Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VIII.
1 But, britheren, we maken knowun
to &yogh;ou the grace of God, that is &yogh;ouun
in the chirchis of Macedonye,
2 that in
myche asaiyng of tribulacioun, the plente
of the ioye of hem was, and the hi&yogh;este
pouert of hem was plenteuouse `in to
the richessis of the symplenesse of hem.
3 For Y bere witnessyng to hem, aftir
mi&yogh;t and aboue mi&yogh;t thei weren wilful,
4 with myche monestyng bisechynge vs
the grace and the comynyng of mynystring,
that is maad to hooli men.
5 And not as we hopiden, but thei &yogh;auen
hem silf first to the Lord, aftirward to
vs bi the wille of God.
6 So that we
preyeden Tite, that as he bigan, so also
he performe in &yogh;ou this grace.
7 But as
&yogh;e abounden in alle thingis, in feith,
and word, and kunnyng, and al bisynesse,
more ouer and in &yogh;oure charite
in to vs, that and in this grace &yogh;e
abounden.
8 Y seie not as comaundinge,
but bi the bisynesse of othere men appreuynge
also the good wit of &yogh;oure
charite.
9 And &yogh;e witen the grace of oure
Lord Jhesu Crist, for he was maad
nedi for &yogh;ou, whanne he was riche, that
&yogh;e schulden be maad riche bi his nedynesse.
10 And Y &yogh;yue counsel in this
thing; for this is profitable to &yogh;ou, that
not oneli han bigunne to do, but also
&yogh;e bigunnen to haue wille fro the formere
&yogh;ere.
11 But now parfourme &yogh;e in
deed, that as the discrecioun of wille is
redi, so be it also of parformyng of that
that &yogh;e han.
12 For if the wille be redi,
it is acceptid aftir that that it hath,
-- --
not aftir that that it hath not.
13 And not
that it be remyssioun to othere men,
and to &yogh;ou tribulacioun;72Q0013
14 but of euenesse
in the present tyme &yogh;oure aboundance
fulfille the myseese of hem, that also the
aboundaunce of hem be a fulfillynge
of &yogh;oure myseise, that euenesse be maad;
as it is writun,
15 He that gaderide myche,
was not encresid, and he that gaderide
litil, hadde not lesse.
16 And Y do thankyngis
to God, that &yogh;af the same bisynesse
for &yogh;ou in the herte of Tite,
17 for
he resseyuede exortacioun; but whanne
he was bisier, bi his wille he wente
forth to &yogh;ou.
18 And we senten with hym
a brother, whose preisyng is in the gospel
bi alle chirchis.
19 And not oneli, but
also he is ordeyned of chirchis the
felowe of oure pilgrimage in to this
grace, that is mynystrid of vs to the
glorie of the Lord, and to oure ordeyned
wille;
20 eschewynge this thing, that no
man blame vs in this plente, that is
mynystrid of vs to the glorye of the
Lord.
21 For we purueyen good thingis,
not onely bifor God, but also bifor alle
men.
22 For we senten with hem also
oure brothir, whom we han preued in
many thingis ofte, that he was bisi, but
nowe myche bisier, for myche trist in
&yogh;ou,
23 ethir for Tite, that is my felowe
and helpere in &yogh;ou, ethir for oure britheren,
apostlis of the chirches of the
glorie of Crist.
24 Therfor schewe &yogh;e in
to hem in the face of chirchis, that
schewynge that is of &yogh;oure charite and
of oure glorie for &yogh;ou.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
