Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. IV.
1 Moyses answeride, and seide, The comyns
schulen not bileue to me, nether thei schulen
here my vois; but thei schulen seie,
The Lord apperide not to thee.
2 Therfor
the Lord seide to hym, What is this that
thou holdist in thin hond? Moises answeride,
A &yogh;erde.
3 And the Lord seide,
Caste it forth into erthe; and he castide
forth, and it was turned in to a serpent,
so that Moises fledde.
4 And the Lord
seide, Holde forth thin hond, and take the
tail therof; he stretchide forth, and helde,
and it was turned in to a &yogh;erde.
5 And the
Lord seide, That thei bileue, that the Lord
God of thi fadris apperide to thee, God of
Abraham, and God of Isaac, and God of
Jacob.
6 And the Lord seide eft, Putte
thin hond in to thi bosum; and whanne
he hadde put it in to the bosum, he
brou&yogh;te forth it leprouse, at the licnesse of
-- --
snow.
7 The Lord seide, Withdrawe thin
hond in to thi bosum; he withdrow, and
brou&yogh;te forth eft, and it was lijc the
tother fleisch.
8 The Lord seide, If thei
schulen not bileue to thee, nether schulen
here the word of the formere signe, thei
schulen bileue to the word of the signe
suynge;
9 that if thei bileuen not sotheli
to these twei signes, nether heren thi vois,
take thou watir of the flood, and schedde
out it on the drie lond, and what euer
thing thou schalt drawe vp of the flood, it
schal be turned in to blood.
10 Moises seide,
Lord, Y biseche, Y am `not eloquent fro
&yogh;istirdai and the thridde dai ago; and
sithen thou hast spokun to thi seruaunt,
Y am of more lettid and slowere tunge.
11 The Lord seide to hym, Who made the
mouth of man, ether who made a doumb
man and `deef, seynge and blynd? whether
not Y?
12 Therfor go thou, and Y schal
be in thi mouth, and Y schal teche thee
what thou schalt speke.
13 And he seide,
Lord, Y biseche, sende thou whom thou
schalt sende.
14 And the Lord was wrooth
a&yogh;ens Moises, and seide, Y woot, that Aaron,
thi brother, of the lynage of Leuy, is
eloquent; lo! he schal go out in to thi
comyng, and he schal se thee, and schal
be glad in herte.
15 Speke thou to hym,
and putte thou my wordis in his mouth,
and Y schal be in thi mouth, and in the
mouth of hym; and Y schal schewe to
&yogh;ou what &yogh;e owen to do.
16 He schal speke
for thee to the puple, and he schal be thi
mouth; forsothe thou schalt be to him in
these thingis, that perteynen to God.
17 Also
take thou this &yogh;erde in thin hond, in which
thou schalt do myraclis.
18 Moises &yogh;ede, and
turnede a&yogh;en to Jetro, his wyues fadir, and
seide to hym, Y schal go, and turne a&yogh;en
to my britheren in to Egipt, that Y se,
whether thei lyuen &yogh;it. To whom Jetro
-- --
seide, Go thou in pees.
19 Therfor the Lord
seide to Moyses in Madian, Go thou, and
turne a&yogh;en into Egipt; for alle thei ben
deed that sou&yogh;ten thi lijf.
20 Moises took his
wijf, and hise sones, and puttide hem on
an asse, and he turnede a&yogh;en in to Egipt,
and bar the &yogh;erde of God in his hond.
21 And the Lord seide to hym turnynge a&yogh;en
in to Egipt, Se, that thou do alle wondris,
whiche Y haue put in thin hond,
bifore Farao; Y schal make hard note his
herte, and he schal not delyuere the puple;
and thou schalt seie to hym,
22 The
Lord seith these thingis, My firste gendrid
sone is Israel;
23 Y seide to thee, delyuere
thou my sone, that he serue me, and thou
noldist delyuere hym; lo! Y schal sle thi
firste gendrid sone.
24 And whanne Moises
was in the weie, in an yn, the Lord cam
to him, and wolde sle hym.
25 Sefora took
anoon a moost scharp stoon, and circumcidide
the &yogh;erde of hir sone; and sche
towchide `the feet of Moises, and seide,
Thou art an hosebonde of bloodis to me.
26 And he lefte hym, aftir that sche hadde
seid, Thou art an hosebonde of bloodis to me
for circumcisioun.
27 Forsothe the Lord seide
to Aaron, Go thou in to the comyng of
Moises in to deseert; which &yogh;ede a&yogh;ens
Moises in to the hil of God, and kisside
him.
28 And Moises telde to Aaron alle the
wordis of the Lord, for whiche he hadde
sent Moises; and `he telde the myraclis,
whiche the Lord hadde comaundid.
29 And
thei camen togidere, and gaderiden alle
the eldere men of the sones of Israel.
30 And
Aaron spak alle the wordis, whiche the
Lord hadde seid to Moises, and he dide
the signes bifore the puple;
31 and the puple
bileuede; and thei herden, that the Lord
hadde visitid the sones of Israel, and that
he hadde biholde the turment of hem;
and thei worschipiden lowe.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
