Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. LVI.
1 The Lord seith these thingis, Kepe &yogh;e
doom, and do &yogh;e ri&yogh;tfulnesse, for whi myn
helthe is ni&yogh;, that it come, and my ri&yogh;tfulnesse,
that it be schewid.
2 Blessid is the
man, that doith this, and the sone of man,
that schal take this; kepynge the sabat,
that he defoule not it, kepynge hise
hondis, that he do not ony yuel.
3 And
seie not the sone of a comelyng, that
cleueth faste to the Lord, seiynge, Bi departyng
the Lord schal departe me fro
his puple; and a geldyng, ether a chast
man, seie not, Lo! Y am a drie tree.
4 For
the Lord seith these thingis to geldingis,
that kepen my sabatis, and chesen what
thingis Y wolde, and holden my boond of
pees.
5 Y schal &yogh;yue to hem a place in myn
hous, and in my wallis, and the beste
name of sones and dou&yogh;tris; Y schal &yogh;yue
to hem a name euerlastynge, that schal
not perische.
6 And Y schal brynge in to
blis the sones of a comelyng, that cleuen
faste to the Lord, that thei worschipe
hym, and loue his name, that thei be to
hym in to seruauntis; ech man kepynge
the sabat, that he defoule it not, and holdynge
my boond of pees;
7 Y schal brynge
hem in to myn hooli hil, and Y schal
make hem glad in the hous of my preier;
her brent sacrifices and her slayn sacrifices
schulen plese me on my auter; for
whi myn hous schal be clepid an hous of
preier to alle puplis,
8 seith the Lord God,
that gaderith togidere the scaterid men of
Israel. &YOGH;it Y schal gadere togidere to hym
alle the gaderid men therof.
9 Alle beestis
of the feeld, come &yogh;e to deuoure, alle beestis
of the forest.
10 Alle the biholderis therof ben
-- --
blinde, alle thei knewen not; doumbe doggis,
that moun not berke, seynge veyn
thingis, slepynge, and louynge dremes;
11 and moost vnschamefast doggis knewen
not fulnesse. Tho scheepherdis knewen
not vndurstondyng; alle thei bowyden in
to her weie, ech man to his aueryce, fro
the hi&yogh;este `til to the laste.
12 Come &yogh;e, take
we wyn, and be we fillid of drunkenesse;
and it schal be as to dai, so and to morewe,
and myche more.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
