Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXXVI.
1 And it was don in the fourtenthe &yogh;eer
of kyng Ezechie, Sennacherib, the kyng
of Assiriens, stiede on alle the stronge
citees of Juda, and took tho.
2 And the
kyng of Assiriens sente Rapsases fro Lachis
to Jerusalem, to kyng Ezechie, with
greet power; and he stood at the watir
cundit of the hi&yogh;ere sisterne, in the weie
of the feeld of a fullere.
3 And Eliachym,
the sone of Elchie, that was on the
hous, &yogh;ede out to hym, and Sobna, the
scryuen, and Joae, the sone of Asaph, the
chaunceler.
4 And Rapsases seide to hem,
Seie &yogh;e to Ezechie, The greet king, the
king of Assiriens, seith these thingis, What
is the trist, in which thou tristist?
5 ethir bi
what councele ether strengthe disposist
thou for to rebelle? on whom hast thou
trist, for thou hast go awei fro me?
6 Lo!
thou tristist on this brokun staf of rehed,
on Egipt, on which if a man restith, it
schal entre in to his hoond, and schal
perse it; so doith Farao, the kyng of
Egipt, to alle men that tristen in hym.
7 That if thou answerist to me, We tristen
in oure Lord God; whether it is not he,
whose hi&yogh;e places and auteris Esechie dide
awei, and he seide to Juda and to Jerusalem,
&YOGH;e schulen worschipe bifore this auter?
8 And now bitake thee to my lord, the kyng
of Assiriens, and Y schal &yogh;yue to thee twei
thousynde of horsis, and thou maist not
&yogh;yue of thee stieris of tho horsis.
9 And hou
schalt thou abide the face of the iuge of
-- --
o place of the lesse seruauntis of my lord?
That if thou tristist in Egipt, and in cartis,
and in kny&yogh;tis;
10 and now whethir Y stiede
to this lond with out the Lord, that Y
schulde distrie it? The Lord seide to me,
Stie thou on this lond, and distrie thou it.
11 And Eliachym, and Sobna, and Joae, seiden
to Rapsaces, Speke thou to thi seruauntis
bi the langage of Sirie, for we vndurstonden;
speke thou not to vs bi the langage
of Jewis in the eeris of the puple,
which is on the wal.
12 And Rapsaces seide
to hem, Whether mi lord sente me to thi
lord, and to thee, that Y schulde speke
alle these wordis, and not rathere to the
men that sitten on the wal, that thei ete
her toordis, and drynke the pisse of her
feet with &yogh;ou?
13 And Rapsaces stood, and
criede with greet vois in the langage of
Jewis, and seide, Here &yogh;e the wordis of
the greet kyng, the kyng of Assiriens.
14 The kyng seith these thingis, Esechie disseyue
not &yogh;ou, for he may not delyuere
&yogh;ou;
15 and Ezechie &yogh;yue not to &yogh;ou trist on
the Lord, and seie, The Lord delyuerynge
schal delyuere vs; this citee schal not be
&yogh;ouun in to the hoond of the kyng of
Assiriens.
16 Nyle &yogh;e here Ezechie. For whi
the kyng of Assiriens seith these thingis,
Make &yogh;e blessyng with me, and go &yogh;e out
to me; and ete &yogh;e ech man his vyner, and
ech man his fige tre, and drynke &yogh;e ech
man the water of his cisterne,
17 til Y come,
and take awei &yogh;ou to a lond which is as
&yogh;oure lond; to a lond of whete and of
wyn, to a lond of looues and of vyneris.
18 Ezechie disturble not &yogh;ou, and seie, The
Lord schal delyuere vs. Whether the goddis
of folkis delyuereden ech his lond fro
the hond of the kyng of Assiriens?
19 Where
is the god of Emath, and of Arphat?
Where is the god of Sepharuaym? Whethir
thei delyueriden Samarie fro myn
hond?
20 Who is of alle goddis of these
londis, that delyueride his lond fro myn
-- --
hond, that the Lord delyuere Jerusalem
fro myn hond?
21 And thei weren stille,
and answeriden not to hym a word. For
whi the kyng comaundide to hem, and
seide, Answere &yogh;e not to him.
22 And Eliachym,
the sone of Elchie, that was on the
hous, and Sobna, the scryueyn, and Joae,
the sone of Asaph, chaunceler, entriden
with to-rent clothis to Ezechie, and telde
to hym the wordis of Rapsaces.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
