tariyng
-- --
were maad to hym in Asie; for he hi&yogh;ede,
if it were possible to hym, that he
schulde be in the dai of Pentecost at
Jerusalem.
17 Fro Mylete he sente to Effesi,
and clepide the grettest men of
birthe of the chirche.
18 And whanne thei
camen to hym, and weren togidir, he
seide to hem, &YOGH;e witen fro the firste dai,
in which Y cam in to Asie, hou with
&yogh;ou bi eche tyme Y was,
19 seruynge to the
Lord with al mekenesse, and mildnesse,
and teeris, and temptaciouns, that felden
to me of aspiyngis of Jewis;
20 hou Y
withdrowe not of profitable thingis to
&yogh;ou, that Y telde not to &yogh;ou, and tau&yogh;te
&yogh;ou opynli, and bi housis;
21 and Y witnesside
to Jewis and to hethene men
penaunce in to God, and feith in to oure
Lord Jhesu Crist.
22 And now lo! Y am
boundun in spirit, and go in to Jerusalem;
and Y knowe not what thingis
schulen come to me in it,
23 but that the
Hooli Goost `bi alle citees witnessith to
me, and seith, that boondis and tribulaciouns
at Jerusalem abiden me.
24 But Y
drede no thing of these, nether Y make
my lijf preciousere than my silf, so that
Y end my cours, and the mynysterie of
the word, which Y resseyuede of the
Lord Jhesu, to witnesse the gospel of
the grace of God.
25 And `now lo! Y
woot, that &yogh;e schulen no more se my
face, alle &yogh;e bi whiche Y passide, prechynge
the kingdom of God.
26 Wherfor Y
witnesse to &yogh;ou this day, that Y am cleen
of the blood of alle men.
27 For Y fley not
awey, that Y telde not to &yogh;ou al the
counsel of God.
28 Take &yogh;e tente to &yogh;ou,
and to al the flocke, in which the Hooli
Goost hath set &yogh;ou bischops, to reule the
chirche of God, which he purchaside
with his blood.
29 Y woot, that aftir my
-- --
departyng, rauyschinge wolues schulen
entre in to &yogh;ou, `and spare not the flok;
30 and men spekinge schrewid thingis schulen
rise of &yogh;ou silf, that thei leden awei
disciplis aftir hem.
31 For which thing
wake &yogh;e, holdinge in mynde that bi thre
&yogh;eer ny&yogh;t and dai Y ceesside not with
teeris monestinge ech of &yogh;ou.
32 And now
Y bitake &yogh;ou to God and to the word of
his grace, that is my&yogh;ti to edifie and &yogh;yue
eritage in alle that ben maad hooli.
33 And
of no man Y coueitide siluer, and gold,
ether cloth, as &yogh;ou silf witen;
34 for to tho
thingis that weren nedeful to me, and to
these that ben with me, these hoondis
mynystriden.
35 Alle these thingis Y schewide
to &yogh;ou note, for so it bihoueth men trauelinge
to resseyue sike men, and to haue
mynde of the `word of the Lord Jhesu;
for he seide, It is more blesful to &yogh;yue,
than to resseyue.
36 And whanne he hadde
seid these thingis, he knelide, and he
preiede with alle hem.
37 And greet weping
of alle men was maad; and thei
felden on the necke of Poul, and kissiden
hym,
38 and sorewiden moost in the word
that he seide, for thei schulen no more
se his face. And thei ledden hym to the
schip.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|