Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
To look up a word in a dictionary, select the word with your mouse and press 'd' on your keyboard.
CAP. XVIII.
1 And alle the sones of Yrael ben gedryd
in Sylo, and there thei pi&yogh;ten the
tabernacle of witnessynge; and the loond
was suget to hem.
2 Forsothe there dwelten
of the sones of Yrael seuen lynagis, that
&yogh;it not hadden taak her possessiouns.
3 To
whom seith Josue, How long `welewen &yogh;e
with slewth, and &yogh;e goon not into the
loond to be weeldid, that the Lord God
of &yogh;oure faders hath &yogh;yue to &yogh;ou?
4 Chesith
of eche lynagis thre men, that Y sende
hem, and thei goon, and enuyroun the
loond, and discryue it after the noumbre
of eche multitude, and thei tellen to me,
that thei han discryued.
5 Dyuyde &yogh;e to
&yogh;ou the loond into seuen partis; Judas
be in hys teermes at the south coost, and
the hows of Joseph fro the north;
6 the
mydil loond bitwix thes discryue &yogh;e into
seuen partise; and thanne &yogh;e shulen come
to me, that before the Lord oure God I
sende to &yogh;ow her lot;
7 for there is not
a mong &yogh;ou paart of Leuytis, but preesthod
of the Lord, this is the herytage of
hem. Forsothe Gad, and Ruben, and the
half lynage of Manasse now han taak
her possessiouns bi&yogh;ond Jordan, at the est
coost, the whiche Moyses, the seruaunt of
the Lord, hath &yogh;eue to hem.
8 And whanne
the men weren rysen for to goon, to discryue
the loond, Josue commaundide to
hem, seiynge, Gooth aboute the loond,
and discryue &yogh;e it, and torneth a&yogh;en to
me, that here bifore the Lord &yogh;oure God
in Sylo Y sende to &yogh;ou lot.
9 And so thei
wenten, and goynge about it in seuen
parties dyuydeden, wrytynge in volym;
and thei turneden a&yogh;en to Josue, into the
tentis of Sylo.
10 The whiche leide lottis
before the Lord God in Silo, and dyuydede
the loond to the sones of Yrael,
-- --
into seuen parties.
11 And stiede vp the
first lot of the sones of Beniamyn, by her
meynees, that thei weelden the loond bitwix
the sones of Juda and the sones of
Joseph.
12 And the teerme of hem was a&yogh;ens
the north fro Jordan, goynge bisyde the
side of Jerycho of the north coost; and
fro thens a&yogh;ens the west to the mounteyn
stiynge, and comynge to the wildirnes of
Bethanen, and passynge biside Luzan to
the south;
13 that is Bethel; and he cam
doun into Astaroth of Adar, into the hil
that is at the south of the nether Betheron;
14 and is bowid goynge about a&yogh;ens
the see, to the south of the hil that biholdith
Betheron a&yogh;ens Affrijk; and the
goyngis out of it ben Scaryathabaal, and
the whiche is clepid Caryathiarym, the
cytee of the sones of Juda; this is the
greet coost a&yogh;ens the see, to the west.
15 Forsothe fro the south, of the part of
Caryathiarym, gooth out the teerme a&yogh;ens
the see, and cometh vnto the welle of
watris of Nepthoa;
16 and comith doun into
the paart of the hil that biholdith the
valey of the sones of Ennon, and is a&yogh;ens
the north coost, in the vttermoost paart
of the valey of Raphaym; and Gehennon,
that is, the valey of Ennon, `cometh doun
by side the side of Jebusei, to the south,
and cometh to the welle of Rogel,
17 passynge
to the north, and goynge out to
Empsemes, that is, the welle of the sunne,
18 and passith vnto the litil hillis that ben
`forn a&yogh;ens of the stiynge vp of Adomyn;
and cometh doun to Thabem Boen, that is,
the stoon of Boen, sone of Ruben, and
passith fro the side of the north to the
wijld feeldis; and cometh doun into the
pleyn,
19 and gooth biside a&yogh;ens the north
of Bethagalam; and the goyngis out of it
ben a&yogh;ens the tong of the saltest see, fro
-- --
the north, in the eend of Jordan to the
south coost,
20 that is the teerme of it fro
the est. This is the possessioun of the
sones of Beniamyn, bi her teermys in enuyroun,
and her meynees;
21 and his citees
weren Jericho, and Bethegla, and the
valey of Casis,
22 Betharacha, and Samaraym,
and Bethel,
23 and Anym, and Affara,
and Offyra,
24 the toun Hesmona, and Offym,
and Gabee, cytees twelue, and the
touns of hem;
25 Gabaon, and Rama, and
Beroth,
26 and Mesphe, Chaphera, and Anymosa,
and Recen,
27 Jerephel, and Tharela,
and Sela,
28 and Heleph, and Jebus, that is
Jerusalem, Gabaath, and Curiath, citees
fourteen, and the touns of hem; this is
the possessioun of the sones of Beniamyn,
aftir her meyneis.
Wycliffe (Early) [1850], THE HOLY BIBLE, CONTAINING THE OLD AND NEW TESTAMENTS, WITH THE APOCRYPHAL BOOKS, IN THE EARLIEST ENGLISH VERSIONS MADE FROM THE LATIN VULGATE BY JOHN WYCLIFFE AND HIS FOLLOWERS: Edited by THE REV. JOSIAH FORSHALL, F.R.S. etc. Late Fellow of Exeter College, and SIR FREDERIC MADDEN, K.H. F.R.S. etc. Keeper of the MSS. in the British Museum (OXFORD UNIVERSITY PRESS, OXFORD) [word count] [B02010].
|
