1   And it was don, whanne he was preiynge in a place, as he ceesside, oon of hise disciplis seide to hym, Lord, teche vs to preye, as Joon tau&yogh;te hise disciplis. 2   And he seide to hem, Whanne &yogh;e preien, seie &yogh;e, Fadir, halewid be thi name. Thi kyngdom come to. 3   &YOGH;yue `to vs to dai oure ech daies breed. 4   And for&yogh;yue to vs oure synnes, as we for&yogh;yuen to ech man that owith to vs. And lede vs not in to temptacioun. 5   And he seide to hem, Who of &yogh;ou schal haue a freend, and schal go to hym at mydny&yogh;t, and schal seie to hym, Freend, leene to me thre looues; 6   for my freend cometh to me fro the weie, and Y haue not what Y schal sette bifor hym. 7   And he with ynforth answere and seie, Nyle thou be heuy to me; the dore is now schit, and my children ben with me in bed; Y may not rise, and &yogh;yue to thee. 8   And if he schal dwelle stil knockynge, Y seie to &yogh;ou, thou&yogh; he schal not rise, and &yogh;yue to him, for that that he is his freend, netheles for his contynuel axyng he schal ryse, and &yogh;yue to hym, as many as he hath nede to. 9   And Y seie to &yogh;ou, axe &yogh;e, and it schal be &yogh;ouun to &yogh;ou; seke &yogh;e, and &yogh;e schulen fynde; knocke &yogh;e, and it schal be openyd to &yogh;ou. 10   For ech that axith, takith, and he that sekith, fyndith; and to a man

that knockith, it schal be openyd. 11   Therfor who of &yogh;ou axith his fadir breed, whether he schal &yogh;yue hym a stoon? or if he axith fisch, whether he schal &yogh;yue hym a serpent for the fisch? 12   or if he axe an eye, whether he schal a reche hym a scorpioun? 13   Therfor if &yogh;e, whanne &yogh;e ben yuel, kunnen &yogh;yue good &yogh;iftis to &yogh;oure children, hou myche more &yogh;oure fadir of heuene schal &yogh;yue a good spirit to men that axith him. 14   And Jhesus was castynge out a feend, and he was doumbe. And whanne he hadde cast out the feend, the doumbe man spak; and the puple wondride. 15   And sum of hem seiden, In Belsabub, prince of deuelis, he castith out deuelis. 16   And othir temptinge axiden of hym a tokene fro heuene. 17   And as he sai&yogh; the thou&yogh;tis of hem, he seide to hem, Euery rewme departid a&yogh;ens it silf, schal be desolat, and an hous schal falle on an hous. 18   And if Sathanas be departid a&yogh;ens hym silf, hou schal his rewme stonde? For &yogh;e seien, that Y caste out feendis in Belsabub. 19   And if Y in Belsabub caste out fendis, in whom casten out &yogh;oure sones? Therfor thei schulen be &yogh;oure domesmen. 20   But if Y caste out fendis in the fyngir of God, thanne the rewme of God is comun among &yogh;ou. 21   Whanne a strong armed man kepith his hous, alle thingis that he weldith ben in pees. 22   But if a stronger than he come vpon hym, and ouercome hym, he schal take awei al his armere, in which he tristide, and schal dele abrood his robries. 23   He that is not with me, is a&yogh;ens me; and he that gederith

not togidir with me, scaterith abrood. 24   Whanne an vnclene spirit goith out of a man, he wandrith bi drie placis, and sekith reste; and he fyndynge not, seith, Y schal turne a&yogh;en in to myn hous, fro whannes Y cam out. 25   And whanne he cometh, he fyndith it clansid with besyms, and fayre arayed. 26   Thanne he goith, and takith with hym seuene othere spirits worse than hym silf, and thei entren, and dwellen there. And the laste thingis of that man ben maad worse than the formere. 27   And it was don, whanne he hadde seid these thingis, a womman of the cumpanye reride hir vois, and seide to hym, Blessid be the wombe that bare thee, and blessid be the tetis that thou hast soken. 28   And he seide, But &yogh;he blessid be thei, that heren the word of God, and kepen it. 29   And whanne the puple runnen togidere, he bigan to seie, This generacioun is a weiward generacioun; it sekith a token, and a tokene schal not be &yogh;ouun to it, but the tokene of Jonas, the profete. 30   For as Jonas was a tokene to men of Nynyue, so mannus sone schal be to this generacioun. 31   The queen of the south schal rise in doom with men of this generacioun, and schal condempne hem; for sche cam fro the endis of the erthe, for to here the wisdom of Salomon, and lo! here is a gretter than Salomon. 32   Men of Nynyue schulen rise in doom with this generacioun, and schulen condempne it; for thei diden penaunce in the prechyng of Jonas, and lo! here is a gretter than Jonas. 33   No man tendith a lanterne, and puttith in hidils, nether vndur a buyschel, but on a candilstike, that thei

that goen in, se li&yogh;t. 34   The lanterne of thi bodi is thin i&yogh;e; if thin i&yogh;e be symple, al thi bodi schal be li&yogh;ti; but if it be weyward, al thi bodi schal be derkful. 35   Therfor se thou, lest the li&yogh;t that is in thee, be derknessis. 36   Therfor if al thi bodi be bri&yogh;t, and haue no part of derknessis, it schal be al bri&yogh;t, and as a lanterne of bri&yogh;tnesse it schal &yogh;yue li&yogh;t to thee. 37   And whanne he spak, a Farisee preiede him, that he schulde ete with hym. And he entride, and sat to the meete. 38   And the Farisee bigan to seie, gessynge with ynne hym silf, whi he was not waschen bifor mete. 39   And the Lord seide to hym, Now &yogh;e Farisees clensen that that is with outenforth of the cuppe and the plater; but that thing that is with ynne of &yogh;ou, is ful of raueyn and wickidnesse. 40   Foolis, whether he that made that that is withoutenforth, made not also that that is with ynne? 41   Netheles that that is ouer plus, &yogh;yue &yogh;e almes, and lo! alle thingis ben cleene to &yogh;ou. 42   But wo to &yogh;ou, Farisees, that tithen mynte, and rue, and ech eerbe, and leeuen doom and the charite of God. For it bihofte to do these thingis, and not leeue tho. 43   Wo to &yogh;ou, Farisees, that louen the firste chaieris in synagogis, and salutaciouns in chepyng. 44   Wo to &yogh;ou, that ben as sepulcris, that ben not seyn, and men walkynge aboue witen not. 45   But oon of the wise men of the lawe answeride, and seide to hym, Maystir, thou seiynge these thingis, also to vs doist dispit. 46   And he seide,

Also wo to &yogh;ou, wise men of lawe, for &yogh;e chargen men with birthuns which thei moun not bere, and &yogh;e &yogh;ou silf with &yogh;oure o fyngur touchen not the heuynessis. 47   Wo to &yogh;ou, that bilden toumbis of profetis; and &yogh;oure fadris slowen hem. 48   Treuli &yogh;e witnessen, that &yogh;e consenten to the werkis of &yogh;oure fadris; for thei slowen hem, but &yogh;e bilden her sepulcris. 49   Therfor the wisdom of God seide, Y schal sende to hem profetis and apostlis, and of hem thei schulen sle and pursue, 50   that the blood of alle prophetis, that was sched fro the making of the world, be sou&yogh;t of this generacioun; 51   fro the blood of the iust Abel to the blood of Zacharie, that was slayn bitwixe the auter and the hous. So Y seie to &yogh;ou, it schal be sou&yogh;t of this generacioun. 52   Wo to &yogh;ou, wise men of the lawe, for &yogh;e han takun awei the keye of kunnyng; and &yogh;e &yogh;ow silf entriden not, and &yogh;e han forbeden hem that entriden. 53   And whanne he seide these thingis to hem, the Farisees and wise men of lawe bigunnen greuousli to a&yogh;enstonde, and stoppe his mouth of many thingis, 54   aspiynge hym, and sekynge to take sum thing of his mouth, to accuse hym.

Previous section

Next section