Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
To look up a word in a dictionary, select the word with your mouse and press 'd' on your keyboard.
CAP. XXI.
21 And Ezechie slepte with hise fadris, and
Manasses, his sone, regnyde for hym.
1 Manasses was of twelue &yogh;eer, whanne he
bigan to regne, and he regnyde fyue and
fifti &yogh;eer in Jerusalem; the name of his
modir was Asiba.
2 And he dide yuel in
the si&yogh;t of the Lord, bi the idols of hethene
men, whiche hethene men the Lord dide
awei fro the face of the sones of Israel.
3 And he was turned, and bildide hi&yogh;e
thingis, whiche Ezechie, his fadir, distriede;
and he reiside auteris of Baal, and he
made woodis, as Achab kyng of Israel
hadde do; and he worschipide `with out
forth al the kny&yogh;thod of heuene, and
worschipide it in herte.
4 And he bildide
auteris note in the hows of the Lord, of which
the Lord seide, Y schal sette my name in
Jerusalem.
5 And he bildide auteris to al
the kny&yogh;thod of heuene in the twei large
places of the temple of the Lord;
6 and he
`ledde ouer his sone thorou&yogh; the fier; and
he vside false dyuynyngis in auteris, on
whiche sacrifice was maad to feendis, and
he kepte false dyuynyngis bi chiteryng
of bryddis; and he made men to haue yuele
spiritis spekynge in the wombe, and he
multipliede false dyuynours in entraylis of
beestis sacrified to feendis, that he schulde
do yuel bifor the Lord, and terre hym to
-- --
ire.
7 And he settide an ydol of wode,
which he hadde maad, in the temple of
the Lord, `of which temple the Lord
spak to Dauid, and to Salomon, his sone,
Y schal sette my name withouten ende in
this temple, and in Jerusalem which Y
chees of alle the lynagis of Israel.
8 And Y
schal nomore make the foot of Israel to be
moued fro the lond which Y &yogh;af to the
fadris of hem; so netheles if thei kepen in
werk alle thingis whiche Y comaundide
to hem, and al the lawe whiche Moises,
my seruaunt, comaundide to hem.
9 Sotheli
thei herden not, but weren disseyued of
Manasses, that thei diden yuel ouer hethene
men, whiche the Lord al to-brak fro the
face of the sones of Israel.
10 And the Lord
spak in the hond of his seruauntis prophetis,
and seide,
11 For Manasses, kyng of
Juda, dide these worste abhomynaciouns
ouer alle thingis which Ammorreis diden
bifor hym, and maden also the puple of
Juda to do synne in hise vnclennessis;
12 therfor the Lord God of Israel seith these
thingis, Lo! Y schal brynge in yuelis on
Jerusalem and Juda, that who euer
herith, bothe hise eeris tyngle note;
13 and Y
schal holde forth on Jerusalem the corde
of Samarie, and the birthun of the hows of
Achab note, and Y schal do awei Jerusalem,
as tablis ben wont to be doon awei; and
Y schal do awey and turne it, and Y
schal lede ful ofte the poyntel on the
face therof.
14 Forsothe Y schal leeue relikis
of myn eritage, and Y schal bitake hem in
to the hond of enemyes therof; and thei
schulen be in distriynge, and in raueyn to
alle her aduersaries;
15 for thei diden yuel
bifor me, and thei continueden terrynge
me to ire, fro the dai in which her fadris
&yogh;eden out of the lond of Egipt `til to this
day.
16 Ferthermore also Manasses schedde
ful myche ynnocent blood, til he fillide
Jerusalem `til to the mouth, with outen
-- --
hise synnes bi whiche he made Juda to do
synne, to do yuel bifor the Lord.
17 Forsothe
the residue of the wordis of Manasses,
and alle thingis whiche he dide, and his
synne whiche he synnede, whether these
ben not writun in the book of wordis of
daies of the kyngis of Juda?
18 And Manasses
slepte with hise fadris, and was
biried in the gardyn of his hows, in the
gardyn of Azam; and Amon, his sone,
regnyde for hym.
19 He was of two and
twenti &yogh;eer, whanne he bigan to regne;
and he regnede twei &yogh;eer in Jerusalem; the
name of his modir was Mesalamech, the
dou&yogh;ter of Arus of Gethela.
20 And he dide
yuel in the si&yogh;t of the Lord, as Manasses,
his fader, hadde do.
21 And he &yogh;ede in al the
weie, bi which his fader hadde go, and he
seruide to vnclennessis note, to whiche his fadir
hadde seruyd, and he worschipide tho;
and he forsook the Lord God of hise fadris,
22
and he &yogh;ede not in the weye of the Lord.
23 And hise seruauntis settiden tresouns to
hym, and killiden the kyng in hise hows.
24 Sothely the puple of the Lord smoot alle
men, that hadden conspirid a&yogh;ens kyng
Amon, and thei ordeyneden to hem a kyng,
Josias, `his sone, for hym.
25 Forsothe
the residue of wordis of Amon, whiche
he dide, whether these ben not writun in
the book of wordis of daies of the kyngis
of Juda?
26 And he slepte with hise fadris,
and thei birieden hym in his sepulcre in
the gardyn of Azam; and Josias, his sone,
regnede for him.
Wycliffe (Late) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02020].
|
