Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XLV.
1 Joseph my&yogh;te no lengere absteyne hym
silf, while many men stoden bifore;
wherfor he comaundide that alle men
schulden go out, and that noon alien were
present in the knowyng of Joseph and
hise britheren.
2 And Joseph reiside the
vois with wepyng, which Egipcians herden,
and al the hows of Farao.
3 And he seide
to hise britheren, Y am Joseph; lyueth my
fadir &yogh;it? The brithren my&yogh;ten not answere,
-- --
and weren agast bi ful myche
drede.
4 To whiche he seide mekeli, Nei&yogh;e
&yogh;e to me. And whanne thei hadden nei&yogh;ed
ny&yogh;, he seide, Y am Joseph &yogh;oure brother,
whom &yogh;e selden in to Egipt;
5 nyle &yogh;e drede,
nether seme it to be hard to &yogh;ou, that &yogh;e
seelden me in to these cuntreis; for God
hath sent me bifore &yogh;ou in to Egipt for
&yogh;oure helthe.
6 For it is twei &yogh;eer that
hungur bigan `to be in the lond, &yogh;it fyue
&yogh;eer suen, in whiche me schal not mow
ere, nether repe;
7 and God bifor sente me,
that &yogh;e be reserued on erthe, and moun
haue metis to lyue.
8 Y was sent hidur not
bi &yogh;oure counsel, but bi Goddis wille,
which made me as the fadir of Farao,
and the lord of al his hows, and prince
in al the lond of Egipt.
9 Haste &yogh;e, and
`stie &yogh;e to my fadir, and &yogh;e schulen seie
to hym, Thi sone Joseph sendith these
thingis; God hath maad me lord of al
the lond of Egipt; come doun to me, and
tarie not, and dwelle in the lond of Gessen;
10
and thou schalt be bisidis me, thou,
and thi sones, and the sones of thi sones,
thi scheep, and thi grete beestis, and alle
thingis whiche thou weldist,
11 and there Y
schal fede thee; for &yogh;it fyue &yogh;eer of hungur
ben residue, lest bothe thou perische,
and thin hows, and alle thingis whiche
thou weldist.
12 Lo! &yogh;oure i&yogh;en, and the i&yogh;en
of my brother Beniamyn seen, that my
mouth spekith to &yogh;ou;
13 telle &yogh;e to my fadir
al my glorie, and alle thingis whiche &yogh;e
sien in Egipt; haste &yogh;e, and brynge &yogh;e
hym to me.
14 And whanne he hadde biclippid,
and hadde feld in to the necke
of Beniamyn, his brother, he wepte, the
while also Benjamin wepte in lijk maner
on the necke of Joseph.
15 And Joseph
kisside alle hise britheren, and wepte on
alle; aftir whiche thingis thei weren
hardi to speke to hym.
16 And it was herd,
and pupplischid bi famouse word in the
-- --
halle of the kyng, The britheren of Joseph
ben comun. And Farao ioiede, and
al his meynee;
17 and Farao seide to Joseph,
that he schulde comaunde hise britheren,
and `seie, Charge &yogh;oure beestis, and go &yogh;e
in to the lond of Canaan,
18 and take &yogh;e fro
thennus &yogh;oure fadir, and kynrede, and come
&yogh;e to me; and Y schal &yogh;yue to &yogh;ou alle
the goodis of Egipt, that &yogh;e ete the merow
of the lond.
19 Comaunde thou also, that
thei take waynes of the lond of Egipt to
the cariage of her litle children, and wyues,
and seie thou, `Take &yogh;e &yogh;oure fadir, and
haste &yogh;e comynge soone,
20 nether leeue &yogh;e
ony thing of the purtenaunce of &yogh;oure
hows, for alle the richessis of Egipt schulen
be &yogh;oure.
21 The sones of Israel diden, as
it was comaundid to hem; to whiche Joseph
&yogh;af waynes, bi the comaundement
of Farao, and metis in the weie;
22 and he
comaundide twei stoolis to be brou&yogh;t
forth to ech; forsothe he &yogh;af to Beniamyn
thre hundrid platis of siluer, with fyue the
beste stoolis;
23 and sente to his fadir so
myche of siluer, and of cloothis, and he
addide to hem ten male assis, that schulden
bere of alle richessis of Egipt, and so
many femal assis, berynge wheete and
looues in the weie.
24 Therfor he lefte hise
britheren, and seide to hem goynge forth,
Be &yogh;e not wrooth in the weie.
25 Whiche
stieden fro Egipt, and camen in to the
lond of Canaan, to her fadir Jacob;
26 and
telden to hym, and seiden, Joseph, thi
sone, lyueth, and he is lord in al the lond
of Egipt. And whanne this was herd,
Jacob wakide as of a greuouse sleep;
netheles he bileuyde not to hem.
27 Thei
telden a&yogh;enward al the ordre of the thing;
and whanne Jacob hadde seyn the waynes,
and alle thingis whiche Joseph hadde sent,
his spirit lyuede a&yogh;en,
28 and he seide, It suffisith
to me, if Joseph my sone lyueth &yogh;it,
Y schal go and `Y schal se hym bifore
that Y die.
-- --
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
