Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. III.
1 Forsothe Moises kepte the scheep of
Jetro, `his wyues fadir, preest of Madian;
and whanne he hadde dryue the floc to
the ynnere partis of deseert, he cam to
Oreb, the hil of God.
2 Forsothe the Lord
apperide to hym in the flawme of fier fro
the myddis of the buysch, and he sei&yogh;
that the buysch brente, and was not forbrent.
3 Therfor Moyses seide, Y schal go
and schal se this greet si&yogh;t, whi the buysch
is not forbrent.
4 Sotheli the Lord sei&yogh; that
Moises &yogh;ede to se, and he clepide Moises
fro the myddis of the buysch, and seide,
Moyses! Moises! Which answeride, Y am
present.
5 And the Lord seide, Nei&yogh;e thou
not hidur, but vnbynde thou the scho of
thi feet, for the place in which thou
stondist is hooli lond.
6 And the Lord
seide, Y am God of thi fadir, God of Abraham,
and God of Isaac, and God of Jacob.
Moises hidde his face, for he durste
not biholde a&yogh;ens God.
7 To whom the
Lord seide, Y sei&yogh; the affliccion of my
puple in Egipt, and Y herde the cry
therof, for the hardnesse of hem that ben
souereyns of werkis.
8 And Y knew the
sorewe of the puple, and Y cam down to
delyuere it fro the hondis of Egipcians,
and lede out of that lond in to a good
-- --
lond and brood, into a lond that flowith
with milk and hony, to the places of
Cananey, and of Ethei, of Amorrey, and
of Feresei, of Euey, and of Jebusei.
9 Therfor the cry of the sones of Israel cam
to me, and Y sei&yogh; the turment of hem, bi
which thei ben oppressid of Egipcians.
10 But come thou, I schal sende thee to Farao,
that thou lede out my puple, the sones
of Israel, fro Egipt.
11 And Moises seide to
hym, Who am Y, that Y go to Farao, and
lede out the sones of Israel fro Egipt?
12 And the Lord seide to Moises, Y schal be
with thee, and thou schalt haue this signe,
that Y haue sent thee, whanne thou hast
led out my puple fro Egipt, thou schalt
offre to God on this hil.
13 Moises seide to
God, Lo! Y schal go to the sones of Israel,
and Y schal seie to hem, God of &yogh;oure
fadris sente me to &yogh;ou; if thei schulen seie
to me, what is his name, what schal Y seie
to hem?
14 The Lord seide to Moises, Y am
that am. The Lord seide, Thus thou
schalt seie to the sones of Israel, He that
is sente me to &yogh;ou.
15 And eft God seide to
Moises, Thou schalt seie these thingis to
the sones of Israel, The Lord God of &yogh;oure
fadris, God of Abraham, and God of Isaac,
and God of Jacob, sente me to &yogh;ou; this
name is to me with outen ende note, and this
is my memorial in generacioun and in to
generacioun.
16 Go thou, gadere thou the
eldere men, that is, iugis, of Israel, and
thou schalt seie to hem, The Lord God of
&yogh;oure fadris apperide to me, God of Abraham,
and God of Ysaac, and God of Jacob,
and seide, Y visitynge haue visitid &yogh;ou,
and Y sei&yogh; alle thingis that bifelden to
&yogh;ou in Egipt;
17 and Y seide, that Y lede
out &yogh;ou fro the affliccioun of Egipt in to
the lond of Cananey, and of Ethei, and of
Amorrei, and of Ferezei and of Euei, and
of Jebusei, to the lond flowynge with mylk
and hony.
18 And thei schulen here thi vois;
and thou schalt entre, and the eldere men
of Israel to the kyng of Egipt, and thou
-- --
schalt seie to hym, The Lord God of
Ebrews clepide vs; we schulen go the
weie of thre daies in to wildirnesse, that
we offre to oure Lord God.
19 But Y woot,
that the kyng of Egipt schal not delyuere
&yogh;ou that &yogh;e go, but bi strong hond;
20 for
Y schal holde forthe myn hond, and I
schal smyte Egipt in alle my marueils,
whiche Y schal do in the myddis of hem;
aftir these thingis he schal delyuere &yogh;ou.
21 And Y schal &yogh;yue grace to this puple bifore
Egipcians, and whanne &yogh;e schulen go
out, &yogh;e schulen not go out voide;
22 but a
womman schal axe of hir nei&yogh;boresse and
of her hoosteesse siluerne vesselis, and
goldun, and clothis, and &yogh;e schulen putte
tho on &yogh;oure sones and dou&yogh;tris, and &yogh;e
schulen make nakid Egipt.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
