Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
PSALM LXXVII.
1 The `title of the seuene and seuentithe
salm. The lernyng of Asaph note.
Mi puple, perseyue &yogh;e my lawe; bowe
&yogh;oure eere in to the wordis of my mouth.
2 I schal opene my mouth in parablis; Y
schal speke perfite resouns fro the bigynnyng.
3 Hou grete thingis han we herd,
aud we han knowe tho; and oure fadris.
telden to vs.
4 Tho ben not hid fro the
sones of hem; in anothir generacioun. And
thei telden the heriyngis of the Lord, and
the vertues of hym; and hise merueilis,
whyche he dide.
5 And he reiside witnessyng
in Jacob; and he settide lawe in Israel.
-- --
Hou grete thingis comaundide he to
oure fadris, to make tho knowun to her
sones;
6 that another generacioun knowe.
Sones, that schulen be born, and schulen
rise vp; schulen telle out to her sones.
7 That thei sette her hope in God, and for&yogh;ete
not the werkis of God; and that thei
seke hise comaundementis.
8 Lest thei be
maad a schrewid generacioun; and terrynge
to wraththe, as the fadris of hem.
A generacioun that dresside not his herte;
and his spirit was not bileued with God.
9 The sones of Effraym, bendinge a bouwe
and sendynge arowis; weren turned in the
dai of batel.
10 Thei kepten not the testament
of God; and thei nolden go in his
lawe.
11 And thei for&yogh;aten hise benefices; and
hise merueils, whiche he schewide to hem.
12 He dide merueils bifore the fadris of hem
in the loond of Egipt; in the feeld of
Taphneos.
13 He brak the see, and ledde
hem thorou; and he ordeynede the watris
as in a bouge.
14 And he ledde hem forth
in a cloude of the dai; and al ni&yogh;t in the
li&yogh;tnyng of fier.
15 He brak a stoon in deseert;
and he &yogh;af watir to hem as in a
myche depthe.
16 And he ledde watir out of
the stoon; and he ledde forth watris as
floodis.
17 And thei `leiden to &yogh;it to do
synne a&yogh;ens hym; thei excitiden hi&yogh;e God
in to ire, in a place with out water.
18 And
thei temptiden God in her hertis; that
thei axiden meetis to her lyues.
19 And thei
spaken yuel of God; thei seiden, Whether
God may make redi a bord in desert?
20 For
he smoot a stoon, and watris flowiden; and
streemys &yogh;eden out in aboundaunce. Whether
also he may &yogh;yue breed; ether make
redi a bord to his puple?
21 Therfor the
Lord herde, and delaiede; and fier was
kindelid in Jacob, and the ire of God
stiede on Israel.
22 For thei bileueden not
in God; nether hopiden in his heelthe.
23 And he comaundide to the cloudis aboue;
and he openyde the &yogh;atis of heuene.
24 And
-- --
he reynede to hem manna for to eete; and
he &yogh;af to hem breed of heuene.
25 Man eet
the breed of aungels; he sent to hem
meetis in aboundance.
26 He turnede ouere
the south wynde fro heuene; and he
brou&yogh;te in bi his vertu the weste wynde.
27 And he reynede fleischis as dust on hem;
and `he reinede volatils fethered, as the
grauel of the see.
28 And tho felden doun
in the myddis of her castels; aboute the
tabernaclis of hem.
29 And thei eeten, and
weren fillid greetli, and he brou&yogh;te her
desire to hem;
30 thei weren not defraudid
of her desier. &YOGH;it her metis weren in her
mouth;
31 and the ire of God stiede on hem.
And he killide the fatte men of hem; and
he lettide the chosene men of Israel.
32 In
alle these thingis thei synneden &yogh;it; and
bileuede not in the merueils of God.
33 And
the daies of hem failiden in vanytee; and
the &yogh;eeris of hem faileden with haste.
34 Whanne he killide hem, thei sou&yogh;ten hym;
and turneden a&yogh;en, and eerli thei camen
to hym.
35 And thei bithou&yogh;ten, that God is
the helper of hem; and `the hi&yogh; God is
the a&yogh;enbier of hem.
36 And thei loueden
hym in her mouth; and with her tunge
thei lieden to hym.
37 Forsothe the herte of
hem was not ri&yogh;tful with hym; nethir thei
weren had feithful in his testament.
38 But
he is merciful, and he schal be maad merciful
to the synnes of hem; and he schal
not destrie hem. And he dide greetli, to
turne awei his yre; and he kyndelide not
al his ire.
39 And he bithou&yogh;te, that thei ben
fleische; a spirit goynge, and not turnynge
a&yogh;en.
40 Hou oft maden thei hym wrooth in
desert; thei stireden hym in to ire in a
place with out watir.
41 And thei weren
turned, and temptiden God; and thei
wraththiden the hooli of Israel.
42 Thei bithou&yogh;ten
not on his hond; in the dai in
the which he a&yogh;en bou&yogh;te hem fro the
hond of the trobler.
43 As he settide hise
-- --
signes in Egipt; and hise grete wondris
in the feeld of Taphneos.
44 And he turnede
the flodis of hem and the reynes of hem
in to blood; that thei schulden not drynke.
45 He sente a fleisch flie in to hem, and it
eet hem; and he sente a paddok, and it
loste hem.
46 And he &yogh;af the fruytis of hem
to rust; and he &yogh;af the trauels of hem to
locustis.
47 And he killide the vynes of hem
bi hail; and the moore trees of hem bi a
frost.
48 And he bitook the beestis of hem
to hail; and the possessioun of hem to fier.
49 He sente in to hem the ire of his indignacioun;
indignacioun, and ire, and tribulacioun,
sendingis in bi iuel aungels.
50 He
made weie to the path of his ire, and he
sparide not fro the deth of her lyues; and
he closide togidere in deth the beestis of
hem.
51 And he smoot al the first gendrid
thing in the lond of Egipt; the first
fruytis of alle the trauel of hem in the
tabernaclis of Cham.
52 And he took awei
his puple as scheep; and he ledde hem
forth as a flok in desert.
53 And he ledde
hem forth in hope, and thei dredden not;
and the see hilide the enemyes of hem.
54 And he brou&yogh;te hem in to the hil of his
halewyng; in to the hil which his ri&yogh;thond
gat. And he castide out hethene
men fro the face of hem; and bi lot he
departide to hem the lond in a cord of
delyng.
55 And he made the lynagis of Israel
to dwelle in the tabernaclis of hem.
56 And thei temptiden, and wraththiden hei&yogh;
God; and thei kepten not hise witnessyngis.
57 And thei turneden awei hem silf,
and thei kepten not couenaunt; as her fadris
weren turned in to a schrewid bouwe.
58 Thei stiriden him in to ire in her litle
hillis; and thei terriden hym to indignacioun
of her grauen ymagis.
59 God herde,
and forsook; and brou&yogh;te to nou&yogh;t Israel
greetli.
60 And he puttide awei the tabernacle
of Sylo; his tabernacle where he
dwellide among men.
61 And he bitook the
-- --
vertu of hem in to caitiftee; and the fairnesse
of hem in to the hondis of the enemye.
62 And he closide togidere his puple in
swerd; and he dispiside his erytage.
63 Fier
eet the &yogh;onge men of hem; and the virgyns
of hem weren not biweilid.
64 The prestis
of hem fellen doun bi swerd; and the widewis
of hem weren not biwept.
65 And the
Lord was reisid, as slepynge; as mi&yogh;ti
greetli fillid of wiyn.
66 And he smoot hise
enemyes on the hynderere partis; he &yogh;af
to hem euerlastyng schenschipe.
67 And he
puttide awei the tabernacle of Joseph; and
he chees not the lynage of Effraym.
68 But
he chees the lynage of Juda; he chees the
hil of Syon, which he louede.
69 And he as
an vnicorn bildide his hooli place; in the
lond, which he foundide in to worldis.
70 And he chees Dauid his seruaunt, and
took hym vp fro the flockis of scheep; he
took hym fro bihynde scheep with lambren.
71 To feed Jacob his seruaunt; and
Israel his eritage.
72 And he fedde hem in
the innocens of his herte; and he ledde
hem forth in the vndurstondyngis of his
hondis.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
