Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXXVI.
1 God of alle thingis, haue thou merci on
vs; and biholde thou vs, and schewe thou
to vs the li&yogh;t of thi merciful doyngis.
2 And sende thi drede on hethene men, that
sou&yogh;ten not thee, that thei knowe that no
God is, no but thou; that thei telle out
thi grete dedis.
3 Reise thin hond on hethene
men aliens, that thei se thi power.
4 For as thou were halewid in vs in the si&yogh;t
of hem, so in oure si&yogh;t thou schalt be magnefyed
in hem;
5 that thei knowe thee, as
and we han knowe, that noon othere is God,
outakun thee, Lord.
6 Make thou newe
signes, and chaunge thou merueilis;
7 glorifie
the hond note, and the ri&yogh;t arm.
8 Reise
thou stronge veniaunce, and schede out
ire;
9 take awei the aduersarie, and turmente
the enemye.
10 Haaste thou the tyme,
and haue thou mynde on the ende, that
thei telle out thi merueils.
11 And he that
is sauyd, be deuourid in the ire of flawme;
and thei that treten worst thi puple, fynde
perdicioun.
12 Al to-breke thou the heed of
princis, and of enemyes, seiynge, Noon
othere is, outakun vs.
13 Gadere thou togidere
alle the lynagis of Jacob, and knowe
thei that no God is, no but thou, that
thei telle out thi grete dedis; and thou
schalt enherite hem note, as at the bigynnyng.
14 Haue thou merci on thi puple, on which
thi name is clepid in to help; and on Israel,
whom thou madist euene to thi firste
gendrid sone.
15 Haue thou merci on Jerusalem,
the citee of thin halewyng, on the
citee of thi reste.
16 Fille thou Syon with
-- --
thi vertues, that moun not be teld out,
and fille thi puple with thi glorie.
17 &YOGH;yue
thou witnessyng, that at the bigynnyng
thei weren thi creaturis note; and reise thou
preieris, whiche the formere profetis spaken
in thi name.
18 Lord, &yogh;yue thou meede to
hem that abiden thee, that thi prophetis
be foundun trewe; and here thou the
preier of thi seruauntis.
19 Aftir the blessyng
of Aaron &yogh;yue thou to thi puple, and
dresse thou vs in to the weie of ri&yogh;tfulnesse;
that alle men wite, that dwellen in
erthe, that thou art God, the biholdere of
worldis.
20 The wombe schal ete alle mete,
and o mete is betere than another mete.
21 Chekis touchen mete note almest, and an vnwise
herte resseyueth false wordis.
22 A
schrewid herte schal &yogh;yue heuynesse, and
a wijs man schal a&yogh;enstonde it.
23 A womman
schal take ech knaue child, and a
dou&yogh;tir is betere than a sone.
24 The fairnesse
of a womman makith glad the face
of hir hosebonde, and sche schal brynge
desir ouer al the coueitise of man.
25 If ther
is a tunge of heelyng note, ther is also of
swagyng, and of merci; the hosebonde of
hir is not aftir the sones of men.
26 He that
hath in possessioun a good womman, bigynneth
possessioun; sche is an help lijk
hym, and a piler as reste.
27 Where an hegge
is not, the possessioun schal be rauyschid
awei; and where a womman is not, a nedi
man weilith.
28 To whom bileueth he that
hath no nest, and bowith doun where euer
it is derk, as a theef girt, skippynge out
fro citee in to citee?
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
