Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. IX.
1 And he criede in myn eeris with greet
vois, and seide, The visityngis of the citee
han nei&yogh;ed, and ech man hath in his hond
an instrument of sleyng.
2 And lo! sixe men
camen fro the weie of the hi&yogh;ere &yogh;ate, that
biholdith to the north, and the instrument
of deth of ech man was in his hond; also
o man in the myddis of hem was clothid
with lynnun clothis, and a pennere of a
writere at hise reynes; and thei entriden,
and stoden bisidis the brasun auter.
3 And
the glorie of the Lord of Israel was takun
vp fro cherub, which glorie was on it, to
the threisfold of the hous; and the Lord
clepide the man that was clothid with
lynun clothis, and hadde a pennere of a
writere in hise leendis.
4 And the Lord
seide to hym, Passe thou bi the myddis of
the citee, in the myddis of Jerusalem, and
marke thou Thau note on the forhedis of men
weilynge and sorewynge on alle abhomynaciouns
that ben doon in the myddis
therof.
5 And he seide to hem in myn heryng,
Go &yogh;e thorou&yogh; the citee, and sue &yogh;e
hym, and smytte &yogh;e; &yogh;oure i&yogh;e spare not,
nether do &yogh;e merci.
6 Sle &yogh;e til to deth, an
eld man, a &yogh;ong man, and a virgyn, a litil
child, and wymmen; but sle &yogh;e not ony
man, on whom &yogh;e seen Thau; and bigynne
&yogh;e at my seyntuarie. Therfore thei bigunnen
at the eldere men, that weren
bifore the face of the hous.
7 And he seide
to hem, Defoule &yogh;e the hous, and fille &yogh;e
the hallis with slayn men; go &yogh;e out.
And thei &yogh;eden out, and killiden hem that
weren in the citee.
8 And lo! whanne the
sleyng was fillid, Y was left. And Y felle
doun on my face, and Y criede, and seide,
Alas! alas! alas! Lord God, therfor whether
thou schalt leese alle remenauntis of
Israel, and schalt schede out thi stronge
veniaunce on Jerusalem?
9 And he seide to
me, The wickidnesse of the hous of Israel
and of Juda is ful greet, and the lond is
-- --
fillid of bloodis, and the citee is fillid with
turnyng awei; for thei seiden, The Lord
hath forsake the lond, and the Lord seeth
not.
10 Therfor and myn i&yogh;e schal not spare,
nether Y schal do merci; Y schal &yogh;elde
the weie of hem on the heed of hem.
11 And
lo! the man that was clothid in lynun
clothis, that hadde a pennere in his bak,
answeride a word, and seide, Y haue do,
as thou comaundidist to me.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
