Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. VIII.
1 And it was doon in the sixte &yogh;eer, in
the sixte monethe, in the fyuethe dai of
the monethe, Y sat in myn hous, and the
elde men of Juda saten bifore me; and the
hond of the Lord God felle there on me.
2 And Y si&yogh;, and lo! a licnesse as the biholdyng
of fier; fro the biholding of hise
leendis and bynethe was fier, and fro
hise leendis and aboue was as the biholdyng
of schynyng, as the si&yogh;t of electre.
3 And the licnesse of an hond was sent out,
and took me bi the heer of myn heed;
and the spirit reiside me bitwixe heuene
and erthe, and brou&yogh;te me in to Jerusalem,
in the si&yogh;t of God, bisidis the ynnere dore
that bihelde to the north, where the idol
of enuye was set, to stire indignacioun.
4 And lo! the glorie of God of Israel was
there, bi si&yogh;t which Y si&yogh; in the feeld.
5 And he seide to me, Thou, sone of man,
reise thin i&yogh;en to the weie of the north;
and Y reiside myn i&yogh;en to the weie of the
north, and lo! fro the north of the &yogh;ate
of the auter the idol of enuye was in that
entryng.
6 And he seide to me, Sone of
man, gessist thou whether thou seest
what thing these men doon, the grete abhomynaciouns
whiche the hous of Israel
doith here, that Y go fer awei fro my
seyntuarie? and &yogh;it thou schalt turne, and
schalt se grettere abhomynaciouns.
7 And
he ledde me with ynne to the dore of the
halle; and Y si&yogh;, and lo! oon hoole in the
wal.
8 And he seide to me, Sone of man,
digge thou the wal; and whanne Y hadde
diggid the wal, o dore apperide.
9 And he
seide to me, Entre thou, and se the worste
abhomynaciouns, whiche these men doon
here.
10 And Y entride, and si&yogh;; and lo!
ech licnesse of `crepynge beestis, and abhomynacioun
of beestis, and alle idols of
the hous of Israel, weren peyntid in the
wal al aboute in cumpas.
11 And seuenti
-- --
men of the eldere of the hous of Israel
stoden; and Jeconye, the sone of Saphan,
stood in the myddis of hem, stondynge
bifore the peyntyngis; and ech man hadde
a censere in his hond, and the smoke
of a cloude of encense stiede.
12 And he
seide to me, Certis, sone of man, thou
seest what thingis the eldere men of the
hous of Israel doen in derknessis, ech
man in the hid place of his bed; for thei
seiyn, The Lord seeth not vs, the Lord
hath forsake the lond.
13 And the Lord
seide to me, &YOGH;it thou schalt turne, and
schalt se gretter abhomynaciouns, whiche
these men doon.
14 And he ledde me with
ynne, bi the dore of the &yogh;ate of the hous
of the Lord, which dore bihelde to the
north; and lo! wymmen saten there, biweilynge
Adonydes.
15 And the Lord seide
to me, Certis, sone of man, thou hast seyn;
&yogh;it thou schalt turne, and schalt se gretere
abhomynaciouns than these.
16 And he ledde
me with ynne, in to the ynnere halle of
the hous of the Lord; and lo! in the dore
of the temple of the Lord, bitwixe the
porche and the auter, weren as fyue and
twenti men hauynge the backis a&yogh;ens the
temple of the Lord, and her faces to the
eest; and thei worschipiden at the risyng
of the sunne.
17 And the Lord seide to me,
Certis, sone of man, thou hast seyn; whether
this is a li&yogh;t thing to the hous of
Juda, that thei schulden do these abhomynaciouns,
whiche thei diden here? For
thei filliden the lond with wickidnesse,
and turneden to terre me to wraththe; and
lo! thei applien a braunche to her nose
thirlis.
18 Therfor and Y schal do in strong
veniaunce; myn i&yogh;e schal not spare, nether
Y schal do merci; and whanne thei
schulen crie to myn eris with greet vois,
Y schal not here hem.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
